ފިންލޭންޑުގެ ކުޅަދާނަ ޑައިވަރުންގެ ޓީމަކުން ފުން ކަނޑުގެ ހޮހޮޅައިގެ ތެރެއިން އިޓަލީގެ ޑައިވަރުންގެ ހަށިތައް ހޯދުމުގައި ތިން ގަޑިއިރު ހޭދަ ކުރި
ވ. އަތޮޅު ހޮހަޅައަށް ގެއްލުނު އިޓަލީގެ ހަތަރު ފީނުންތެރިން ހޯދުމަށް ފިންލޭންޑުގެ މާހިރުންގެ ޓީމަކުން ކުރި މަސައްކަތުން، އެ މީހުންގެ ހަށިގަނޑުތައް ހޮހަޅައިގެ އެންމެ ފުން ސަރަހައްދުން މިއަދު ވަނީ ފެނިފައެވެ. މި އޮޕަރޭޝަން ކުރިއަށް ގެންގޮސްފައިވަނީ އެމްއެންޑީއެފްގެ ޑައިވަރަކު ނިޔާވުމާ ގުޅިގެން މެދުކަނޑާލާފައި އޮތް މަސައްކަތް، ބައިނަލްއަގުވާމީ ތަޖުރިބާކާރުންގެ އެހީގައި އަލުން ފަށައިގެންނެވެ. ހަށިގަނޑުތައް ނެގުމުގެ ނާޒުކު މަރުހަލާ ކުރިއަށް އޮތް ދުވަސްތަކުގައި ކުރިއަށް ގެންދިއުމަށް މިހާރު ދަނީ ރާވަމުންނެވެ.
ފިންލޭންޑުގެ ރިކަވަރީ ޑައިވަރެއް ކަމަށްވާ ސާމީ ޕާކަރިނެން. | ޑޭން ޔޫރަޕް
ވޭތުވެދިޔަ ހަތަރު ދުވަހު ވ. އަތޮޅު އަލިމަތާ ކައިރީގައިވާ "ދެކުނު ކަނޑު" ހޮހަޅައިގެ ތެރެއަށް ގެއްލިގެން ހޯދަމުންދިޔަ އިޓަލީގެ ހަތަރު މީހުންގެ ހަށިގަނޑު، އެ ހޮހަޅައިގެ ވަރަށް ފުނުން ފިންލޭންޑްގެ ކުޅަދާނަ ޑައިވަރުންގެ ޓީމަކުން ހޯދައިފި އެވެ.
ފިންލޭންޑުގެ ރީބްރީދަރ ޑައިވަރުންގެ ޓީމަކުން ހޯމަ ދުވަހު ހެނދުނު 8:30 ހާއިރު ފެށި މި ނުރައްކާތެރި އޮޕަރޭޝަންގައި، ހޮހަޅައިގެ އެންމެ ފުން ސަރަހައްދުތަކަށް ވަދެ ތިން ގަޑިއިރެއްހާއިރު ހޭދަކޮށްފައިވެއެވެ. ފިންލޭންޑުގެ މި ތިން ޑައިވަރުން ވ. އަތޮޅަށް އައީ އާދިއްތަ ދުވަހު (17 މޭ) ގައެވެ. އަދި ހޯމަ ދުވަހު ހެނދުނު ފެށި ޑައިވްއަށް ބޭނުންވާ ތައްޔާރީތައް އެމީހުން ވަނީ އާދިއްތަ ދުވަހު ފުރިހަމަކޮށްފައެވެ.
ފިންލޭންޑުގެ ޑައިވް ޓީމު ރާއްޖެ ފޮނުވި ޑޭން ޔޫރަޕުން (DAN Europe) ބުނި ގޮތުގައި، ހޯމަ ދުވަހު ކުރިއަށް ގެންދިޔަ ފުރަތަމަ އޮޕަރޭޝަންގައި، ކަނޑުއަޑީގެ އެ ހޮހަޅައިގެ ނިޒާމު ބަލައި ފާސްކޮށް، އެތަނުގެ ތިމާވެށީގެ ހާލަތާއި އޮޕަރޭޝަން ކުރިއަށް ގެންދެވޭނެ ގޮތްތައް ވަނީ ދިރާސާކޮށްފައެވެ. އަދި މިހާތަނަށް ނުފެނި ތިބި ހަތަރު މީހުންގެ ހަށިގަނޑު އޮތް ތަން ދެނެގަނެ، ހަށިގަނޑުތައް ނެގުމުގެ މަސައްކަތުގެ ދެން އޮތް މަރުހަލާތައް ރޭވުމަށް ބޭނުންވާ މުހިންމު މައުލޫމާތުތައް ވެސް ވަނީ އެއްކޮށްފައެވެ.
މި ހޯދުމުގެ މަސައްކަތް އަލުން ފަށާފައި މިވަނީ، މޭ މަހުގެ 15 ވަނަ ދުވަހު އެމްއެންޑީއެފްގެ ޑައިވަރު ސާޖަންޓް މޭޖަރ މުހައްމަދު މަހުދީ، ޑިކޮމްޕްރެޝަން ސިކްނެސް (ޑީކޯ) ގެ ސަބަބުން ނިޔާވުމާ ގުޅިގެން މެދުކަނޑާލާފައި އޮތުމަށްފަހުއެވެ.
ފިންލޭންޑުގެ ޑައިވަރުން ކަމަށްވާ ސާމީ ޕާކަރިނެން، ޖެނީ ވެސްޓަރލަންޑް އަދި ޕެޓްރިކް ގްރޮންކްވިސްޓް މި ޑައިވް ޕްލޭން އެކުލަވާލާފައިވަނީ އެމްއެންޑީއެފް އާއި މާލޭގައި ތިބި އިޓަލީގެ ކަމާބެހޭ ފަރާތްތަކާ ގުޅިގެންނެވެ. މި ޓީމުން ބޭނުންކޮށްފައިވަނީ ކްލޯޒްޑް-ސާކިޓް ރީބްރީދަރތަކާއި، ބާރުގަދަ ޑީޕީވީތަކުގެ އިތުރުން، ފުރާނައަށް ނުރައްކާނުވާނެ ފަދަ އެންމެ މަތީ ފެންވަރުގެ ރައްކާތެރިކަމުގެ ވަސީލަތްތަކެވެ. ޑޭން ޔޫރަޕުން ސިފަކުރި ގޮތުގައި މި މަސައްކަތް ކުރިއަށް ގެންގޮސްފައިވަނީ އޮޕަރޭޝަނަލް ސަލާމަތީ މިންގަނޑުތައް އިންތިހާއަށް މަތީ ދަރަޖައަކަށް ހިފަހައްޓައިގެންނެވެ.
"ކުރިއަށް އޮތް ދުވަސްތަކުގައި ކުރިއަށްދާނީ ހަށިގަނޑުތައް ނެގުމުގެ ނާޒުކު މަރުހަލާތައް،" ޑޭން ޔޫރަޕުން ހާމަކޮށްފައިވެއެވެ.
ހޯމަ ދުވަހު ހަށިގަނޑުތައް ފެނުނު ހަތަރު މީހުންނަކީ ޕްރޮފެސަރ މޮނިކާ މޮންޓެފަލްކޯން އާއި، އޭނާގެ ދަރިފުޅު ޖިއޯޖިއާ ސޮމަކަލް އާއި، ރިސާޗް އެސިސްޓަންޓް މުރިއަލް އޮޑެނީނޯ އަދި ގްރެޖުއޭޓް ފެޑެރިކޯ ގުއަލްޓިއޭރީއެވެ. މި ގްރޫޕް ގެއްލުނު ދުވަހު، ސަފާރީގެ އޮޕަރޭޝަންސް މެނޭޖަރ އަދި ޑައިވިންގ އިންސްޓްރަކްޓަރ ޖިއަންލޫކާ ބެނެޑެޓީގެ ހަށިގަނޑު ވަނީ ހޮހަޅައިގެ ދޮރުމަތިން ފެނިފައެވެ.
ހޮހަޅައިގެ ތެރެއިން މި ހަތަރު ހަށިގަނޑު ފެނުނު ސީދާ ތަނާއި، ފެނުނު ފުންމިނާއި، ހަށިގަނޑުތައް ހުރި ތަންތަނާއި، އަދި ކެމެރާ ނުވަތަ ޑައިވް ކޮމްޕިއުޓަރު ފަދަ ތަކެތި ފެނުނު ކަމެއް އަދި ހާމަކޮށްފައެއް ނުވެއެވެ. މޮންޓެފަލްކޯންގެ ފިރިމީހާ ބުނި ގޮތުގައި، ހާދިސާގައި މަރުވި އޭނާގެ އަނބިމީހާ ޑައިވިންގައި އަބަދުވެސް ގޯޕްރޯ ކެމެރާއެއް ގެންގުޅެއެވެ. މީގެކުރިން އެމްއެންޑީއެފްގެ ޑައިވަރުން ކުރި މަސައްކަތުން ދެވުނީ 55 އާއި 65 މީޓަރުގެ ފުން މި ހޮހަޅައިގެ ތިން ބައިގެ ތެރެއިން ދެވަނަ ބަޔާ ހަމައަށެވެ. އެހެންކަމުން، ފިންލޭންޑުގެ ޓީމަށް ހަށިގަނޑުތައް ފެނިފައިވަނީ ހޮހަޅައިގެ އެންމެ އެތެރޭގައިވާ ތިންވަނަ ބައިން ކަމަށް ބެލެވެއެވެ. ޑޭން ޔޫރަޕުން ބުނީ މިފަދަ ނުރައްކާތެރި ހާލަތްތަކުގައި މީހުން ސަލާމަތްކުރުމާއި ހަށިގަނޑުތައް ނެގުމުގެ ތަޖުރިބާހުރި މާހިރުން ހޯދާފައިވާނެ ކަމަށެވެ. އަދި މި ޓީމުން ވަނީ ވަރަށް ކުރު ނޯޓިސްއެއްގައި ރާއްޖެ އައިސް، ނުރައްކާތެރި މި އޮޕަރޭޝަންގައި ބައިވެރިވެފައެވެ.
ޕާކަރިނެން އާއި ވެސްޓަރލަންޑަކީ 2014 ވަނަ އަހަރު ނޯވޭގެ ޕްލޫރާ ހޮހަޅައިގައި ހިނގި ހާދިސާއާ ގުޅިގެން ތައްޔާރުކުރި "ޑައިވިންގ އިންޓު ދަ އަންނޯން" ފިލްމުގައި ހިމެނޭ މަޝްހޫރު މިޝަންގައި ބައިވެރިވި ދެމީހުންނެވެ. މީގެ އިތުރުން 2014 ވަނަ އަހަރު މެކްސިކޯގެ ހޮހަޅައަކުން ހަށިގަނޑު ނެގުމުގެ މުހިންމު އޮޕަރޭޝަނެއްގައި ވެސް އެމީހުން ބައިވެރިވިއެވެ. ގްރޮންކްވިސްޓަކީ ވެސް ނޯވޭގެ ޕްލޫރާ ހޮހަޅައިގެ މިޝަންގައި ބައިވެރިވި މީހެކެވެ.
"މިއަދުގެ މި ނަތީޖާއަކީ އާދަޔާ ހިލާފު ތައްޔާރީތަކާއި، ފަންނީ މޮޅުކަމާއި، އަދި ނަމޫނާ ޓީމުވޯކެއްގެ ނަތީޖާ،" ޑޭން ޔޫރަޕްގެ ސީއީއޯ ލައުރާ މަރޯނީ ވިދާޅުވިއެވެ.
