އީރާންއާ ދެކޮޅަށް އަލުން ހަނގުރާމަ ފެށުމުގެ މަޝްވަރާ ކުރުމަށް، ޓްރަމްޕް އެޑްވައިޒަރުންނާ ބައްދަލު ކުރައްވައިފި

އީރާން އިން ހުށަހެޅި ފަހުގެ މަޝްވަރާ ތަކުގެ ހުށަހެޅުން ބަލައި ނުގަނެވޭނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުުވުމާ ގުޅިގެން، އީރާންއާ ދެކޮޅަށް އަލުން ހަމަލާތައް ފެށުމަށް ވިސްނަވަމުން ގެންދަވާ ކަމަށް އެމެރިކާގެ އޮފިޝަލުން ހާމަ ކޮށްފި އެވެ. 

ރިޕޯޓު ތަކުގައި ބުނާ ގޮތުގައި ހަފުތާ ތަކަށް ހަނގުރާމަ މެދު ކަނޑާލުމަށް އެއްބަސްވުމަށް ފަހު، އީރާންއާ ދެކޮޅަށް އަލުން ހަމަލާތައް ދިނުމާ މެދު މަޝްވަރާ ކުރުމާއި، އެކަމުގައި ރާވަން ޖެހޭ ކަންކަން ރޭވުމަށް ޓްރަމްޕް ވަނީ ޤައުމީ ސަލާމަތާ ބެހޭ ކޮމެޓިއާ ބައްދަލު ކުރައްވަން ނިންމަވައިފަ އެވެ. 

އީރާން އިން އެމެރިކާގެ އުޅަނދު ތަކަށް ނުރައްކާ ކުރަމުން އަންނަ ކަމަށް ބުނެ، އެމެރިކާގެ ސިފައިން ވަނީ ފާއިތުވި ދުވަސް ތަކުގައި އީރާންގެ ސިފައިންނަށް އަމާޒުކޮށް ހަމަލާ ތަކެއް ދީފަ އެވެ. ރައްދުގައި އީރާން އިން ވެސް ވަނީ އެމެރިކާގެ އަސްކަރިއްޔާ އަށް އަމާޒުކޮށް ހަމަލާ ތަކެއް ދީފަ އެވެ. 

މީޑިއާ ތަކުގައި ބުނެފައިވާ ގޮތުން، ހޯމަ ދުވަހު ޓްރަމްޕް ވަނީ ޤައުމީ ސަލާމަތާ ބެހޭ ކޮމެޓީއާ ބައްދަލު ކުރައްވައިފަ އެވެ. އެ ބައްދަލުވުމުގައި އެމެެރިކާގެ ނައިބު ރައީސް ޖޭޑީ ވޭންސް އާއި، ޓްރަމްޕްގެ ޚާއްސަ މަންދޫބު ސްޓީވް ވިޓްކޮފް އާއި، ސެކްރެޓަރީ އޮފް ސްޓޭޓް މާކޫ ރޫބިއޯ، ޕެންޓަގަންގެ އިސްވެރިޔާ ޕީޓް ހެގްސެތު، ސީއައިއޭގެ ވެރިޔާ ޖޯން ރެޓްކްލިފް އަދި ޖޮއިންޓް ޗީފްސް އޮފް ސްޓާފްގެ ޗެއާމަން ޖެނެރަލް ޑޭން ކެއިން ވެސް ވަނީ ބައިވެރިވެ ވަޑައިގެންފަ އެވެ. 

އެމެރިކާގެ އޮފިޝަލުންނާ ހަވާލާދީ އެކްސިއޯސްގައި ބުނެފައި ވަނީ، އީރާންއާ ދެކޮޅަށް "ކުޑަކޮށް" ފިޔަވަޅު އަޅުއްވާނެ ކަމަށް ޓްރަމްޕް ވިދާޅުވެފައިވެ އެވެ. އެކްސިއޯސް އަށް މައުލޫމާތު ދެމުން އޮފިޝަލުން ބުނި ގޮތުގައި، އީރާންގެ ނިއުކްލިއާ ޕްރޮގްރާމް އަށް ދަތި ކުރުމާއި، އީރާންގެ ވެރިކަަމަށް ދަތި ކުރުމުގެ ގޮތުން ބައެއް ފިޔަވަޅުތައް އެޅުމަށް ޓްރަމްޕް ގެންދަވަނީ ވިސްނަވަމުންނެވެ. 

މިދިޔަ ހަފުތާގެ ތެރޭގައި ޓްރަމްޕް ވަނީ، އީރާން އާއެކު އެއްބަސްވުމަކަށް އާދެވޭނެ ކަމުގެ އުންމީދު ފާޅު ކުރައްވައިފަ އެވެ. ނަމަވެސް، ޕާކިސްތާން މެދުވެރިކޮށް އީރާން އިން ހުށަހެޅި ޖަވާބަށް ފަހު، ޓްރަމްޕް ވިދާޅުވީ ހަނގުރާމަ ހުއްޓުވުމުގެ އެއްބަސްވުން މިހާރު ނުރައްކަލެއްގައި އޮތް ކަމަށެވެ.