އެމެރިކާ އާއެކު ކުރާ މަޝްވަރާ ތަކުގައި އިސްކަން ދޭނީ ލުބުނާންގެ މައްސަލަ އަށް: އީރާން

އެމެރިކާ އާއެކު އީރާން އިން ކުރިއަށް ގެންދާ މަޝްވަރާ ތަކުގައި އެންމެ ބޮޑު އިސްކަމެއް ދޭނީ، ލުބުނާންގެ މައްސަލަ އަށް ކަމަށް އީރާން އިން ބުނެފި އެވެ.

ސްވިޒަލެންޑުގައި އާދީއްތަ ދުވަހު ކުރިއަށް ގެންދާ މަޝްވަރާ ތަކަށް އީރާން އާއި އެމެރިކާގެ އިސް ބޭފުޅުން ވަނީ އެ ޤައުމަށް ވަޑައިގެންފައި އެވެ. މީގެ އިތުރުން، މި މައްސަލައިގައި މެދުވެރިއެއްގެ ދައުރު އަދާ ކުރަމުން އަންނަ ޕާކިސްތާންގެ އިސް ވެރިން ވެސް ވަނީ ސްވިޒަލެންޑަށް ވަޑައިގެންފައި އެވެ.

އީރާން އިން ބުނެފައި ވަނީ އެމެރިކާ އާއެކު ކުރިއަށް ގެންދާ މަޝްވަރާ ތަކުގައި ލުބުނާންގެ މައްސަލައިގެ އިތުރުން، ހިފަހައްޓާފައިވާ އީރާންގެ ފައިސާ ދޫކުރުމާއި، އެ ޤައުމުގެ ތެޔޮ ވިއްކުމަށް ބޭނުންވާ ހުއްދަތައް ހޯދުމާ ގުޅޭ ގޮތުން ވެސް މަޝްވަރާ ކުރާނެ ކަމަށެވެ. 

އީރާންގެ ރަސްމީ ނިއުސް އެޖެންސީ "އިރްނާ" އިން އާންމުކުރި ވީޑިއޯއެއްގައި އެ ގައުމުގެ ފޮރިން މިނިސްޓްރީގެ ތަރުޖަމާނު އިސްމާއީލް ބަޣާއީ ވިދާޅުވީ، ޒަޔަނިސްޓް އިޒްރޭލް އިން ލުބުނާންގައި ވެފައިވާ އެއްބަސްވުންތަކާ ތަކުރާރުކޮށް ޚިލާފު ވަމުންދާ ކަމަށެވެ. އެހެންކަމުން، އާދީއްތަ ދުވަހު ކުރިއަށްދާ މަޝްވަރާ ތަކުގެ މައިގަނޑު މައުޟޫއަކީ އެ މައްސަލަ ކަމަށް އޭނާ ފާހަގަ ކުރެއްވި އެވެ.

މީގެ އިތުރުން، ބޭރުގެ ބޭންކު ތަކުގައި ހިފަހައްޓާފައިވާ، ނުވަތަ ބޭނުން ކުރުން މަނާ ކޮށްފައިވާ އީރާންގެ މާލީ އެސެޓުތައް ދޫކޮށްލުމާ ގުޅޭ ގޮތުން ވެސް މި ބައްދަލުވުމުގައި ވާހަކަ ދެކެވޭނެ ކަމަށް ބަޣާއީ ވިދާޅުވި އެވެ. އަދި އީރާންގެ ތެޔޮ ބައިނަލްއަގުވާމީ ބާޒާރުގައި ވިއްކުމަށް ބޭނުންވާ ކަންކަމާއި، އެކަމަށް ބޭނުންވާ ހުއްދަތައް ހޯދުމަކީ ވެސް އެޖެންޑާގައި ހިމެނޭ މުހިންމު ކަންތައް ތަކެއް ކަމަށް އޭނާ ވިދާޅުވި އެވެ.

އީރާން އާއި އެމެރިކާއާ ދެމެދު ސީދާ ސިޔާސީ ގުޅުމެއް ނޯންނާތީ، މިފަދަ މަޝްވަރާތައް އާންމުކޮށް ކުރިއަށް ދަނީ މެދުވެރިއެއްގެ އެހީގައި އެވެ. ސްވިޒަލެންޑުގައި މި ބާއްވާ ބައްދަލުވުމަކީ ސަރަހައްދީ މަސްލަހަތު ގޯސްވެފައިވާ ދަނޑިވަޅެއްގައި، ދެ ގައުމުގެ ދެމެދުގައި ހުރި ނުތަނަވަސްކަން ކުޑަ ކުރުމަށް ކުރެވޭ މުހިންމު މަސައްކަތެއްގެ ގޮތުގައި މަސްރަހު ދިރާސާ ކުރާ ފަރާތް ތަކުން ދެކެ އެވެ.