ބޮންޑައި ބީޗުގެ ހަމަލާއާ ގުޅިގެން، ސަލާމަތީ އިދާރާތައް ރިވިއު ކުރުމަށް ބޮޑު ވަޒީރު އަންގަވައިފި

ބޮންޑައި ބީޗުގައި ދިން ނުރައްކާތެރި ހަމަލާއާ ގުޅިގެން، ސާލަމާތީ ޚިދުމަތް ދެމުން އަންނަ އިދާރާތައް ރިވިއު ކުރުމަށް އޮސްޓްރޭލިއާ ގެ ބޮޑު ވަޒީރު އެންތަނީ އަލްބަނީސް އަމުރު ކުރައްވައިފި އެވެ.

ދާދި ފަހުން ބޮންޑައި ބީޗުގައި ދިން ނުރައްކާތެރި ހަމަލާގައި ވަނީ 15 މީހަކު މަރުވެފަ އެވެ. އޭގެ އިތުރުން އެތައް ބަޔަކަށް އެކި ވަރުގެ އަނިޔާތައް ލިބިފައިވާއިރު، މިއީ މި ފަހުން ދީފައިވާ މިފަދަ އެންމެ ނުރައްކާތެރި ހަމަލާ ކަމަށް ފާހަގަ ކޮށްފައިވެ އެވެ. ދެ ބަފައިން ގުޅިގެން ހަމަލާ ދީފައިވާއިރު، އެއީ އައިސިސް ޖަމާއަތާ ގުޅުން ހުރި ބައެއް ކަމަށް ވެސް ތުހުމަތު ކޮށްފައިވެ އެވެ. 

ބޮޑު ވަޒީރު އަލްބަނީސް ވިދާޅުވީ އޮސްޓްރޭލިއާގެ ރައްޔިތުން ސަލާމަތްކޮށް، ރައްކާތެރިކަމާ އެކު ބެލެހެއްޓުމަށް ފުލުހުންނާއި ސްޕައި ޚިދުމަތްތަކަށް ބޭނުންވާ ބާރުތަކާއި، ސްޓްރަކްޗާ އަދި މައުލޫމާތު ހިއްސާ ކުރުމުގެ އިންތިޒާމު ރަނގަޅަށް އޮތްތޯ ސަރުކާރުން ބަލާނެ ކަމަށެވެ. އަލްބަނީސް ވިދާޅުވީ މިދިޔަ ހަފުތާގެ ތެރޭގައި ދިން އެ ހަމަލާ އިން ހާމަވެފައި ވަނީ، ޤައުމުގެ ސަލާމަތީ ޙާލަތު ވަރަށް އަވަހަށް ބަދަލު ވަމުން އަންނަކަން ކަމަށެވެ. 

އެކަން ފާހަގަ ކުރައްވައި އަލްބަނީސް ވިދާޅުވީ، އޮސްޓްރޭލިއާގެ ސަލާމަތީ އިދާރާތައް އޮންނަން ޖެހޭނީ އެންމެ ރަނގަޅު ޙާލަތުގައި ކަމަށާއި، ރައްޔިތުންގެ ސަލާމަތާއި ރައްކާތެރިކަން ޔަގީން ކުރެވެން ޖެހޭނެ ކަމަށެވެ. އަލްބަނީސް މިހެން ވިދާޅުވެފައިވާއިރު، މިދިޔަ ހަފުތާގެ ތެރޭގައި އޭނާ ވިދާޅުވެފައި ވަނީ ނަފުރަތު އުފެއްދުމާއި، ރައްޔިތުންގެ މެދުގައި ބިރުވެރިކަން އުފައްދައި އަދި ހަރުކަށި ފިކުރަށް އެ ޤައުމުގައި ޖާގަ ނޯންނާނެ ކަަމަށާއި، އެކަމާ ދެކޮޅަށް ވަރުގަދަ ފިޔަވަޅު ތަކެއް އަޅުއްވާނެ ކަމަށެވެ. 

ހަމަލާ ދިން މީހުގެ ތެރޭގައި ހިމެނޭ އުމުރުން 50 އަހަރުގެ ސާޖިދު އަކްރަމް އަކީ، 1998 ވަނަ އަހަރު އޮސްޓްރޭލިއާ އަށް އައިސްފައިވާ މީހެއް ކަމަށް ހާމަ ކޮށްފައިވެ އެވެ. ހަމަލާ ދިން ވަގުތު، ފުލުހުން ވަނީ އޭނާ އަށް ހަމަލާ ދީ މަރާލައިފަ އެވެ. ދެން ހަމަލާގައި ބައިވެރިވެފައި ވަނީ އުމުރުން 24 އަހަރުގެ ނަވީދު އަކްރަމް އެވެ. އޭނާ މިވަގުތު އޮތީ ފުލުހުންގެ ބެލުމުގެ ދަށުން ހޮސްޕިޓަލްގަ އެވެ. އޭނާ ގެ  މައްޗަށް ކޮށްފައި ވަނީ ޓެރަރިޒަމްގެ ތުހުމަތު އަދި 15 މީހުން މަރާލި ކަމުގެ ތުހުމަތެވެ. 

ބޮންޑައި ބީޗުގައި ހަމަލާ ދިނުމުގެ ކުރިން، މި ދެ މީހުން ފިލިޕީންސް އަށް ދަތުރު ކޮށްފައިވާ ކަމަށާއި، އެ ޤައުމުގެ ހަތަރު ހަފުތާއެއްހާ މުއްދަތު ހޭދަ ކޮށްފައިވާ ކަމަށް ވަނީ ދެނެގަނެވިފަ އެވެ. އެއަށް ފަހު ދެ މީހުން އެނބުރި ސިޑްނީ އަށް އައިސްފައިވާއިރު، އޮސްޓްރޭލިއާ އާއި ފިލިޕީންސްގެ ކަމާ ގުޅުން ހުރި އިދާރާ ތަކުން އަންނަނީ އެކަން އިތުރަށް ބަލަމުންނެވެ. 

ހަމަލާ އަށް ފަހު އޮސްޓްރޭލިއާގެ ސަރުކާރަށް ވެސް ފާޑު ކިޔުންތައް އަމާޒު ވަމުން އަންނަ ވަގުތެއްގައި އަލްބަނީސް ވިދާޅުވެފައި ވަމީ، ހަމަލާގެ ފަހުން ޤައުމުގެ ސަލާމަތީ ޚިދުމަތާ ގުޅޭ މައްސަލަތައް ފާހަގަވާން ހުރި ކަމަށެވެ. އެގޮތުން ސިސްޓަމްތައް މަސައްކަތް ކުރާ ގޮތް ބަލަން ޖެހޭ ކަމަށް އަލްބަނީސް ވަނީ ވިދާޅުވެފަ އެވެ. ހަމަ އެހެންމެ މީގެ ކުރިން 2019 ވަނަ އަހަރު ވެސް ނަވީދުގެ ކަންކަން ބަލާފައިވާއިރު، އޭރު އެކަން ވަޒަން ކޮށްފައިވާ ގޮތް ބަލަން ޖެހޭ ކަމަށް ވެސް އަލްބަނީސް ވިދާޅުވި އެވެ.