ސްވެންސް ހޯލްޑިންގް ކޮމްޕެނީގެ ހަތްވަނަ ބްރޭންޑް ކަމަށްވާ "ހާމަނީ ގާޑަން ރެސްޓޯރަންޓް" ރަސްމީކޮށް ހުޅުވައިފި

ސްވެންސް ހޯލްޑިންގް ކޮމްޕެނީގެ ހަތްވަނަ ބްރޭންޑް ކަމަށްވާ "ހާމަނީ ގާޑަން ރެސްޓޯރަންޓް" ރަސްމީކޮށް ހުޅުވައިފި އެވެ.

ހުކުރު ދުވަހުގެ ރޭ މި ރެސްޓޯރަންޓް ރަސްމީކޮށް ހުޅުވައިދެއްވީ ކުރީގެ ރައީސް އަދި ރައްޔިތުންގެ މަޖިލީހުގެ ކުރީގެ ރައީސް މުޙައްމަދު ނަޝީދެވެ.

ހާމަނީ ގާޑަން ރެސްޓޯރަންޓަކީ ގްރޭޓަރ މާލެ ސަރަޙައްދުގައި، ރެސްޓޯރަންޓުގެ އެތެރޭގައި ލައިވް މިއުޒިކް ކުޅެވޭނެ އިންތިޒާމުތައް ފުރިހަމައަށް ގާއިމުކޮށްފައިވާ ފުރަތަމަ ރެސްޓޯރަންޓެވެ. މި ރެސްޓޯރަންޓް ޚާއްޞަކޮށް ފަރުމާކޮށްފައިވަނީ މިހާރުގެ ޒުވާން ޖީލު ނުވަތަ "ޖެން-ޒީ" އާއި، މިއުޒިކަށް ލޯބިކުރާ ފަރާތްތަކުގެ އިތުރުން، ޒަމާނީ ކެއުމުގެ ތަޖުރިބާއަކަށް އެދޭ ކަސްޓަމަރުންނަށް އަމާޒުކޮށްގެންނެވެ.

ބައިނަލްއަގުވާމީ އެކި ރަހަތައް ހިމެނޭ ގޮތަށް، ތަފާތު މާޙައުލެއްގައި ކެއުމުގެ ފުރުޞަތު ހާމަނީ ގާޑަން އިން ކަސްޓަމަރުންނަށް ފޯރުކޮށްދެ އެވެ. ސްވެންސް ހޯލްޑިންގް ކޮމްޕެނީގެ ވެރިޔާ އާދަމް ފިރުޝާންގެ އަމާޒަކީ، ކެއުމާއި މިއުޒިކް އަދި މުނިފޫހިފިލުވުން އެއްތަނަކުން ލިބިގެންދާނެ ފަދަ، ކަސްޓަމަރުންނަށް ހިތްގައިމު ތަޖުރިބާ އެއް ލިބޭނެ އިޖުތިމާޢީ މާޙައުލެއް ބިނާކުރުމެވެ.

ރެސްޓޯރަންޓް ހުޅުވުމަށް ބޭއްވި ރަސްމިއްޔާތު އިތުރަށް ފޯރިގަދަވެގެންދިޔައީ ރާއްޖޭގެ މަޝްހޫރު ބޭންޑްތަކާއި މުނިފޫހިފިލުވައިދޭ ގްރޫޕްތަކުގެ ހުށަހެޅުންތަކުންނެވެ. މީގެ ތެރޭގައި ހަބޭސް ބޮޑުބެރު، ސޯލް ސަލްޑާ، ސްކައިރޮކް، ޑިޓިއުން އަދި ޒަދާސިސް ހިމެނޭއިރު، މި ހުށަހެޅުންތަކާއެކު މުޅި ރޭގަނޑު ފެނިގެންދިޔައީ މެހެމާނުންނަށް ހިތްގައިމު މާޙައުލެއްގެ ގޮތުގަ އެވެ.

މި ބްރޭންޑުން މައިގަނޑު ގޮތެއްގައި އިސްކަންދެނީ ހަމައެކަނި ކެއުމުގެ އިތުރުން، ފެންވަރު ރަނގަޅު ކާނާއާއި، ލައިވް މިއުޒިކް އަދި އިޖުތިމާޢީ ގުޅުންތައް އެއް ފުރާޅެއްގެ ދަށުން ތަޖުރިބާކޮށްލުމުގެ ފުރުޞަތު ފަހިކޮށްދިނުމަށެވެ. ހާމަނީ ގާޑަން ވެގެންދާނީ ޒުވާނުންގެ ބައްދަލުވުންތަކާއި، އާދައިގެ ބައްދަލުވުންތަކާއި، އެކި ކަހަލަ އުފާފާޅުކުރުންތަކުގެ އިތުރުން ލައިވް މިއުޒިކުގެ ހަރަކާތްތަކަށް މަގުބޫލު މަންޒިލަކަށް ކަމަށް ބެލެވެ އެވެ.

ކުރިއަށް އޮތް ތަނުގައި ކަސްޓަމަރުންނަށް އަމާޒުކޮށްގެން ގަވާއިދުން ލައިވް މިއުޒިކް ރޭތަކާއި، ޚާއްޞަ އިވެންޓްތަކުގެ އިތުރުން މުނިފޫހިފިލުވުމުގެ އެކި ޕްރޮގްރާމްތައް ބޭއްވުމަށް އެ ރެސްޓޯރަންޓުން ވަނީ ރާވާފައެވެ. ހާމަނީ ގާޑަންގެ އަމާޒަކީ ލައިވް މިއުޒިކް ހުށަހަޅައިދިނުމަށް ޚާއްޞަ ޕްލެޓްފޯމެއް ފޯރުކޮށްދީ، ރާއްޖޭގެ މިއުޒިކީ ފަންނާނުންނަށް އެހީތެރިކަންދީ އެފަރާތްތައް ކުރިއެރުވުމެވެ.