ނިއުކްލިއާ ވާހަަކަ އަކީ އެއްބަސްވުމުގެ ބައެއް، އީރާން އަށް އެކަން ކުރުމުގެ ފުރުސަތެއް ނޯންނާނެ: ޓްރަމްޕް
ޓްރަމްޕް ވިދާޅުވީ ނިއުކްލިއާ ކަންކަމަކީ އެ އެއްބަސްވުމުގެ މެދު ތެރޭގައި ހިމެނޭ މުހިންމު ބައެއް ކަމަށް. އޭނާ ވިދާޅުވީ، އެއަށް ފަހު އެ އެއްބަސްވުމުގައި ވަރަށް ވަރުގަދަ، އަދި ދިގު ތަފްސީލު ތަކަކާ އެކު ނިއުކްލިއާގެ ތަފާތު ކަންކަމުގެ ވާހަކަ ދައްކާފައިވާ ކަމަށް. ހަގީގަތުގައި އެ އެއްބަސްވުމުގެ ބޮޑު ބައެއް އޮތީ ވެސް އެކަމާ ބެހޭ ގޮތުން ކަމަށް އޭނާ ވިދާޅުވި.
އެމެރިކާގެ ރައީސް ޑޮނަލްޑް ޓްރަމްޕް. | ގެޓީ އިމޭޖަސް
އެމެރިކާ އާއި އީރާންއާ ދެމެދު އެކުލަވާލުމަށް މަސައްކަތް ކުރަމުން އަންނަ އެއްބަސްވުމުގައި، އީރާންގެ ނިއުކްލިއާ ޕްރޮގްރާމްގެ ވާހަކަ ހިމެނޭނެ ކަމަށާއި، އެއްބަސްވުމުގައި އީރާންގެ ނިއުކްލިއާ ޕްރޮގްރާމްގެ ވާހަކަ ނެތް ކަމަށް ބުނެ ސީއެންއެން އިން ހަދަނީ ދޮގު ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
ޓްރުތު ސޯޝަލްގައި ކުރެއްވި ޕޯސްޓެއްގައި ޓްރަމްޕް ވިދާޅުވީ، ދޮގު ޚަބަރު ފަތުރާ ސީއެންއެން އިން އާންމުކޮށް ބުނެފައި ވަނީ، އީރާން އާއެކު އޭނާ ޤާއިމު ކުރުމަށް މަސައްކަތް ކުރަމުން އަންނަ އެއްބަސްވުމުގައި އީރާންގެ ނިއުކްލިއާ ޕްރޮގްރާމްގެ ވާހަކަ ނެތް ކަމަށެވެ. ނަމަވެސް، ހަގީގަތަކީ އެ އެއްބަސްވުމުގައި ނިއުކްލިއާ ހަތިޔާރު އުފެއްދުމުގެ އެއްވެސް ފުރުސަތެއް އީރާން އަށް އޮވެގެން ނުވާނެ ކަމަށް ހިމަނާފައި ވާނެ ކަމަށް ޓްރަމްޕް ވިދާޅުވި އެވެ.
މީގެ އިތުރުން ޓްރަމްޕް ވިދާޅުވީ ނިއުކްލިއާ ކަންކަމަކީ އެ އެއްބަސްވުމުގެ މެދު ތެރޭގައި ހިމެނޭ މުހިންމު ބައެއް ކަމަށެވެ. އޭނާ ވިދާޅުވީ، އެއަށް ފަހު އެ އެއްބަސްވުމުގައި ވަރަށް ވަރުގަދަ، އަދި ދިގު ތަފްސީލު ތަކަކާ އެކު ނިއުކްލިއާގެ ތަފާތު ކަންކަމުގެ ވާހަކަ ދައްކާފައިވާ ކަމަށެވެ. ހަގީގަތުގައި އެ އެއްބަސްވުމުގެ ބޮޑު ބައެއް އޮތީ ވެސް އެކަމާ ބެހޭ ގޮތުން ކަމަށް އޭނާ ވިދާޅުވި އެވެ.
ޓްރަމްޕް އެ ޕޯސްޓުގައި ވަނީ ސީއެންއެން އަށް ވެސް ފާޑު ކިޔުން އަމާޒު ކޮށްފަ އެވެ. އެގޮތުން ސީއެންއެން ހިންގަމުން އަންނަ މީހުންގެ ބެލުމުގެ ދަށުން، އެ ނޫސް ރަނގަޅު ވެދާނެތޯ ޓްރަމްޕް ވަނީ ސުވާާލު އުފައްދަވައިފަ އެވެ.
ސީއެންއެން އިން ކޮށްފައިވަ ރިޕޯޓާ ގުޅިގެން ޓްރަމްޕް މިހެން ވިދާޅުވެފައިވާއިރު، އޭނާ އަކީ މީގެ ކުރިން ވެސް ސީއެންއެންއާ ވަރަށް ދެކޮޅު ބޭފުޅެކެވެ. ބައެއް ފަހަރު ޓްރަމްޕްގެ ނޫސްވެރިންގެ ބައްދަލުވުން ތަކުގައި ވެސް، އަދި އެހެން ތަންތަނުގައި ވެސް އޭނާ ވާހަކަ ދައްކަވާއިރު ސީއެންއެން އަށް ވަރަށް ބޮޑަށް ފާޑު ވިދާޅުވެ އެވެ.
އިރާން އާއެކު ވެވޭ އެއްބަސްވުމުގައި ނިއުކްލިއާ ހަތިޔާރު އުފެއްދުން ހުއްޓުވުމަކީ މުހިންމު ބައެއް ކަމަށާއި، އެކަމާ ބެހޭ ގޮތުން އެއްބަސްވުމުގައި ތަފްސީލީ ގޮތުން ބަޔާން ކޮށްފައިވާ ކަމަށް ޓްރަމްޕް ވިދާޅުވެފައިވާއިރު، މި އެއްބަސްވުމުގެ ތަފްސީލުތައް އަދި ފުރިހަމަ އަށް އާންމު ކޮށްފައި ނުވެ އެވެ.
މަސްދަރު: އަލް ޖަޒީރާ
