ސްޓާފް ސާޖެންޓް މަހުދީގެ ކަށު ނަމާދު މިރޭ 22:00 ގައި އިސްލާމީ މަރުކަޒުގައި
ވ. އަތޮޅުން ގެއްލުނު ޑައިވަރުން ހޯދުމުގެ އޮޕަރޭޝަނުގައި އުޅެނިކޮށް ހާލު ދެރަވެގެން ނިޔާވި އެމްއެންޑީއެފްގެ ސްޓާފް ސާޖަންޓް މުޙައްމަދު މަހުދީއަކީ މީގެ ކުރިންވެސް ގިނަ މިޝަންތަކެއްގައި ބައިވެރިވެފައިވާ ތަޖުރިބާކާރު ޑައިވަރެއް. އުމުރުން 43 އަހަރުގެ މަހުދީ ނިޔާވީ އޭޑީކޭ ހޮސްޕިޓަލުގައި ފަރުވާ ދެމުންދަނިކޮށް ކަމަށްވާއިރު، އޭނާގެ މޫނު ދުށުމަށް ގިނަ އަދަދެއްގެ ބަޔަކު ވަނީ އިސްލާމީ މަރުކަޒަށް ޒިޔާރަތްކޮށްފައި. މަހުދީގެ ކަށުނަމާދު ހޮނިހިރު ދުވަހުގެ ރޭ 10:00 ގައި އިސްލާމީ މަރުކަޒުގައި ބޭއްވުމަށް ވަނީ ހަމަޖެހިފައި.
ސްޓާފް ސާޖަންޓް މުޙައްމަދު މަހުދީ ގެ މޫނު ދެއްކުން އިސްލާމީ މަރުކަޒުގައި ކުރިއަށް ދަނީ. | ހުސެއިން ހަސަން
ވ. އަތޮޅުގައި ފީނަން ދިޔަ ޑައިވަރުންގެ ތެރެއިން ގެއްލުނު ހަތަރު ޑައިވަރުން ހޯދުމަށް، އެމްއެންޑީއެފުން ކުރިއަށްގެންދާ، ސާޗް އެންޑް ރެސްކިއު އޮޕަރޭޝަނުގައި ހަރަކާތްތެރިވަމުން ދަނިކޮށް ނިޔާވި ސްޓާފް ސާޖަންޓް މުޙައްމަދު މަހުދީގެ ކަށު ނަމާދު ހޮނިހިރުު ދުވަހުގެ ރޭ 10:00 ގައި އޮންނާނެ އެވެ.
މަހުދީ ނިޔާވީ، ހޮނިހިރު ދުވަހުގެ ޑައިވް އަށް ފަހު ހާލު ދެރަވެގެން، އޭޑީކޭ ހޮސްޕިޓަލަށް ގެންގޮސް ފަރުވާދެނިކޮށް ކަމަށް މައުލޫމާތު ލިބިފައިވެއެވެ.
އިތުބާރު ހުރި ގޮތެއްގައި މައުލޫމާތު ލިބިފައިވާ ގޮތުގައި ކުޅަދާނަ ޑައިވަރު ވަނީ އޭގެ ކުރީ ދުވަހުވެސް އެ ސަރަހައްދަށް ޑައިވް ކޮށްފަ އެވެ.
އުމުރުން 43 އަހަރުގެ މ. ޖަންބުގަސްދޮށުގޭ ސްޓާފް ސާޖަންޓް މުހައްމަދު މަހުދީ އަކީ މީގެ ކުރިންވެސް ރެސްކިއު މިޝަންތަކުގައި އެތައް ޑައިވް އެއް ކޮށްފައިވާ ކުޅަދާނަ، ހުނަރުވެރި ފަރާތެއް ކަމަށް މައުލޫމާތު ލިބިފައިވެއެވެ.
ސްޓާފް ސާޖަންޓް މަހުދީގެ މައްޗަށް ކުރެވޭ ކަށުނަމާދު އޮންނާނީ އިސްލާމީ މަރުކަޒުގަ އެވެ. މައްޔިތާ އަށް ޒިޔާރަތް ކުރުން ރޭގަނޑު 7:00 ގައި އިސްލާމީ މަރުކަޒުގައި ފެށިފައިވާއިރު ގިނަ އަދަދެއްގެ މީހުން ގެންދަނީ މަހުދީގެ މޫނު ދުށުމަށް ޒިޔާރަތް ކުރަމުންނެވެ.
