ތިން މީހެއްގެ ގަޔަށް ކުނި ލޭ އެޅުނު މައްސަލައިގައި މުވައްޒަފަކު ސަސްޕެންޑްކޮށްފި
މޯލްޑިވިއަން ބްލަޑް ސާވިސަސް (އެމްބީއެސް) ގެ ފްރީޒަރަކަށް ދިމާވި ފަންނީ މައްސަލައަކާ ގުޅިގެން، ރައްކާތެރިކަން ކަށަވަރުނުކޮށް ތިން ބަލިމީހަކަށް ލޭ އެޅި މައްސަލައެއް ފެންމަތިވެއްޖެ މި ހާދިސާގައި އިހުމާލުވި މުވައްޒަފަކު ސަސްޕެންޑްކޮށް މައްސަލަ ތަހުގީގު ކުރަމުންދާއިރު، އެ ލެޔަކީ ބޭނުންކުރަން ރައްކާތެރި ލޭކަމުގެ ޔަގީންކަން އެ އިދާރާއިން ވަނީ ދީފަ. އަދި މިފަދަ ކަންކަން ތަކުރާރުވިޔަ ނުދިނުމަށްޓަކައި ލޭ ރައްކާކުރާ އައު ފްރިޖްތައް ހޯދުމުގެ މަސައްކަތް މިހާރު ދަނީ ކުރަމުން.
ރިސާޗް ސެންޓަރެއްގައި ސައިންޓިސްޓަކު ސްޓެމް ސެލް ވަކި ކުރުމަށް ލޭގެ ސާމްޕަލް އެއް ޕްރޮސެސް ކުރަނީ. | ދި ނެޝަނަލް
މޯލްޑިވިއަން ބްލަޑް ސާވިސަސްގައި ފުރިޖު ހަލާކުވެގެން ބަދަލުކުރި ލޭ ޕެކެޓްތައް އަލުން ޓެސްޓު ނުކޮށް ބަލިމީހުންނަށް އެޅުމުގެ މައްސަލައެއް ފެންމަތިވެ، އެކަމުގައި އިހުމާލުވި ކަމަށް ތުހުމަތުކުރެވޭ މުވައްޒަފަކު ވަޒީފާ އިން ސަސްޕެންޑްކޮށްފި އެވެ.
މި މައްސަލައާ ގުޅިގެން މާލެ ސިޓީ ގްރޫޕް އޮފް ހޮސްޕިޓަލްސްގެ ފަރާތުން ތަހުގީގު ޓީމެއް އެކުލަވާލާފައިވާއިރު، ލޭ އެޅުމުގެ ކުރިން ފުރިހަމަކުރަންޖެހޭ އިޖުރާއަތްތަކުގައި އިހުމާލުވި މުވައްޒަފަކު މިމަހުގެ 23 ވަނަ ދުވަހުން ފެށިގެން ވަޒީފާއަށް ނުކުތުން މަނާކޮށްފައިވާ ކަމަށް މޯލްޑިވިއަން ބްލަޑް ސާވިސަސް (އެމްބީއެސް) އިން ބުނެފައިވެ އެވެ.
އެމްބީއެސް އިން ނެރުނު ބަޔާނެއްގައި ބުނެފައިވާ ގޮތުގައި މި މައްސަލަ ފެށުނީ މިމަހުގެ 91 ވަނަ ދުވަހުގެ ރޭ މަރުކަޒު ބަންދުކުރި ފަހުން ލޭ ރައްކާކުރާ ފްރީޒަރަކަށް ފަންނީ މައްސަލައެއް ދިމާވުމާ ގުޅިގެންނެވެ. މި މައްސަލަ ފާހަގަކުރެވުނީ އެރޭގެ 23:21 ހާއިރު ފިނިހޫނުމިން މޮނިޓާކުރާ އެލާމް ސިސްޓަމުން މެސެޖު ލިބުމާ ގުޅިގެން ކަމަށް އެ ބަޔާނުގައި ވެ އެވެ.
އެލާޓު ލިބުމާ އެކު އެމްބީއެސްގެ މުވައްޒަފުން ވަގުތުން މަރުކަޒަށް ހާޒިރުވެ، ފްރީޒަރުގައި ހުރި 12 ލޭ ޕެކެޓް ރައްކާތެރިކަމާއެކު އެހެން ފްރީޒަރަކަށް ބަދަލުކުރި ކަމަށް އެ އިދާރާ އިން ބުނެފައިވެ އެވެ. ފްރީޒަރުގެ ފިނިހޫނުމިން 11 ޑިގްރީ ސެލްސިއަސް އަށް މަތިވި ނަމަވެސް، ސިއްހީ މިންގަނޑުތަކަށް ބަލާއިރު 10 ޑިގްރީ ސެލްސިއަސް އަށް ވުރެ މަތިނުވާ ގޮތަށް 24 ގަޑިއިރު ވަންދެން ލޭ ރައްކާތެރިކަމާއެކު ބެހެއްޓޭނެ ކަމަށް އެމްބީއެސް އިން ބުނެފައިވެ އެވެ.
އެހެންކަމުން އެ ދުވަހު ބޭނުންކުރި ލެޔަކީ އެއްވެސް ގޮތަކަށް ތަގައްޔަރުވެފައިވާ ނުވަތަ ބޭނުންނުކުރެވޭ ފަދަ ލެޔެއް ނޫންކަމުގެ ފުރިހަމަ ޔަގީންކަން އެމްބީއެސް އިން ދީފައިވެ އެވެ. ނަމަވެސް މި ހާދިސާއާ ގުޅިގެން އިދާރީ ގޮތުން ބަލަންޖެހޭ ކަންކަން ބަލަމުން ދަނިކޮށް، ޖެހިގެން އައި ހޯމަ ދުވަހުގެ ހެނދުނު 9:30 ގައި އެ ލޭ ޕެކެޓްތަކުގެ ތެރެއިން ތިން ޕެކެޓެއް ތިން ބަލިމީހަކަށް އަޅާފައިވާކަން ފާހަގަކުރެވިފައިވާ ކަމަށް އެ އިދާރާ އިން ބުނެފައިވެ އެވެ.
މިކަން އެނގުމާ އެކު ކަމާބެހޭ މައުލޫމާތު ވަގުތުން އެ ފަރާތްތަކާ ހިއްސާކޮށްފައިވާ ކަމަށް ވެސް އެމްބީއެސްއި ން ބުނެފައިވެ އެވެ.
މި މައްސަލައާ ގުޅިގެން މޯލްޑިވިއަން ބްލަޑް ސާވިސްގެ ޑިރެކްޓާ ޖެނެރަލް އަހްމީމް ފާރިޝް ވިދާޅުވީ ލޭ ރައްކާކުރާ އައު ފްރިޖްތަކެއް ބޭރުން ގެނައުމުގެ މަސައްކަތް ކުރަމުންދާ ކަމަށެވެ. އަދި ވަގުތީ ގޮތުން އައްޑޫ ސިޓީ އިކުއެޓޯރިއަލް ހޮސްޕިޓަލުގައި ހުރި ފްރިޖެއް ވެސް ގެނައުމަށް މަސައްކަތް ކުރަމުންދާ ކަމަށް އޭނާ ވިދާޅުވި އެވެ.
