ސްޓޭޓް މިނިސްޓަރުންގެ މައުލޫމާތު ރައީސް އޮފީހުގެ ވެބްސައިޓުން އުނިކޮށްފި
ސަރުކާރުގެ ސިޔާސީ މަގާމުތަކުގެ މައުލޫމާތު ހާމަކުރުމަށް އާންމުން ގޮވާލަމުންދަނިކޮށް، ރައީސް އޮފީހުގެ ވެބްސައިޓުގައި ހުރި ސްޓޭޓް އަދި ޑެޕިއުޓީ މިނިސްޓަރުންގެ މައުލޫމާތުތައް މިހާރު ވަނީ އުނިކޮށްފަ. ސަރުކާރުގެ ހަރަދު ކުޑަކުރުމަށް ސިޔާސީ މަގާމުތައް މަދުކުރާނެ ކަމަށް ރައީސް ވިދާޅުވި ނަމަވެސް، މިފަދަ މައުލޫމާތުތައް ސިއްރުކުރާތީ ދެފުށް ފެންނަ މިންވަރާ މެދު އާންމުންގެ ފާޑުކިޔުން ވަނީ އަމާޒުވެފަ. މީގެ އިތުރުން، އާރްޓީއައި މެދުވެރިކޮށް ހޯދަން އެދޭ ސިޔާސީ މަގާމުތަކުގެ ތަފްސީލު ދިނުމަށް ވެސް ސަރުކާރުން ދަނީ ދެކޮޅު ހަދަމުން.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު | ރައީސް އޮފީސް
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުގެ މިނިސްޓްރީތަކުގެ ސްޓޭޓް މިނިސްޓަރުންނާއި ޑެޕިއުޓީ މިނިސްޓަރުންގެ މަގާމުތަކުގައި ތިއްބެވި ބޭފުޅުންގެ މައުލޫމާތު ރައީސުލްޖުމްހޫރިއްޔާގެ އޮފީހުގެ ރަސްމީ ވެބްސައިޓުން އުނިކޮށްފި އެވެ.
ރައީސް އޮފީހުގެ ވެބްސައިޓަށް މި ބަދަލު ގެނެސްފައި މިވަނީ، ސަރުކާރުގެ ސިޔާސީ މަގާމުތަކަށް މީގެފަހުން އައްޔަނުކުރާނީ ތައުލީމީ ގޮތުން ގާބިލު ބޭފުޅުން ކަމަށް ރައީސް މުއިއްޒު ދާދި ފަހުން އިއުލާނު ކުރައްވާފައިވާ ދަނޑިވަޅެއްގަ އެވެ.
މި ނިންމުމުގެ ކުރިން ރައީސް އޮފީހުގެ ވެބްސައިޓުގައި ބައެއް ސްޓޭޓް މިނިސްޓަރުންނާއި ޑެޕިއުޓީ މިނިސްޓަރުންގެ ފޮޓޯ އާއި ނަން ހިމަނާފައި ހުއްޓެވެ. ނަމަވެސް، އޭރުވެސް އެ ފެންވަރުގެ ހުރިހާ ސިޔާސީ މުވައްޒަފުންގެ މައުލޫމާތު ވެބްސައިޓުގައި ފުރިހަމައަށް ހިމަނާފަ އެއް ނުވެ އެވެ. މިހާރު ގެނައި ބަދަލާއެކު، އެ ފަންތީގެ އެއްވެސް ބޭފުޅެއްގެ މައުލޫމާތު ވެބްސައިޓުން ފެންނާކަށް ނެތެވެ.
މި ސަރުކާރު ވެރިކަމާ ހަވާލުވިފަހުން ސިޔާސީ މަގާމުތަކުގެ ސައްހަ މައުލޫމާތު ހިއްސާ ނުކޮށް ދަނީ ސިއްރު ކުރަމުންނެވެ. މައުލޫމާތު ހޯދާ ލިބިގަތުމުގެ ގާނޫނުގެ ދަށުން ރައީސް އޮފީހަށް ފޮނުވާ އާރްޓީއައި ތަކަށްވެސް ޖަވާބު ދިނުމަށް ދަނީ ދެކޮޅު ހަދަމުންނެވެ. މިކަމާ ގުޅިގެން މިހާރުވެސް ރައްޔިތުންގެ ފާޑުކިޔުންތައް ސަރުކާރަށް ވަނީ އަމާޒުވެފަ އެވެ.
ރައީސް މުއިއްޒު 2024 އޭޕްރީލް 20 ގައި ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ، ސަރުކާރުގެ މިނިސްޓްރީތަކަށް ސްޓޭޓް މިނިސްޓަރުންނާއި ޑެޕިއުޓީ މިނިސްޓަރުން އައްޔަނުކުރުމުގައި މީގެފަހުން ވަކި މިންގަނޑުތަކަކަށް ބައްލަވާނެ ކަމަށެވެ. މީގެ އިތުރުން، ސަރުކާރުގެ ހަރަދުތައް ކުޑަކުރުމުގެ ގޮތުން ސަރުކާރުގެ ސައިޒު ކުޑަކުރުމުގެ މަސައްކަތް ކުރިއަށްދާ ކަމަށް ވެސް ރައީސް ވިދާޅުވެފައިވެ އެވެ.
އެގޮތުން މަސައްކަތުގެ ފެންވަރަށް ބަލައި މުވައްޒަފުން މަދުކުރުމާއި، ސަރުކާރު ހިއްސާވާ ކުންފުނިތަކުގެ މުވައްޒަފުންގެ އަދަދު 33 އިންސައްތައަށް ކުޑަކުރުމުގެ މަސައްކަތް ކުރަމުންދާ ކަމަށް އެމަނިކުފާނު އޭރު ހާމަކުރެއްވި އެވެ. ނަމަވެސް އޭގެ ފަހުން ވެސް ފެނިގެންދަނީ އެކި އެކި ނަންނަމުގައި ސިޔާސީ މަގާމުތަކަށް މީހުން އައްޔަނުކުރަމުންދާ މަންޒަރެވެ.
ނިމިދިޔަ އިންތިހާބުތަކާ ދިމާކޮށް ވޯޓު ހޯދުމުގެ ބޭނުމުގައި ވެސް ސަރުކާރުން ވަނީ ގިނަ ފަރާތްތަކަށް ވަޒީފާ ދީފަ އެވެ. މިކަމަށް އެއްބަސްވެވަޑައިގަތުމަށްފަހު، ރައީސް މުއިއްޒު ވިދާޅުވީ ސިޔާސީ ބޭނުމަކަށް ނުވަތަ ކެމްޕެއިނަކާ ދިމާކޮށް ދެން އެއްވެސް މީހަކަށް ވަޒީފާ ނުދެއްވާނެ ކަމަށެވެ. ނަމަވެސް ގިނަ ސިޔާސީ މަގާމުތަކެއްގެ ތަފްސީލުތައް ރައީސް ވެބްސައިޓުން އުނިކުރުމަކީ ދެފުށް ފެންނަ ސިޔާސަތަކަށް ނުވާތީ ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ.
