އީރާން އާއެކު އަންނަ ހަފުތާގައި ބޮޑެތި ކުރިެރުން ތަކެއް ލިބޭނެ ކަމަށް އުންމީދު ކުރެވޭ: އެމެރިކާ
31 މެއި 2026 | އާދީއްތަ 05:00އެމެރިކާގެ އޮފިޝަލުން ވިދާޅުވި ގޮތުގައި، ރައީސް ޑޮނަލްޑް ޓްރަމްޕް ބޭނުންފުޅުވާ ކަންކަން އެއްބަސްވުމުގައި ހިމެނުމަށްޓަކައި އެމެރިކާ އޮތީ ކިތަންމެ ގިނަ ދުވަހަކު މަޑު ކުރަން ޖެހުނު ނަމަވެސް އެކަމަށް ތައްޔާރަށް. ޓްރަމްޕްގެ ސަރުކާރުން ބޭނުން ވަނީ އެމެރިކާގެ މަސްލަހަތުތައް ފުރިހަމަ އަށް ހިމެނޭ ވަރުގަދަ އެއްބަސްވުމެއް އެކުލަވާލުމަށް.
ހަފުތާ ބަންދަށް ފަހު އެމެރިކާގެ ރައީސް ޑޮނަލްޑް ޓްރަމްޕް ވައިޓް ހައުސް އަށް ވަޑައިގަންނަވާ މަންޒަރު. | ގެޓީ އިމޭޖަސް
އީރާން އާއެކު ކުރިއަށްދާ މަޝްވަރާ ތަކުގައި އަންނަ ހަފުތާގެ ކުރީކޮޅު ބޮޑެތި ކުރިއެރުން ތަކެއް ލިބޭނެ ކަމަށް އުންމީދު ކުރާ ކަމަށް އެމެރިކާގެ ރިޔާސީ ގަނޑުވަރު، ވައިޓް ހައުސްގެ އިސް އޮފިޝަލުންނާ ހަވާލާދީ އެމެރިކާގެ މީޑިއާ ތަކުން ރިޕޯޓު ކޮށްފި އެވެ.
ނަމަވެސް މި އެއްބަސްވުމުގައި ސޮއި ކުރާނެ ވަކި ތާރީޚެއް އަދި ކަނޑަ އެޅިފައި ނުވާ ކަމަށް ވައިޓް ހައުސް އިން ވަނީ ހާމަ ކޮށްފަ އެވެ.
އެމެރިކާގެ އޮފިޝަލުން ވިދާޅުވި ގޮތުގައި، ރައީސް ޑޮނަލްޑް ޓްރަމްޕް ބޭނުންފުޅުވާ ކަންކަން އެއްބަސްވުމުގައި ހިމެނުމަށްޓަކައި އެމެރިކާ އޮތީ ކިތަންމެ ގިނަ ދުވަހަކު މަޑު ކުރަން ޖެހުނު ނަމަވެސް އެކަމަށް ތައްޔާރަށެވެ. ޓްރަމްޕްގެ ސަރުކާރުން ބޭނުން ވަނީ އެމެރިކާގެ މަސްލަހަތުތައް ފުރިހަމަ އަށް ހިމެނޭ ވަރުގަދަ އެއްބަސްވުމެއް އެކުލަވާލުމަށެވެ.
މި މައްސަލައާ ގުޅޭ ގޮތުން ވައިޓް ހައުސްގެ އޮފިޝަލުންނާ ހަވާލާދީ މީޑިއާ ތަކުން ބުނެފައި ވަނީ، އީރާން އާއެކު ކުރިއަށްދާ މަޝްވަރާ ތަކުގައި އެމެރިކާ އިން ދޫދޭން ބޭނުން ނުވާ ބައެއް މުހިންމު ކަންތައް ތަކެއް އެބަހުރި ކަމަށެވެ. އަދި އެ ކަންކަމަށް އީރާން އިން އެއްބަސްނުވާހާ ހިނދަކު، އެއްބަސްވުމުގައި ސޮއި ކުރުން ލަސް ވެގެން ދިއުމަކީ އެކަށީގެންވާ ކަމެއް ކަމަށް ވެސް އޮފިޝަލުން ފާހަގަ ކުރައްވަ އެވެ.
އެމެރިކާގެ މި ނިންމުމާ އެކު، ބައިނަލްއަގުވާމީ މައިދާނުގައި އީރާން އާއި އެމެރިކާގެ ގުޅުމަށް އަންނާނެ ބަދަލު ތަކަށް ގިނަ ބަޔަކު ދަނީ ފާރަވެރި ވަމުންނެވެ. ޚާއްޞަކޮށް އަންނަ ހަފުތާގައި މި މަޝްވަރާ ތަކުން ނުކުންނާނެ ނަތީޖާ އަކަށް ދުނިޔޭގެ ސިޔާސީ މަސްރަހު ދިރާސާ ކުރާ ފަރާތް ތަކުން އަންނަނީ އިންތިޒާރު ކުރަމުންނެވެ.
ޓްރަމްޕްގެ ސަރުކާރުން އަބަދުވެސް ބާރު އަޅަމުން ދަނީ އީރާންގެ ނިއުކްލިއާ މައްސަލަ އާއި އެހެނިހެން ސަރަހައްދީ މައްސަލަ ތަކުގައި އެމެރިކާ އަށް އެންމެ ފައިދާ ހުރި ގޮތަކަށް ކަންކަން ނިންމުމަށެވެ. އެހެންކަމުން، މިހާރު ކުރިއަށްދާ މަޝްވަރާ ތަކަކީ މި ސިޔާސަތުގެ ދަށުން ކުރިއަށްދާ މުހިންމު މަސައްކަތް ތަކެއް ކަމަށް ބެލެވެ އެވެ.
މަސްދަރު: އަލް ޖަޒީރާ
