އޮސްޓްރޭލިއާގައި ބަޑިން ހަމަލާ ދީ ތިން މީހަކު މަރާލައިފި

އޮސްޓްރޭލިއާގައި ބަޑިން ދިން ހަމަލާއެއްގައި ތިން މީހަކު މަރާލައި، އިތުރު މީހަކު ޒަޚަމު ކޮށްލައިފި އެވެ.

އޮސްޓްރޭލިއާގެ ނިއު ސައުތު ވޭލްސް ސްޓޭޓްގެ ފުލުހުން ބުނެފައިވާ ގޮތުގައި، މި ހާދިސާ ހިނގާފައި ވަނީ ބުރާސްފަތި ދުވަހު އެވެ. މި ހާދިސާގައި ތިން މީހަކު މަރުވެފައިވާއިރު، އިތުރު މީހަކު ވަނީ ޒަޚަމުވެފަ އެވެ. 

އާބާދީގައި ގާތް ގަނޑަކަށް 1500 މީހުން އުޅޭ ލޭކް ކާގެލިގޯ ނަމަކަށް ކިޔާ ޓައުންގައި ބަޑީގެ ހަމަލާއެއް ދިން ކަމުގެ ރިޕޯޓުތައް ލިބުމުން، އިމަޖެންސީ ޚިދުމަތްތައް އެ ސަރަހައްދަށް ގޮސްފައިވާ ކަމަށް ފުލުހުން ވަނީ ބުނެފަ އެވެ. 

މަރުވި ތިން މީހުންގެ ތެރޭގައި ހިމެނެނީ ދެ އަންހެނުންނާއި، ފިރިހެނެކެވެ. ހަމަލާގައި ޒަޚަމުތައް ލިބިފައިވީ ފިރިހެނަކަށް ކަމަށާއި، އޭނާގެ ޙާލު ސީރިއަސް ކަމަށް ބުނެފައިވެ އެވެ. އޭނާ އަށް މިހާރު އަންނަނީ ހޮސްޕިޓަލްގައި ފަރުވާ ދެމުން ކަމަށް ފުލުހުން ހާމަކޮށްފައިވެ އެވެ. 

ފުލުހުން ބުނެފައި ވަނީ ހަަމަލާ ދިން މީހުން އަދި ވެސް ހައްޔަރު ކުރެވިފައި ނުވާ ކަމަށާއި، އެ މީހުން މުޖުތަމައުގެ ތެރޭގައި އުޅުމުގެ ފުރުސަތު އޮތް ކަމަށެވެ. އެއާ އެކު ފުލުހުން ވަނީ އެ ސަރަައްދުގައި އުޅޭ ރައްޔިތުން އެ މީހުންގެ ސަލާމަތާއި، ރައްކާތެރި ކަމަށް އިސްކަން ދިނުމަށް އިލްތިމާސް ކޮށްފަ އެވެ. 

ލޭކް ކާގެލިގޯއަކީ ނިއު ސައުތު ވޭލްސްގެ މެދުތެރޭގައި އޮންނަ ކުޑަ ސަރަހައްދެކެވެ. އެއީ ވަރަށް ރައްކާތެރި އަދި ހަމަހިމޭން ސަރަހައްދެއް ކަމަަށް ބުނެފައިވާއިރު، އެ ސަރަހައްދުގައި މިފަދަ ކަންކަން ހިނގާލެއް މަދު ކަމަށް ވެސް ބުނެފައިވެ އެވެ. ފުލުހުން ވަނީ އެ ސަރަހައްދުގައި ސަލާމަތީ ފިޔަވަޅުތައް ވަރުގަދަ ކޮށްފަ އެވެ.