އީރާން އާއެކު މަޝްވަރާތައް ނުހުއްޓި ކުރިއަށްދާ ކަމަށް ޓްރަމްޕް ވިދާޅުވެއްޖެ

އިޒްރޭލް އިން ލުބުނާންގެ އެތެރެ އަށް ސިފައިން ފޮނުވައި ހަމަލާތައް ވަރުގަދަ ކުރުމާ ގުޅިގެން، އެމެރިކާ އާއެކު ކުރިއަށް ގެންދާ ނުސީދާ މަޝްވަރާތައް މެދު ކަނޑާލާފައިވާ ކަމަށް އީރާން އިން ބުނި ނަމަވެސް، އެ މަޝްވަރާތައް އަދިވެސް ބާރު މިނެއްގައި ކުރިއަށްދާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ހޯމަ ދުވަހު ޓްރަމްޕްގެ ސޯޝަލް މީޑިއާ ޕްލެޓްފޯމް ކަމަށްވާ "ޓްރުތް ސޯޝަލް" ގައި ކުރެއްވި ޕޯސްޓެއްގައި ވިދާޅުވީ، އިސްލާމީ ޖުމްހޫރިއްޔާ އީރާން އާއެކު ކުރިއަށްދާ މަޝްވަރާތައް ވަރަށް ހަލުވި ދުވެއްޔެއްގައި ކުރިއަށްދާ ކަމަށެވެ. ޓްރަމްޕް މިހެން ވިދާޅުވީ، އިޒްރޭލް އިން ލުބުނާންގެ ދެކުނަށް އަރައި ގަތުމާ ގުޅިގެން އެމެރިކާ އާއެކު ބާއްވާ ނުސީދާ ވާހަކަތައް މެދު ކަނޑާލާފައިވާ ކަމަށް އީރާންގެ ސަރުކާރާ ގުޅުން އޮންނަ ތަސްނީމް ނިއުސް އެޖެންސީ އިން ރިޕޯޓު ކޮށްފައި ވަނިކޮށެވެ.

އީރާން އިން މަޝްވަރާތައް ހުއްޓާލި ކަމަށް ބުނާ ރިޕޯޓު ތަކާ ގުޅިގެން އެމެރިކާގެ ބައެއް މީޑިއާ ތަކަށް ދެއްވި ފޯނު އިންޓަވިއު ތަކުގައި ޓްރަމްޕް ވިދާޅުވީ، މަޝްވަރާތައް މެދު ކަނޑާލިކަން އީރާން އިން ރަސްމީކޮށް އަންގާފައި ނުވާ ކަމަށެވެ. އެންބީސީ ނިއުސް އަށް ދެއްވި އިންޓަވިއުއެއްގައި ޓްރަމްޕް ވިދާޅުވީ، އެފަދަ އެއްވެސް މައުލޫމާތެއް އީރާންގެ ފަރާތުން ލިބިފައި ނުވާ ކަމަށެވެ.

މީގެ އިތުރުން ޓްރަމްޕް ވިދާޅުވީ، ދެ ގައުމުގެ ދެމެދުގައި ވާހަކަ ނުދެކެވި އޮތުމަކީ އޭނާގެ މައްސަލައެއް ނޫން ކަމަށާއި، އެކަމަށް އިންތިޒާރު ކުރަން ތައްޔާރަށް ހުންނެވި ކަމަށެވެ. އަދި ހަގީގަތަށް ބުނާ ނަމަ، މިހާތަނަށް ދެ ގައުމުގެ ދެމެދުގައި މާ ގިނައިން ވާހަކަ ދެކެވިއްޖެ ކަމަށް ގަބޫލު ކުރައްވާ ކަމަށާއި، ދުވަސް ކޮޅަކަށް މަޑުން ތިބުމަކީ ވެސް ރަނގަޅު ގޮތެއް ކަމަށް ޓްރަމްޕް ފާހަގަ ކުރެއްވި އެވެ.

މަޝްވަރާތައް މެދު ކަނޑާލުމަކީ އެމެރިކާ އިން އީރާން އަށް ބޮން އަޅަން ފަށާނެ ސަބަބެއް ނޫން ކަމަށް ވެސް ޓްރަމްޕް ވިދާޅުވި އެވެ. ނަމަވެސް، އީރާންގެ ބަނދަރުތައް ބަންދު ކޮށްގެން އެމެރިކާ އިން ހިންގާ ބްލޮކޭޑް ނުވަތަ ހުރަސް އެޅުމުގެ ސިޔާސަތު އެގޮތުގައި ދެމި އޮންނާނެ ކަމަށް އޭނާ ވިދާޅުވި އެވެ.

ސީއެންބީސީ އަށް ދެއްވި ވަކި އިންޓަވިއުއެއްގައި ޓްރަމްޕް ވިދާޅުވީ، މަޝްވަރާތައް ނިމުމަކަށް އައި ނަމަވެސް އޭނާގެ އެއްވެސް ފަރުވާލެއް ނެތް ކަމަށެވެ. ނަމަވެސް، މި އިންޓަވިއު ތަކަށް ފަހު ކުރެއްވި ސޯޝަލް މީޑިއާ ޕޯސްޓުގައި އޭނާ ވަނީ މަޝްވަރާތައް މެދު ނުކެނޑި ކުރިއަށްދާ ކަމަށް ވިދާޅުވެ، ކުރިން ދެއްކެވި ވާހަކަ ތަކަށް ބާރު ދެއްވާފައި އެވެ. އީރާން އާއި އެމެރިކާގެ ދެ މެދުގައި އޮތް ނުތަނަވަސްކަން ބޮޑު ވެފައި މިވަނީ މެދު އިރުމަތީގެ މަސްރަހު ގޯސްވަމުންދާ ދަނޑިވަޅެއްގަ އެވެ.