އެމެރިކާއާ ގާތް ގުޅުމެއް އޮންނަ ޖަޕާން އާއި އޮސްޓްރޭލިއާ އިން، ޓްރަމްޕްގެ ގޮވާލުމާ ދެކޮޅު ހަދައިފި

ހޮރުމޯޒް ކަނޑު އޮޅީގެ ސަލާމަތީ ކަންކަން ބެލެހެއްޓުމަށް ބައިނަލްއަޤުވާމީ ކޯލިޝަނެއް އެކުލަވާލުމަށް އެމެރިކާގެ ރައީސް ޑޮނަލްޑް ޓްރަމްޕް ގޮވާލައްވާފައިވާ ގޮވާލުމަށް، ޖަޕާން އާއި އޮސްޓްރޭލިއާ އިން ވެސް ދެކޮޅު ހަދައިފި އެވެ. 

ޖަޕާން އާއި އޮސްޓްރޭލިއާ އަކީ ވެސް އެމެރިކާއާ ގާތް ގުޅުމެއް ބާއްވާ ދެ ޤައުމެވެ. އެހެން ނަމަވެސް، ހޯމަ ދުވަހު އެ ދެ ޤައުމުން ވެސް ބުނެފައި ވަނީ މެދު އިރުމަތީގެ މުހިންމު ކަނޑުގެ ސަރަހައްދު ތަކުން ދަތުރު ކުރާ އުޅަނދު ފަހަރަށް ހިމާޔަތް ދިނުމަށް އަސްކަރީ މަނަވަރުތައް ފޮނުވުމުގެ އެއްވެސް ރޭވުމެއް ނެތް ކަމަށެވެ. 

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރަމުން އަންނަ ހަނގުރާމައިގެ ސަބަބުން، މެދު އިރުމަތީގެ މަސްރަހު ވަރަށް ބޮޑަށް ގޯސްވެ، ދުނިޔޭގެ ހަކަތައިގެ ބާޒާރަށް ވަނީ ބޮޑެތި ލޮޅުން ތަކެއް އަރައިފަ އެވެ. މި ހަނގުރާމަ ތިން ވަނަ ހަފުތާ އަކަށް ފެށިފައިވާއިރު، އާދީއްތަ ދުވަހު ޓްރަމްޕް ވިދާޅުވީ ގަލްފު ސަރަހައްދުގެ ތެލަށް ބަރޯސާވާ ޤައުމު ޔަކުން، ދުނިޔޭގެ ހަކަތައިގެ 20 އިންސައްތަ ދަތުރުކުރާ މި ކަނޑު އޮޅި ހިމާޔަތް ކުރުމުގެ ޒިންމާ އުފުލަން ޖެހޭ ކަަމަށެވެ. 

ޓްރަމްޕް ވިދާޅުވެފައި ވަނީ ހަތް ޤައުމަކާ އެކު މަޝްވަރާ ކުރަމުން އަންނަ ކަމަށެވެ. ނަމަވެސް، އެއީ ކޮން ޤައުމު ތަކެއް ކަމެއް އޭނާ ވިދާޅުވެފައި ނުވެ އެވެ. އޭގެ ފަހުން ސޯޝަލް މީޑިއާގައި ޓްރަމްޕް ވިދާޅުވެފައި ވަނީ، ޗައިނާ، ފްރާންސް، ޖަޕާން، ދެކުނު ކޮރެއާ އަދި އިނގިރޭސިވިލާތުން އެކަމުގައި ބައިވެރި ވާނެ ކަމަށް އުންމީދު ކުރައްވާ ކަމަށެވެ. 

އެ ހުށަހެޅުމާ ގުޅިގެން ޖަޕާންގެ ބޮޑު ވަޒީރު ސަނައޭ ޓަކައިޗީ ހޯމަ ދުވަހު ވިދާޅުވީ، މެދު އިރުމަތިން ޖަޕާން އަށް ބޭނުންވާ ތެލުގެ 95 އިންސައްތަ ލިބުނު ކަމުގައި ވިޔަސް، އެ ސަރަހައްދަށް މަނަވަރު ފޮނުވުމުގެ އެއްވެސް ނިންމުމެއް ނިންމާފައި ނުވާ ކަމަށެވެ. ޖަޕާންގެ ޤާނޫނު އަސާސީ އޮންނަ ގޮތުން ހަނގުރާމައިގެ އަމަލު ތަކުގަައި ބައިވެރިވުމަށް ހުރަސް ތަކެއް ހުރިކަން ފާހަގަ ކުރައްވައި ޓަކައިޗީ ވިދާޅުވީ، ޤާނޫނީ އިމުގެ ތެރެއިން ޖަޕާން އަށް އަމިއްލަ އަށް ކުރެވޭނީ ކޮން ކަންތައްތަކެއްތޯ ބަލަމުންދާ ކަމަށެވެ. 

މީގެ އިތުރުން އޮސްޓްރޭލިއާގެ ސަރުކާރުން ވެސް ވަނީ މިފަދަ ރޫހެއްގައި ވާހަކަ ދައްކައިފަ އެވެ. އޮސްޓްރޭލިއާގެ ބޮޑު ވަޒީރު އެންތަނީ އަލްބަނީސްގެ ކެބިނެޓުގެ މިނިސްޓަރު ކެތަރިން ކިންގް އޭބީސީ ނިއުސް އަށް ދެއްވި އިންޓަވިޔުއެއްގައި ވިދާޅުވީ، ހޮރުމޯޒު ކަނޑު އޮޅި ހުޅުވާފައި ބޭއްވުމުގެ މުހިންމުކަން އިނގޭ ކަމަށެވެ. ނަމަވެސް، އެކަމަށް އެހީތެރިވުމަށް މަނަވަރު ފޮނުވުމަށް އެދިފައި ނުވާނެ ކަަމަށް އޭނާ ވިދާޅުވި އެވެ. އަދި އެފަދަ ކަމެއްގައި އޮސްޓްރޭލިއާ އިން ބައިވެރި ނުވާނެ ކަމަށް ވެސް ވިދާޅުވެފައިވެ އެވެ. 

މި ހަމަ ނުޖެހުންތަކާ ގުޅިގެން އޭޝިއާ މާކެޓު ތަކަށް ވަނީ އޭގެ އަަސަރު ކޮށްފަ އެވެ. ބްރެންޓް ކްރޫޑް ތެލުގެ އަގު އެއް އިންސައްތަ އަށް ވުރެ މައްޗަށް ގޮސް، ފީފާއެއްގެ އަގު ވަނީ 104.50 އެމެރިކާ ޑޮލަރަށް އުފުލިފަ އެވެ. މީގެ އިތުރުން، މެދު އިރުމަތީގެ ތެޔޮ އުފައްދާ ވަސީލަތް ތަކަށް ނުރައްކާ ވެދާނެ ކަމުގެ ބިރާއި، އެމެރިކާގެ ބައިވެރިން މިކަމުގެ ތެރެއަށް ވަނުމަށް ޓްރަމްޕް އެދިވަޑައި ގަތުމާ ގުޅިގެން ސަރަހައްދީ ހިއްސާގެ ބާޒާރުތައް ވަނީ ދަށަށް ގޮސްފަ އެވެ.