ފާއިތުވި ހަފްތާގައި 15،700 އަށް ވުރެ ގިނަ އޮޕަރޭޝަން ހިންގައި އެކި މައްސަލަތަކުގައި 59 މީހަކު، ފުލުހުން ހައްޔަރު ކުރި
މާލެ ސަރަހައްދުގެ ރައްކާތެރިކަން ކަށަވަރުކުރުމަށް ފުލުހުން ހިންގި ޚާއްޞަ އޮޕަރޭޝަންތަކުގައި 15،000 އަށްވުރެ ގިނަ އޮޕަރޭޝަން ހިންގައި، ޖުމްލަ 59 މީހަކު ވަނީ ހައްޔަރުކޮށްފަ. މި މަސައްކަތްތަކުގެ ތެރެއިން މަގުމަތީގެ ސަލާމަތާ ގުޅޭ 45 ހާދިސާއަކަށް އިޖާބަދީފައިވާއިރު، މާލެ އާއި ހުޅުމާލޭގެ އިތުރުން އަތޮޅުތެރޭގެ ރަށްރަށުގައި ވެސް ކުށް މަދުކުރުމަށް ގިނަ ހަރަކާތްތަކެއް ވަނީ ކުރިއަށް ގެންގޮސްފަ. މި އޮޕަރޭޝަންތަކުގައި ޑްރަގް އެންފޯސްމަންޓާއި ގޭންގް ކްރައިމް ފަދަ ދާއިރާތަކުން ވެސް މުހިންމު މަސައްކަތްތަކެއް ކޮށްފައިވާކަން ފުލުހުންގެ ތަފާސްހިސާބުތަކުން ދައްކާ.
ފުލުހުން ކުރިއަށް ގެންދިޔަ ޚާއްސަ އޮޕަރޭޝަނެއްގެ ތެރެއިން | މޯލްޑިވްސް ޕޮލިސް
ނިމިދިޔަ ހަފްތާގެ ތެރޭގައި ދިވެހި ފުލުހުންގެ ޚިދުމަތުން 15،700 އަށް ވުރެ ގިނަ އޮޕަރޭޝަން ކުރިއަށްގެންގޮސްފައިވާ ކަމަށާ އެކި މައްސަލަތަކުގައި 59 މީހަކު އެ ހަފްތާގައި ހައްޔަރު ކޮށްފައިވާ ކަމަށް ފުލުހުން ބުނެފި.
ފުލުހުން ބުނީ ނިމިދިޔަ ހަފުތާގެ ތެރޭގައި، މާލެ ސަރަހައްދުގެ ރައްކާތެރިކަން ކަށަވަރުކުރުމަށްޓަކައި ފުލުހުން ވަނީ މެދުކެނޑުމެއްނެތި ހަރަކާތްތެރިވެ، ކުށް މަދު ކުރުމަށް ގިނަ މަސައްކަތްތަކެއް ކޮށްފައިވާ ކަމާށެވެ.
މިދިޔަ ހަފުތާގެ ތަފާސްހިސާބުތަކަށް ބަލާއިރު، ފުލުހުން ވަނީ އެކި ސަރަހައްދުތައް ބަލައި ފާސްކުރުމަށް 15،798 އޮޕަރޭޝަން ހިންގާފަ އެވެ. ޖުމްލަ 325 އަށްވުރެ ގިނަ ހާދިސާ ރިޕޯޓް ކޮށްފައިވާއިރު ފުލުހުން ހިންގި އެކި އޮޕަރޭޝަންތަކާއި ގާނޫނު ތަންފީޒުކުރުމުގެ މަސައްކަތްތަކުގެ ތެރެއިން 59 މީހަކު ވަނީ ހައްޔަރުކޮށްފަ އެވެ. މީގެ އިތުރުން، ޓްރެފިކް ފުލުހުންނާއި މަގުމަތީގެ ސަލާމަތީ ކަންކަން ބަލަހައްޓާ ޓީމުތަކުން ވަނީ މަގުމަތީގައި ހިނގި 45 އެކްސިޑެންޓަކާއި ޓްރެފިކާ ގުޅުންހުރި ހާދިސާތަކަށް ޙާޟިރުވެފަ އެވެ.
މާލޭގެ، ހެންވޭރު، ގަލޮޅު އަދި މާފަންނުގެ ފުލުހުން ވަނީ 6519 ތަނެއް ބަލައި ފާސް ކޮށްފަ އެވެ. އެ ސަރަހައްދުތަކުން ޖުމްލަ 172 މައްސަލަ ފުލުހުންނަށް ރިޕޯޓް ކޮށްފައިވާއިރު 22 މީހަކު ވަނީ ހައްޔަރު ކޮށްފަ އެވެ. ވިލިމާލެ، ތިލަފުށި އަދި ގުޅީފަޅު ފުލުހުން ވަނީ 2249 ތަނެއް ބަލައި ފާސް ކޮށްފަ އެވެ. އެ ސަރަހައްދުތަކުން ރިޕޯޓް ކޮށްފައިވަނީ ޖުމްލަ 9 މައްސަލަ އެވެ.
އޭގެ އިތުރުން ހުޅުމާލެ ފޭސް 1 އަދި 2 އިން 6486 ތަނެއް ބަލައި ފާސް ކޮށްފައިވާއިރު ހުޅުމާލެ އިން 128 މައްސަލަ ވަނީ ރިޕޯޓް ކޮށްފަ އެވެ. ހުޅުމާލެ އިން 18 މީހުން ހައްޔަރު ކޮށްފައިވާ ކަމަށް ވެސް ތަފާސްހިސާބުތަކުން ދައްކަ އެވެ.
ފުލުހުންގެ ސެންޓްރަލް އިންވެސްޓިގޭޝަން ކޮމާންޑް ސެންޓަރުން، ޑްރަގް އެންފޯސްމަންޓާ ގޭންގް ކްރައިމް އެންފޯސްމަންޓް ކުރި މަސައްކަތުން 544 ތަނެއް ބަލައި ފާސް ކޮށްފައިވާ ކަމަށް ތަފާސް ހިސާބުން ދައްކަ އެވެ. އަދި އެ ބާވަތުގެ 16 މައްސަލަ ރިޕޯޓް ކޮށްފައިވާ ކަމަށާ ސެންޓްރަލް އިންވެސްޓިގޭޝަން ކޮމާންޑުން ފާއިތުވި ހަފްތާގައި 19 މީހުން ހައްޔަރު ކޮށްފައިވާ ކަމަށް ވެސް ތަފާސްހިސާބުގައި ވެ އެވެ. ތަފާސްހިސާބަށް ބަލާއިރު ޓްރެފިކް ޕޮލިސް އަދި ރޯޑް މެނޭޖްމަންޓާ ގުޅޭ 45 މައްސަލަ ވަނީ ހުށަހަޅާފަ އެވެ.
ފުލުހުން ބުނީ މާލެ ސަރަހައްދުގެ އިތުރުން އަތޮޅުތެރޭގެ އެކި ރަށްރަށުގައި ވެސް ސަލާމަތާ ރައްކާތެރިކަން ކަށަވަރު ކޮށް، ކުށް މަދު ކުރުމަށްޓަކައި ގިނަ މަސައްކަތްތަކެއް ފާއިތުވި ހަފްތާގައި ކޮށްފައިވާ ކަމަށެވެ.
