42 އަހަރު ވަންދެން ރަނގަޅު ޚިދުމަތެއް ކޮށްދިން ދަމަނަވެށި ބުރާސްފަތި ދުވަހު ބަންދު ކުރަނީ!
މާލޭގައި ހުންނަ ދަމަނަވެށި މި ހަފުތާގެ ބުރާސްފަތި ދުވަހު ބަންދުކުރުމަށް ނިންމައި، އެތަނުގެ މުވައްޒަފުން ވަގުތީގޮތުން އެހެން މަރުކަޒުތަކަށް ބަދަލުކުރުމަށް ވަނީ ހަމަޖެހިފައި. މި މަރާމާތަށްފަހު ޖުލައި 26 ގައި އެތަން އަލުން ހުޅުވުމަށް ހަމަޖެހިފައިވަނީ "އަރބަން ޕްރައިމަރީ ހެލްތް ކެއަރ ސެންޓަރު" ގެ ނަމުގައި. ދަމަނަވެށި ބަންދުކުރި ނަމަވެސް، އާންމުންނަށް ދެމުންދާ ސިއްހީ ޚިދުމަތްތަކަށް ބުރޫނާރާނެ ގޮތަށް އިންތިޒާމުތައް ހަމަޖެއްސުމަށް މުވައްޒަފުން އެދިފައިވޭ.
މާލޭގައި ހުންނަ ދަމަނަވެށި. ކުޑަކުދިންނާއި، ބޮޑެތި މީހުން ކޮންމެ ދުވަހަކު ވެސް މިތަނުން ޚިދުމަތް ހޯދާ. | ސޯޝަލް މީޑިއާ
42 އަހަރު ވަންދެން ރަނގަޅު ޚިދުމަތެއް ކޮށްދިން ދަމަނަވެށި ބުރާސްފަތި ދުވަހު ބަންދު ކުރަން ނިންމައިފި އެވެ.
އާދިއްތަ ދުވަހު މާލެ ސިޓީ ގްރޫޕް އޮފް ހޮސްޕިޓަލްސް، ހެލްތް މިނިސްޓްރީގެ އިސްބޭފުޅުން ވަނީ ދަމަނަވެށީގައި މަސައްކަތް ކުރާ މުވައްޒަފުންނާ ބައްދަލު ކުރައްވާފަ އެވެ. މި ބައްދަލު ކުރެއްވުމުގައި ދަމަނަވެށި ބަންދު ކުރުމާ ގުޅޭގޮތުން މަޝްވަރާ ކުރެއްވި އެވެ.
ރާއްޖެއެމްވީއަށް މައުލޫމާތު ދިން ދަމަނަވެށީގެ މުވައްޒަފަކު ބުނީ، މިއަންނަ ބުރާސްފަތި ދުވަހު ދަމަނަވެށި ބަންދު ކުރުމަށް ނިންމާފައިވާ ކަމަށާއި، މާރާމާތަށްފަހު ޖުލައި 26 ގައި އަރބަން ޕްރައިމަރީ ހެލްތް ކެއަރ ސެންޓަރުގެ ނަމުގައި ހުޅުވަން ނިންމާފައިވާ ކަމަށެވެ.
ބައެއް ކަންބޮޑުވުންތައް ހުރިކަން ފާހަގަކޮށް އޭނާ ބުނީ، ދަމަނަވެއްޓަކީ ޒަމާނުއްސުރެ ރައްޔިތުންނާ ސީދާ ގުޅޭ ސިއްހީ ޚިދުމަތްތައް ދެމުންދާ ކަމަށާއި، ވެކްސިންގެ ޚިދުމަތްތައް ވަރަށް ރަނގަޅަށް ދެމުން ގެންދާ ކަމަށެވެ. ވަރަށް ގިނަ ރައްޔިތުންގެ އިތުބާރާއި، ލޯބި ލިބިފައިވާއިރު، ކުރިއަށް އޮތީ ޕީކް ދުވަސްކޮޅެއް ކަމަށާއި، ހައްޖުގެ އަޅުކަމަށްފަހު ވަރަށް ގިނަ މީހުން ވެކްސިން ޖެހުމަށް އަންނާނެ ކަމަށެވެ.
މީގެ އިތުރުން މި ބައްދަލުވުމުގައި މުވައްޒަފުން ވަނީ މިހާރު ވެސް ކޮންމެ ދުވަހަކު އެތަނުން 100ށް ވުރެ މީހުން ޚިދުމަތް ހޯދާ ކަމަށާއި، ޚިދުމަަތްތަކަށް ބުރޫނާރާނެ ގޮތަށް އިންތިޒާމުތައް ހަމަޖައްސަން ޖެހޭނެ ކަމަށް ބުނެފަ އެވެ. އަދި އަލުން އަރބަން ޕްރައިމަރީ ހެލްތް ކެއަރ ސެންޓަރު ނަމުގައި ދަމަނަވެށި ހުޅުވާއިރު، އެ ޚިދުމަތްތައް ފުރިހަމައަށް ގާއިމް ވެފައި ހުންނަން ޖެހޭ ކަމަށް މުވައްޒަފުން ބުނެފައިވެ އެވެ.
ބުރާސްފަތި ދުވަހު ދަމަނަވެށި ބަންދުކުރާއިރު، މިތަނުގައި މަސައްކަތް ކުރާ މުވައްޒަފުން ބަދަލު ކުރަނީ ހުޅުމާލޭގައި ހުންނަ އަރބަން ޕްރައިމަރީ ހެލްތުކެއަރ ސެންޓަރާއި، މާލޭގެ މާފަންނުގައި ހުންނަ އަރބަން ޕްރައިމަރީ ހެލްތުކެއަރ ސެންޓަރަށެވެ. އަދި މަސައްކަތްތަކަށް ދަތިނުވާނެ ގޮތަށް އެމުވައްޒަފަކު ބޭނުންވާ ސެންޓަރެއްގައި މަސައްކަތް ކުރުމުގެ ފުރުސަތު ފަހި ކޮށްދޭނެ ކަމަށާއި، ދަމަނަވެށި އަލުން ހުޅުވުމަށްފަހު މުވައްޒަފުންނަށް މިތަނަށް ބަދަލުވެވޭނެ ކަމަށް މާލެ ސިޓީ ގްރޫޕް އޮފް ހޮސްޕިޓަލްސް އިން ބުނެފައިވެ އެވެ.
