އިދިކޮޅަށް ކެމްޕެއިން ކުރުމާ ހައްގު ހޯދުމަށް އަޑުއުފުލާ މީހުން ވަޒީފާ އިން ވަކިކުރާތީ ފައްޔާޒުގެ ހޫނު ބަހުގެ ހަމަލާތަކެއް ސަރުކާރަށް
ހިތަދޫ އުތުރު ދާއިރާގެ ބައި-އިލެކްޝަން ކާމިޔާބުކުރި ކެންޑިޑޭޓާ އާއިލީ ގުޅުން އޮޮންނަ މޯލްޑިވްސް ޓްރާންސްޕޮޓޭޝަން ސޭފްޓީ ބޯޑުގެ ޑިރެކްޓަރުގެ މަގާމު އުވާލައި އޭނާ ވަޒީފާއިން ވަކިކުރުމުން އެމްޑީޕީގެ ކުރީގެ ޗެއަރޕާސަން ފައްޔާޒް އިސްމާއިލް ކަންބޮޑުވުން ފާޅުކުރައްވައިފި. މީގެ އިތުރުން ޕެންޝަން ފައިސާގެ މައްސަލައިގައި ހައްގު ހޯދަން އަޑުއުފުލި ވެމްކޯގެ މުވައްޒަފުންތަކެއް ވަޒީފާއިން ވަކިކުރި މައްސަލައަށް ފާޑުވިދާޅުވަމުން، ސަރުކާރުން ކުންފުނިތައް ސިޔާސީ ޖަގަހަތަކަށް ހަދައިގެން އާއިލާތައް ނިކަމެތި ކުރަމުންދާ ކަމަށް ފައްޔާޒު ތުހުމަތު ކުރެއްވި. މިފަދަ ބޭއިންސާފު އަމަލުތަކާ ދެކޮޅަށް އެމްޑީޕީން މަސައްކަތް ކުރާނެ ކަމަށްވެސް އޭނާ ވިދާޅުވި.
ކުރީގެ އިކޮނޮމިކް މިނިސްޓަރު އަދި އެމްޑީޕީގެ ކުރީގެ ޗެއަރޕާސަން ފައްޔާޒް އިސްމާއިލް | އެމްޑީޕީ
ހިތަދޫ އުތުރު ދާއިރާގެ ބައި އިލެކްޝަންގައި ވާދަކުރި އެމްޑީޕީގެ ކެންޑިޑޭޓު އަބްދުﷲ ސޯދިގު (ސޯބެ) އާއެކު ފޮޓޯއެއް ނެންގެވި މައްސަލައެއްގައި، މޯލްޑިވްސް ޓްރާންސްޕޮޓޭޝަން ސޭފްޓީ ބޯޑުގެ ޑިރެކްޓަރުގެ މަގާމުގައި ހުންނެވި އަހުމަދު ޒުހައިރު ފުރުއްވަމުން ގެންދެވި މަގާމު ސަރުކާރުން އުވާލި މައްސަލައިގައި ކުރީގެ އިކޮނޮމިކް މިނިސްޓަރު އަދި އެމްޑީޕީގެ ކުރީގެ ޗެއަރޕާސަން ފައްޔާޒް އިސްމާއިލް ކަންބޮޑުވުން ފާޅުކުރައްވައިފި އެވެ.
ރާއްޖެއެމްވީ އަށް މައުލޫމާތު ދެއްވަމުން ޒުހައިރު ވިދާޅުވީ، ސަރުކާރު ބަލިކޮށް ހިތަދޫ އުތުރު ދާއިރާގެ ބައި އިލެކްޝަން ކާމިޔާބުކުރި ސޯބެ އަކީ އޭނާ ގެ އެއްބަނޑު އެއްބަފާ ކޮއްކޮގެ ފިރިމީހާ ކަމަށެވެ. ސޯބެ ވާދަކުރަން ނިންމުމާއެކު، އެ ކެމްޕެއިންގައި މަސައްކަތް ކުރައްވާނެ ކަން އަންގަން ޖެހޭ ފަރާތްތަކަށް އަންގާފައިވާ ކަމަށް ވެސް އޭނާ ވިދާޅުވި އެވެ.
ޒުހައިރު ވިދާޅުވީ، އޭރުއްސުރެ އޭނާ ވަޒީފާއިން ވަކިކުރުމުގެ މަސައްކަތް ސަރުކާރުން ފަށާފައިވާ ކަމަށެވެ. ނަމަވެސް އުސޫލުގެ ތެރެއިން ވަޒީފާއިން ވަކިކުރެވޭނެ އެއްވެސް ގޮތެއް ނުފެނުމުން މަގާމު އުވާލީ ކަމަށް އޭނާ ވިދާޅުވި އެވެ.
މިކަމާ ގުޅިގެން އެކްސް ގައި ހިއްސާކުރެއްވި ޕޯސްޓެއްގައި ފައްޔާޒު ވިދާޅުވީ އިންތިހާބަކުން ބަލިވުމުން ބަދަލު ހިފާނީ ތާއީދު ގެއްލި ގޮތް ހުސްވުމުން ކަމަށެވެ.
އޭގެ އިތުރުން ވެމްކޯއިން މުވައްޒަފުންނަށް ޕެންޝަން ފައިސާ ޖަމާނުކުރާތާ 19 މަސްވެފައިވާ މައްސަލައިގައި ގދ. ތިނަދޫގެ ވެމްކޯ ބްރާންޗުގައި މަސައްކަތްކުރާ މުވައްޒަފުންތަކެއް މުޒާހަރާ ކުރުމުން އެ މީހުން ވަޒީފާއިން ވަކި ކޮށް ފައިވާއިރު ފައްޔާޒު ވަނީ އެކަމަށް ވެސް ފާޑުވިދާޅުވެ ކަންބޮޑުވުން ވެސް ފާޅުކުރައްވާފަ އެވެ.
ފައްޔާޒު ވިދާޅުވީ ވެމްކޯއިން ޕެންޝަން ފައިސާ ޖަމާނުކުރާތީ ހައްގުުތައް ހޯދުމަށް އަޑުއުފުލި ދެ މުވައްޒަފަކު ވެސް ވަނީ މި އަނިޔާވެރި ސަރުކާރުން އަންގައިގެން ވަޒީފާއިން ކަނޑާލާފައި ކަމަށާ ދައުލަތުގެ ކުންފުނިތައް ރައީސް މުއިއްޒުގެ ސިޔާސީ ޖަގަހަތަކެއްގެ ގޮތުގައި ބޭނުންކޮށް އާއިލާތަކެއް ނިކަމެތި ކޮށްގެން ތާއީދު އިތުރުވާނެ ކަމަށް ދެކިގެން ނުވާނެ ކަމަށެވެ. އަދި ބޭއިންސާފުގެ ކުރިމަތީގައި ފަސްނުޖެހި އެމްޑީޕީ އިން މި ސަރުކާރު ބަލިކުރާނެ ކަމަށް ވެސް ފައްޔާޒު ވިދާޅުވި އެވެ.
އޭޕްރީލް 4 ގައި އޮތް ތިން އިންތިޚާބާ ދިމާކޮށް ސަރުކާރަށް ތާއީދު ހޯދުމަށްޓަކައި ގިނަ ބަޔަކަށް ވަޒީފާތައް ދިން ކަމަށް އިދިކޮޅުން ތުހުމަތު ކޮށްފައިވާއިރު އިންތިޚާބަށް ފަހު ގިނަ ބަޔަކު ވަޒީފާތަކުން ކަނޑަމުންދާ މައްސަލަތަކެއް ދަނީ ތަކުރާރުކޮށް ފެންމަތިވަމުންނެވެ.
