މެދު އިރުމަތީގައި ފުރިހަމަ ސުލްޙައެއް ޤާއިމު ކުރުމަށް ޓްރަމްޕް އިސްކަން ދެއްވާ: އެމެރިކާގެ ނައިބު ރައީސް ވޭންސް

މެދު އިރުމަތީގެ ސަރަހައްދީ ހަމަ ނުޖެހުންތައް ނިމުމަކަށް ގެނެސް، ފުރިހަމަ ސުލްހައެއް ގާއިމު ކުރުމަށް އެމެރިކާގެ ރައީސް ޑޮނަލްޑް ޓްރަމްޕް އިސްކަން ދެއްވާނެ ކަމަށް އެމެރިކާގެ ނައިބު ރައީސް ޖޭޑީ ވޭންސް ވިދާޅުވެއްޖެ އެވެ.

އެމެރިކާގެ ނައިބު ރައީސް ވޭންސް މިހެން ވިދާޅުވީ، އެމެރިކާ އާއި އީރާންއާ ދެމެދު ޤާއިމު ކޮށްފައިވާ ހަނގުރާމަ ހުއްޓާލުމުގެ އެއްބަސްވުމާއި، ލުބުނާންގައި މިހާރު އިއުލާނު ކޮށްފައިވާ ހަމަލާ ބަދަލުކުރުން ހުއްޓާލުމުގެ އެއްބަސްވުން ދެމެހެއްޓުމަށް ކުރަމުންދާ މަސައްކަތްތަކާ ގުޅޭ ގޮތުން ވާހަކަ ދައްކަވަމުންނެވެ.

ސްވިޒަލެންޑުގައި ކުރިއަށްދާ މަޝްވަރާ ތަކުގައި ބައިވެރިވެ ވަޑައިގެން ވޭންސް ވިދާޅުވީ، ލުބުނާންގައި ހަމަލާ ބަދަލު ކުރުން ހުއްޓާލުމަށް ވެފައިވާ އެއްބަސްވުން ދެމެހެއްޓުމަށް ފާއިތުވި ދެ ދުވަހުގެ ތެރޭގައި ބޮޑެތި ކުރިއެރުން ތަކެއް ލިބިފައިވާ ކަމަށެވެ. އަދި މުޅި މެދު އިރުމަތީގެ ސަރަހައްދަށް ފުރިހަމަ ސުލްޙައެއް ގެނައުމަކީ، ޓްރަމްޕްގެ ސަރުކާރުން ވަރަށް ބޮޑު އަހަންމިއްޔަތު ކަމެއް ދެއްވާނެ ކަމެއް ކަމަށް ވެސް އޭނާ ވިދާޅުވި އެވެ. 

ހަމަލާ ބަދަލު ކުރުން ހުއްޓާލުމުގެ މިފަދަ އެއްބަސްވުން ތަކަކީ އާންމު ގޮތެއްގައި ތަންފީޒު ކުރަން އުނދަގޫ އަދި ކޮންމެ ވެސް ވަރެއްގެ ހަލަބޮލި ކަމެއް އެކުލެވިގެން ކަމެއް ކަަމަށް ވޭންސް ފާހަގަ ކުރެއްވި އެވެ. ނަމަވެސް، މިހާރު ކުރިއަށްދާ މަޝްވަރާ ތަކަކީ ސަރަހައްދީ ހަމަޖެހުމަށް އެޅޭ މުހިންމު ފިޔަވަޅެއްގެ ގޮތުގައި ވޭންސް ވަނީ ސިފަ ކުރައްވައިފަ އެވެ. 

މީގެ އިތުރުން ވޭންސް ވިދާޅުވެފައި ވަނީ، ޓެކްނިކަލް ފެންވަރުގައި ކުރެވޭ މަޝްވަރާ ތަކުން، ހުރިހާ ޚިޔާލު ތަފާތުވުން ތަކަކަށް ވަގުތުން ޙައްލު ނުލިބުނު ކަމަށް ވީ ނަމަވެސް، މިއީ ތާރީޚުގައި ފުރަތަމަ ފަހަރަަށް އެކި ޓީމުތައް އެކުގައި އިށީނދެ މަޝްވަރާ ކުރުމަށް ލިބޭ ފުރުސަތެއް ކަމަށެވެ. މީގެ ސަބަބުން ކުރިއަށް އޮތް ތަނުގައި މައްސަލަތައް ޙައްލު ކުރުމަށް މަގު ފަހި ވެގެން ދާނެ ކަމަށް އެމެރިކާގެ ސަރުކާރުން ޤަބޫލު ކުރާ ކަމަށް ވެސް ވޭންސް ވިދާޅުވި އެވެ.

މެދު އިރުމަތީގެ މަސްރަހު ފިނި ކުރުމަށް ޓްރަމްޕްގެ ސަރުކާާރުން މިހާރު ޚާއްސަ ސިޔާސަތު ތަކެއް ގެންގުޅޭނެ ކަމަށް ބެލެވެ އެވެ. އެގޮތުން ލުބުނާން އާއި އިޒްރޭލްއާ ދެމެދު ވެފައިވާ އެއްބަސްވުމް ދެމެހެއްޓުމަކީ މުޅި ސަރަހައްދުގެ ސުލްޙަ އަށް އެޅޭ ފުރަތަމަ ބިންގާ ކަމަށް މަސްރަހު ދިރާސާ ކުރާ ފަރާތްތަކުން ދެކެ އެވެ.