އީރާންގެ ރައީސް ޕެޒެޝްކިއާން އިސްތިއުފާ ދެއްވި ކަމަށް ބުނާ ވާހަކަ ދޮގު ކޮށްފި

އީރާންގެ ރައީސް މަސްއޫދު ޕެޒެޝްކިއާން މަގާމުން އިސްތިއުފާ ދެއްވައިފި ކަމަށް ބުނެ ފެތުރެމުންދާ ޚަބަރުތައް އެ ގައުމުގެ ސަރުކާރުގެ އިސް އޮފިޝަލަކު އާދީއްތަ ދުވަހު ދޮގު ކުރައްވައިފި އެވެ.

އީރާންގެ ރައީސްގެ އޮފީހުގެ ޑެޕިއުޓީ ހެޑް އޮފް ކޮމިއުނިކޭޝަންސް މެހްދީ ތަބާތަބާއީ އެކްސްގައި ކުރެއްވި ޕޯސްޓެއްގައި ވިދާޅުވީ، ރައީސް އިސްތިއުފާ ދެއްވި ކަމަށް ބުނެ ފެތުރެމުންދާ ޚަބަރު ތަކަކީ ދޮގު ޚަބަރު ތަކެއް ކަމަށެވެ. އަދި މިއީ ބޭރުގެ ބައެއް މީޑިއާ ތަކުން ހިންގަމުންދާ "މީޑިއާ ގޭމްސް" ނުވަތަ ރޭވުންތެރި ކަންތައް ތަކެއްގެ ކުރިއަށް އޮތް ބައެއްގެ ގޮތުގައި އޭނާ ސިފަ ކުރެއްވި އެވެ.

ތަބާތަބާއީ އިތުރަށް ވިދާޅުވީ، އީރާންގެ ރައްޔިތުންނަށް ޚިދުމަތް ކުރެއްވުމުގައި ރައީސް ޕެޒެޝްކިއާން ފަހަތަށް ޖެހިވަޑައި ނުގަންނަވާނެ ކަމަށެވެ. އަދި އީރާން އިން ޤައުމީ އެއްބައިވަންތަ ކަމާއި އެކުވެރި ކަމުގެ މަގުން ފަހަތަށް ނުޖެހޭނެ ކަމަށް ވެސް އޭނާ ފާހަގަ ކުރެއްވި އެވެ.

އީރާންގެ ގައުމީ އެއްބައިވަންތަކަން ނަގާލުމަށް މަސައްކަތް ކުރާ ފަރާތް ތަކުގެ އެ އެދުންތައް އަނެއްކާ ވެސް "ކަށްވަޅަށް ގެންދަން ޖެހޭނެ" ކަމަށް ވިދާޅުވެ، ގައުމުގެ ތެރޭގައި ބައިބައިވުން އުފެދިފައިވާ ކަމަށް ދެކެވޭ ވާހަކަތައް އޭނާ ވަނީ ދޮގު ކުރައްވާފައި އެވެ.

މެދު އިރުމަތީގެ މަސްރަހު ނުތަނަވަސް ވެފައި ވަނީ މިދިޔަ ފެބްރުވަރީ މަހުގެ ފަހު ކޮޅު އެމެރިކާ އާއި އިޒްރޭލް އިން އީރާން އަށް ދިން ހަމަލާ ތަކާ ގުޅިގެންނެވެ. އޭގެ ރައްދުގައި އީރާން އިން ވަނީ އިޒްރޭލް އަށާއި، ގަލްފުގައި ހުރި އެމެރިކާގެ އަމާޒު ތަކަށް ހަމަލާ ތަކެއް ދީ، ހޮރްމޫޒް ކަނޑު އޮޅި ބަންދު ކޮށްފައި އެވެ.

ޕާކިސްތާނުގެ މެދުވެރިކަމާ އެކު އޭޕްރީލް މަހުގެ އަށް ވަނަ ދުވަހުން ފެށިގެން ހަމަލާ ބަދަލު ކުރުން ހުއްޓާލުމުގެ އެއްބަސްވުމަކަށް އަމަލު ކުރަން ފެށި ނަމަވެސް، އޭގެ ފަހުން ޕާކިސްތާނުގައި ބޭއްވި މަޝްވަރާ ތަކުން ދާއިމީ ހައްލެއް ފެނިފައި ނުވެ އެވެ.

މިހާރު އެމެރިކާ އާއި އީރާން އިން ދަނީ ސީދާ މަޝްވަރާތައް އަލުން ފަށައި، ހަނގުރާމަ ނިމުމަކަށް ގެނައުމަށްޓަކައި އެކި ހުށަހެޅުންތައް ބަދަލު ކުރަމުންނެވެ.