އެމެރިކާގެ އެއާ ބޭސް އަކަށް އީރާން އިން ރައްދު ހަމަލާ ދީފި

އީރާންގެ ދެކުނުގެ ސަރަހައްދު ތަކަށް އަމާޒުކޮށް އެމެރިކާ އިން ދިން ހަމަލާ ތަކުގައި ބޭނުންކުރި އެއާ ބޭސް ނުވަތަ ވައިގެ ސިފައިންގެ މަރުކަޒަށް އަމާޒުކޮށް ވަރުގަދަ ހަމަލާ ތަކެއް ދީފައި ވާނެ ކަމަށް އީރާންގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ބުނެފި އެވެ.

މި ހަމަލާ އަކީ އެމެރިކާގެ އުދުވާން އަށް ރައްދު ދިނުމުގެ ގޮތުން ދިން ހަމަލާއެއް ކަމަށް އީރާން އިން ވަނީ ހާމަ ކޮށްފަ އެވެ.

އައިއާރުޖީސީ އިން ނެރުނު ބަޔާނެއްގައި ބުނެފައި ވަނީ، އެމެރިކާގެ އަސްކަރިއްޔާ އިން އީރާންގެ ދެކުނުގެ ސަރަހައްދު ތަކަށް ހަމަލާ ދިނުމަށް ބޭނުން ކުރި މަރުކަޒު ދެނެގަނެ، އެ ތަނަށް އަމާޒުކޮށް ކާމިޔާބު ހަމަލާ ތަކެއް ފޮނުވާލާފައިވާ ކަމަށެވެ. މި ހަމަލާގެ ސަބަބުން އެ މަރުކަޒަށް ލިބުނު ގެއްލުން ތަކުގެ ތަފްސީލު އައިއާރުޖީސީ އިން މިހާތަނަށް ހާމަ ކޮށްފައި ނުވެ އެވެ.

ނަމަވެސް މިއީ އީރާންގެ އިސްތިގުލާލް އަށް އުނިކަން އަންނަ ފަދަ ކޮންމެ އަމަލަކަށް ދޭނެ ރައްދެއްގެ ފެށުން ކަމަށް އެ އިދާރާ އިން ބުނެ އެވެ.

މި ހާދިސާއާ ގުޅިގެން މަސްރަހު ދިރާސާ ކުރާ ފަރާތް ތަކުން ބުނާ ގޮތުގައި، މިއީ މެދު އިރުމަތީގައި އެމެރިކާ އާއި އީރާންއާ ދެމެދު އޮތް ނުތަނަވަސްކަން އިތުރަށް ގޯސް ވެގެން ދާނެ ކަމެކެވެ. އީރާންގެ ދެކުނުގެ ސަރަހައްދު ތަކަށް އެމެރިކާ އިން ދިން ހަމަލާ ތަކަކީ ބައިނަލްއަގުވާމީ ގާނޫނު ތަކާ ޚިލާފަށް ދީފައިވާ ހަމަލާ ތަކެއް ކަމަށް ސިފަކޮށް، އީރާން އިން ވަނީ އެމެރިކާގެ މި އަމަލު ހަރުކަށި އިބާރާތުން ކުށްވެރި ކޮށްފައި އެވެ.

އެމެރިކާގެ އަސްކަރިއްޔާ އިން މިހާތަނަށް މި ހަމަލާއާ ގުޅޭ ގޮތުން ރަސްމީކޮށް އެއްޗެއް ބުނެފައި ނުވެ އެވެ. ނަމަވެސް އެ ސަރަހައްދުގައި ހުރި އެމެރިކާގެ މަރުކަޒު ތަކުގެ ސަލާމަތީ ކަންކަން ވަނީ ވަރުގަދަ ކޮށްފައި އެވެ. މީގެ ކުރިން ވެސް އީރާން ވަނީ އެމެރިކާގެ އަސްކަރީ މަރުކަޒު ތަކަށް އަމާޒުކޮށް މިސައިލް ހަމަލާ ތަކެއް ދީފައި އެވެ.

މި ފަހަކަށް އައިސް މެދު އިރުމަތީގެ މަސްރަހު ވަނީ ވަރަށް ބޮޑަށް ހޫނު ވެފައި އެވެ. ޚާއްސަކޮށް އެމެރިކާ އާއި އީރާންއާ ދެމެދު އޮތް ޒަމާންވީ ދެކޮޅުވެރިކަން އިތުރުވެ، ސަރަހައްދީ ހަމަޖެހުމަށް ވަނީ ބޮޑެތި ގޮންޖެހުން ތަކެއް ކުރިމަތި ވެފައި އެވެ. އީރާން އިން ބުނަމުން ދަނީ އެ ގައުމުގެ ދިފާއުގައި އަޅަން ޖެހުނު ކޮންމެ ފިޔަވަޅެއް އެޅުމަށް ފަސް ނުޖެހޭނެ ކަމަށެވެ.

މި ހަމަލާއާ ގުޅިގެން ބައިނަލްއަގުވާމީ މުޖުތަމައުން ދަނީ ކަންބޮޑުވުން ފާޅު ކުރަމުންނެވެ. ގިނަ ގައުމު ތަކަކުން ދަނީ ދެ ފަރާތުން ވެސް ކެތްތެރިކަން އިސްކުރުމަށާއި، މަސްރަހު އިތުރަށް ގޯސްވިޔަ ނުދިނުމަށް ގޮވާލަމުންނެވެ. ނަމަވެސް ދެ ގައުމުގެ ދެމެދުގައި އޮތް އަސްކަރީ ކުރިމަތިލުންތައް އިތުރު ވަމުން ދާތީ، މިއީ ބޮޑު ހަނގުރާމަ އަކަށް މަގުފަހި ވެދާނެ ކަމެއް ކަމަށް ބައެއް ފަރާތް ތަކުން ސިފަ ކުރެ އެވެ.