އީރާނާ އެމެރިކާ އާ ދެމެދު ސޮއިކުރި އެއްބަސްވުން ތަންފީޒު ނުކުރާ ނަމަ މެދުއިރުމަތީގެ ހަކަތައިގެ ސަޕްލައި މެދުކަނޑާލާނެ ކަމުގެ އިންޒާރު އީރާނުގެ އިސް މުޝީރަކު ދެއްވައިފި
އެމެރިކާއާއެކު ވެފައިވާ އެއްބަސްވުމަށް އަމަލީ ސިފައެއް ނައިސް، އެއީ ހަމައެކަނި ކަރުދާހުގައި އޮތް އެއްޗަކަށް ވެއްޖެނަމަ މެދުއިރުމަތީގެ ހަކަތައިގެ ސަޕްލައި މެދުކަނޑާލާނެ ކަމުގެ އިންޒާރު އީރާނުގެ އިސް މުޝީރު މުހައްމަދު މުޚްބަރު ދެއްވައިފި. އޭނާ ވިދާޅުވީ ހަނގުރާމަ ހުއްޓާލުމުގެ މާއްދާތަކަށް އަނެއް ފަރާތުން އަމަލުނުކުރާނަމަ، އެމެރިކާއަށް ވިސްނޭނެ ފަދަ އިގްތިސާދީ ބަހުރުވައިން ރައްދު ދޭނެ ކަމަށް.
އިސްލާމީ އިންގިލާބުގެ އެންމެ މަތީ ލީޑަރުގެ އިސް މުޝީރު، މުޙައްމަދު މުޚްބަރު. | ޕްރެސް ޓީވީ
އެމެރިކާއާއި އީރާނާ ދެމެދު ދާދިފަހުން ސޮއިކުރި ފަހުމުނާމާ (އެމްއޯޔޫ) އަށް އަމަލީ ސިފައެއް ނައިސް، އެއީ ހަމައެކަނި ކަރުދާހުގައި އޮތް އެއްޗަކަށް ވެއްޖެނަމަ، ހުޅަނގު އޭޝިއާގެ ހަކަތައިގެ ސަޕްލައި މެދުކަނޑާލާނެ ކަމުގެ އިންޒާރު އީރާނުގެ ލީޑަރު އާޔަތުﷲ ސައްޔިދު މުޖުތަބާ ޚާމަނާއީގެ އިސް މުޝީރަކު ދެއްވައިފިއެވެ.
މުހައްމަދު މުޚްބަރު މިމޭރުމުން ވާހަކަދެއްކެވީ ހޮނިހިރު ދުވަހު އޭނާގެ އެކްސް އެކައުންޓުގައި ކުރެއްވި ޕޯސްޓެއްގައެވެ. އޭނާ މި އިންޒާރު ދެއްވީ، ލުބުނާނު ހިމެނޭހެން ހުރިހާ ދާއިރާއަކުން ހަނގުރާމަ ހުއްޓާލުމަށް ބަޔާންކޮށްފައިވާ ފަހުމުނާމާގެ ފުރަތަމަ މާއްދާއަށް އަނެއް ފަރާތުން އަމަލުކުރަމުން ނުދާތީ އެކަމަށް ރައްދު ދެއްވުމުގެ ގޮތުންނެވެ.
"އެއްބަސްވުމަކީ ހަމައެކަނި ކަރުދާހުގައި އޮތް އެއްޗަކަށް ވެއްޖެނަމަ، މެދުއިރުމަތީގެ ހަކަތައިގެ ސަޕްލައިވެސް މެދުކަނޑާލެވޭނެ،" މުޚްބަރު ވިދާޅުވިއެވެ.
އޭނާ އިތުރަށް ވިދާޅުވީ، އެމެރިކާ މީހުންނަށް އެންމެ ރަނގަޅަށް ވިސްނޭނީ "އިގްތިސާދީ ބަހުރުވައާއި ފައިދާއާއި ގެއްލުމުގެ ހިސާބުތައް" ކަމަށެވެ.
އީރާނުގެ މަސްއޫލިއްޔަތުތައް ފުރިހަމައަށް އަދާކުރުމާއި، އެ ގައުމުގެ ހައްގުތައް އިއާދަކުރުމުން މެނުވީ އީރާނުގެ މަޝްވަރާވެރިން ހިތްހަމަނުޖެހޭނެ ކަމަށް އެ އިސް އޮފިޝަލް ފާހަގަކުރެއްވިއެވެ.
