އިނގިރޭސިވިލާތުގެ އެޑިންބަރާގައި މުސްލިމުންނަށް އަމާޒުކޮށް ސިލްސިލާ ހަމަލާތަކެއް ދީފި

އިނގިރޭސިވިލާތުގެ އެޑިންބަރާގައި މުސްލިމުންނަށް އަމާޒުކޮށް ހިންގި ސިލްސިލާ ހަމަލާތަކަކާ ގުޅިގެން މީހެއްގެ މައްޗަށް ދައުވާ އުފުލައިފިއެވެ.

މި ހަމަލާތަކުގައި ފަސް ފިރިހެނަކަށް އެކި ވަރުގެ އަނިޔާތައް ލިބިފައިވެއެވެ. އޭގެ ތެރޭގައި ހިމެނެނީ 22 އަހަރުގެ ދެ މީހަކާއި، 24 އަހަރާއި، 27 އަހަރާއި، އަދި 39 އަހަރުގެ މީހެކެވެ. މީގެ ތެރެއިން ތިން މީހަކަށް ހޮސްޕިޓަލުގައި ފަރުވާދޭން ޖެހުނު ނަމަވެސް، އެއްވެސް މީހެއްގެ ފުރާނައަށް ނުރައްކާވާ ފަދަ އަނިޔާއެއް ލިބިފައި ނުވާ ކަމަށް ރިޕޯޓުތައް ބުނެއެވެ.

ބޮޑުވަޒީރު ސަރ ކިއަރ ސްޓާމަރ ވިދާޅުވި ގޮތުގައި، މި ހާދިސާތަކަކީ "މުސްލިމުންނަށް އޮތް ނަފުރަތެއްގެ" ސަބަބުން ހިންގާފައިވާ ކަންކަން ކަމަށް ބެލެވެއެވެ.

އޭނާ އިތުރަށް ވިދާޅުވީ، "މި ހާދިސާގައި އަނިޔާވި ފަރާތްތަކާއެކު އަޅުގަނޑުގެ ހިތާމައިގައި ބައިވެރިވަން. އަދި ފުލުހުންނާއި ކުއްލި ހާލަތްތަކުގައި އެހީތެރިކަން ފޯރުކޮށްދޭ ފަރާތްތަކުން ދެއްވި އިޖާބައަށް ޝުކުރު އަދާކުރަން،" ކަމަށެވެ.

ސްކޮޓްލޭންޑްގެ ފުލުހުން ކަށަވަރުކޮށްދީފައިވާ ގޮތުގައި، މި މައްސަލައިގައި 36 އަހަރުގެ މީހެއްގެ މައްޗަށް ވަނީ ދައުވާ އުފުލާފައެވެ. އަދި ކުރިއަށް އޮތް ތަނުގައި އޭނާ ކޯޓަށް ހާޒިރުކުރެވޭނެއެވެ.

ހުކުރު ދުވަހު، އެ ސިޓީގެ އެކި ސަރަހައްދުތަކުގައި ބިރުދެއްކުމާއި، ފޭރުމާއި، އަދި މުދަލަށް ގެއްލުން ދިނުން ހިމެނޭ ގޮތަށް ހިންގި ހަމަލާތަކާ ގުޅިގެން ފުލުހުންނަށް ގިނަ ރިޕޯޓުތަކެއް ލިބިފައިވެއެވެ.

ސޯޝަލް މީޑިއާގައި އާންމުވެފައިވާ ވީޑިއޯއަކުން ވަޅިއެއް ހިފައިގެން ހުރި މީހަކު ފެންނައިރު، އެހެން ވީޑިއޯއަކުން ފެންނަނީ ފުލުހަކު މީހަކު ހިފަހައްޓައިގެން ބިންމަތީގައި އޮއްވައެވެ. ގަމީސް ނުލައި ބިންމަތީގައި އޮތް އެ މީހާ "އަހަރެން މި ރައްކާތެރިކުރަނީ ގައުމު" ކަމަށް ބުނެ ހަޅޭއްލަވަމުންދިޔައެވެ.

މުސްލިމް އެންގޭޖްމަންޓް އެންޑް ޑިވެލޮޕްމަންޓް ޖަމިއްޔާއިން ބުނި ގޮތުގައި، އަނިޔާވި މީހުންގެ ތެރޭގައި ގިނައީ މުސްލިމުންނެވެ.

ސްކޮޓިޝް އެސޯސިއޭޝަން އޮފް މޮސްކްސް (އެސް.އޭ.އެމް) އިން ބުނީ، އަނިޔާވި މީހުންގެ ތެރެއިން ދެ މީހަކަށް ހަމަލާދީފައިވަނީ "އެ މީހުން ދިރިއުޅޭ ސަރަހައްދުގެ މިސްކިތުގައި ނަމާދުކޮށްގެން ނުކުތް ވަގުތު" ކަމަށް މައުލޫމާތު ލިބިފައިވާ ކަމަށެވެ.

ބޮޑުވަޒީރު ސްޓާމަރގެ ވާހަކަފުޅުތައް ހުރީ ހޯމް ސެކްރެޓަރީ ޝަބާނާ މަހްމޫދު ކުރިން ދެއްވި ބަޔާނާ އެއްގޮތަށެވެ. ޝަބާނާ ވިދާޅުވީ މި ހަމަލާތަކުގެ ޚަބަރު ލިބުމުން އޭނާ އަށް "ސިހުން ލިބިވަޑައިގެންނެވި" ކަމަށެވެ.

އޭނާ އިތުރަށް ވިދާޅުވީ، "ތުހުމަތު ކުރެވޭ މީހާ މިކަން ކޮށްފައިވަނީ މުސްލިމުންނަށް އޮތް ނަފުރަތެއްގެ ސަބަބުން ކަމަށް ބެލެވޭ. މުސްލިމުންނާ ދެކޮޅަށް ހިންގާ ނަފުރަތާއި އަނިޔާވެރިކަމަށް މި ގައުމުގައި ޖާގައެއް ނެތް. އަޅުގަނޑަށް އެނގޭ މިއީ ގައުމެއްގެ ގޮތުގައި އަޅުގަނޑުމެންގެ ސިފައެއް ނޫންކަން،" ކަމަށެވެ.

ހަމަލާތަކަކީ 'ބިރުވެރި އާދައެއްގެ ފެށުން'

އެސިސްޓަންޓް ޗީފް ކޮންސްޓަބަލް ކެޓްރިއޯނާ ޕޭޓަން ވިދާޅުވީ މިއީ "ސިހުން ލިބޭ ފަދަ" ހާދިސާއެއް ކަމަށާއި، އޭނާގެ ހަމްދަރުދީ ވަނީ މިކަމުގެ އަސަރުކުރި ފަރާތްތަކާއެކު ކަމަށެވެ.

އޭނާ ވިދާޅުވީ، "އަޅުގަނޑު ބޭނުންވަނީ ހުރިހާ މުޖުތަމައުތަކަކަށް ސާފު މެސެޖެއް ދޭން. އެއީ އެންމެން އެކަތިގަނޑަކަށް ވެގެން ތިބެ، އެންމެ ރީތި ނަމޫނާ ފެންނަ ސްކޮޓްލޭންޑްގައި، ނަސްލީ ތަފާތުކުރުމާއި ދީނީ ނަފުރަތަށް އެއްވެސް ޖާގައެއް ނެތްކަން.

"އެޑިންބަރާގެ އެކި ސަރަހައްދުތަކުގައި ހަލުވިކަމާއެކު ހިނގަމުންދިޔަ ހާދިސާތަކުގެ ރިޕޯޓުތަކަށް ފުލުހުން ވަގުތުން އިޖާބަދީ، މީހަކު ހައްޔަރުކުރި. އަޅުގަނޑުމެން އެންމެ އިސްކަމެއް ދިނީ އާންމުންގެ ސަލާމަތަށް. މިކަން ހިނގައިދިޔަ ގޮތް ބެލުމަށް ފުޅާ ދާއިރާއެއްގައި ތަހުގީގު ކުރިއަށް އެބަދޭ،" ކަމަށެވެ.

އެސް.އޭ.އެމް އިން ނެރުނު ބަޔާނެއްގައި ބުނެފައިވަނީ، "އެޑިންބަރާގައި ދެވުނު ހަމަލާތަކަކީ ސްކޮޓްލޭންޑްގެ މުސްލިމުންނާއި، މިސްކިތްތަކާއި، އިސްލާމީ މުއައްސަސާތަކަށް އަމާޒުކޮށް ހިންގަމުންދާ ބިރުވެރި އަނިޔާވެރި އަމަލުތަކުގެ ތެރެއިން އެންމެ ފަހުން ހިނގި ހާދިސާ،" ކަމަށެވެ.

"ވޭތުވެދިޔަ މަސްތަކުގައި، މިސްކިތްތަކަށް އަމާޒުކޮށް ހަމަލާދިނުމާއި، މުސްލިމް މުޖުތަމައުތަކަށް ނަސްލީ ގޮތުން ފުރައްސާރަކުރުމާއި، އިންޓަނެޓްގައާއި އިންޓަނެޓުން ބޭރުގައިވެސް މުސްލިމުންނާ ދެކޮޅަށް ދައްކާ ވާހަކަތައް އިތުރުވަމުންދާ މަންޒަރު ވަނީ ފެނިފައި،" ކަމަށްވެސް އެ ބަޔާނުގައިވެއެވެ.

ފަސްޓް މިނިސްޓަރ ޖޯން ސުވިނީ ނެރުއްވި ބަޔާނެއްގައި ވިދާޅުވީ، މި ހަމަލާތަކާ ގުޅިގެން އޭނާ "ވަރަށް ބޮޑަށް ކަންބޮޑުވާ" ކަމަށެވެ.

އޭނާ އިތުރަށް ވިދާޅުވީ، "އަޅުގަނޑުމެންގެ ގައުމުގައި އަނިޔާވެރިކަމާއި، ނަސްލީ ތަފާތުކުރުމާއި، އެކަކު އަނެކަކަށް އިހުތިރާމު ނުކުރުމުގެ ސިފައަށް ޖާގައެއް ނެތް. ސަރުކާރުގެ ފުރިހަމަ އެއްބާރުލުން އޮތްކަމުގެ ޔަގީންކަން ދިނުމަށްޓަކައި، މިދިޔަ ހަފުތާގައި އަޅުގަނޑު ވަނީ މުޖުތަމައުގެ އެކި ގްރޫޕްތަކާ ބައްދަލުކޮށްފައި،" ކަމަށެވެ.