ކުނިއުކާ ލޮރީތަކުން މަގުމައްޗަށް ހަޑި ފެނާއި، ކުނި ފޭބުން އާންމުވި ނަމަވެސް އެފަދަ ޝަކުވާއެއް ލިބިފައިނުވޭ: ވެމްކޯ
މާލޭގެ މަގުތަކުން ކުނި ނެގުމުގެ ތެރޭގައި ވެމްކޯގެ ލޮރީތަކުން ކުންޏާއި ހަޑިފެން އެޅި، މަގުތައް ތަޣައްޔަރުވަމުންދާތީ އާންމުންގެ ޝަކުވާ ވަނީ ބޮޑުވެފައި. ޚާއްސަކޮށް ސްކޫލްތައް ހުންނަ ސަރަހައްދުތަކުގައި މިފަދަ ނަޖިސް ފެން ހުރުމުގެ ސަބަބުން ބަލިމަޑުކަމެއް ފެތުރިދާނެކަމުގެ ބިރު އޮތްކަން ފާހަގަކޮށް ގިނަ ބަޔަކު ދަނީ ކަންބޮޑުވުން ފާޅުކުރަމުން.
ވެމްކޯގެ މުވައްޒަފުން މާލޭގެ މަގުމަތިން ކުނި ނެގުމުގެ މަސައްކަތް ކުރަނީ. | ރާއްޖެއެމްވީ
ވޭސްޓް މެނޭޖްމެންޓް ކޯޕަރޭޝަން (ވެމްކޯ) ގެ ކުނި ލޮރީތަކުން މާލޭގެ މަގުތަކަށް ކުންޏާއި، ހަޑި ފެން އެޅުނު ނަމަވެސް އެސަރަހައްދުތައް ސާފުނުކޮށްދާ މައްސަލަ ބޮޑުވެއްޖެ އެވެ.
ފީއަކާ އެކު މާލޭ ސިޓީގެ ގޭބިސީތަކުން ކުނި ނެގުމުގެ މަސައްކަތްތައް ކުރަމުންދަނީ ވެމްކޯއިން ނެވެ. އަދި މަގުތަކުގައި ބަހައްޓާފައި ހުންނަ ޑަސްބިންތަކުން ވެސް ކުނި ނެގުމުގެ މަސައްކަތް ކުރެ އެވެ. ނަމަވެސް މިފަހުން މާލޭގެ ބައެއް ސަރަހައްދުތަކުން ކުނި ނަގާއިރު، މަގުމައްޗަށް ކުނިތައް އެޅުމާއި، ހަޑިފެން މަގު މައްޗަށް އަޅާ މައްސަލަ ބޮޑުވެފައިވެ އެވެ.
އެގޮތުން މިފަހުން ފަލާހު ޕްރިސްކޫލު ކުރި މައްޗަށް އޮންނަ މަގު މައްޗަށް ކުންޏާއި، ނަޖިސް ފެން އަޅާފައިވާތީ ގިނަ ބަޔަކުގެ އެކަމުގެ ޝަކުވާ ކޮށްފައިވެ އެވެ. އަދި އެ ވީޑީއޯތައް ސޯޝަލް މީޑީއާގައި ހިއްސާކޮށްފައިވެ އެވެ.
ރާއްޖެއެމްވީއަށް މައުލޫމާތު ދިން ބައެއް މީހުން ބުނީ، ވެމްކޯ ލޮރީތަކަށް ކުނި ނެގުމުގެ މަސައްކަތް ކުރަމުންދަނީ ވަރަށް ފަރުވާ ކުޑަ ކޮށް ކަމަށެވެ. ބައެއް ފަހަރު ޑަސްބިންތަކުގައި ހުންނަ ކުނި މަގު މައްޗަށް އެޅުނު ނަމަވެސް އެކުނިތައް ސާފުވާ ގޮތަށް ނުނަގާ ކަމަށާއި، ހަޑި ފެންތަކެއް އެޅުމަށްފަހު ސާފުނުކޮށް ދާ ކަމަށެވެ. އަދި މިދުވަސްވަރު ރޯގާ އެހައި ބޮޑަށް ފަތުރެމުންދާތީ ވަރަށް ކަންބޮޑުވާ ކަމަށާއި، މިކަމުގެ ސަބަބުން ވަރަށް ބޮޑަށް ހުމާއި ރޯގާ ފަދަ ބަލިތައް ވަރަށް ބޮޑަށް ފެތުރިދާނެ ކަމުގެ ބިރު އެބައޮތް ކަމަށް އެމީހުން ބުނެ އެވެ.
އެއްވެސް ވަރަކަށް ސާފުތާހިރު ކަމަކަށް ނުބަލާކަން ފާހަގަކޮށް އެމީހުން ބުނީ، ފަލާހު ޕްރިސްކޫލު ހުންނަ ސަރަހައްދަކީ ކާރުބާރު ބޮޑު ސަރަހައްދަކަށްވާއިރު، ގިނަ އަދަދެއްގެ ކުދިންނާއި، ބެލެނިވެރިންނަށް މިކަމުގެ ސަބަބުން ތަކުލީފު އުފުލަން ޖެހިފައިވާ ކަމަށެވެ.
މި މައްސަލައާ ގުޅިގެން ހޯމަ ދުވަހު ފަށާއިރު ޕްރޮގްރާމްގެ ތެރެއިން ވެމްކޯއަށް ގުޅުމުން ބުނީ، މިފަދަ ޝަކުވާ މިހާތަނަށް ލިބިފައިވާކަން އެނގިފައިނުވާ ކަމަށެވެ.
ވެމްކޯއިން ބުނީ، މިފަދަ ކަމެއް ހިނގާނަމަ، އެ މައްސަލައެއް ބެލުމަށްފަހު ހައްލު ކުރާނެ ކަމަށެވެ.
