އީރާން އިން ހުށަހެޅީ ވަރަށް އިންސާފުވެރި ހުށަހެޅުމެއް: ބަޣާއީ

އެމެރިކާ އިން އީރާންއާ ދެކޮޅަށް ހިންގަމުން އަންނަ ހަނގުރާމަ ހުއްޓާލުމަށާއި، ހޮރްމޫޒް ކަނޑު އޮޅި އަލުން ހުޅުވާލުމަށް އީރާން އިން ހުށަހެޅި ހުށަހެޅުމަކީ ޤާނޫނީ ގޮތުން ޞައްޙަ އަދި އިންސާފުވެރި ހުށަހެޅުމެއް ކަމަށް އީރާންގެ ފޮރިން މިނިސްޓްރީގެ ތަރުޖަމާނު އިސްމާއީލް ބަޣާއީ ވިދާޅުވެއްޖެ އެވެ. 

އީރާން އިން އެމެރިކާގެ ހުށަހެޅުން ތަކަށް އާދީއްތަ ދުވަހު ޖަވާބު ދީފައިވާއިރު، ބަޣާއީ ވިދާޅުވީ އީރާންގެ އެ ހުށަހެޅުމަކީ ސަރަހައްދީ ސަލަމާތާއީ ރައްކާތެރި ކަމަށްޓަކައި ހުށަހެޅު ދީލަތި އަދި ޒިންމާދާރު ހުށަހެޅުމެއް ކަމަށެވެ. 

ބަޣާއީ ވިދާޅުވީ، އީރާން އިން އެދިފައި ވަނީ ހަނގުރާމަ ހުއްޓާލުމަށާއި، އީރާންއާ ދެކޮޅަށް އަޅާފައިވާ ދަތި ކުރުމުގެ ފިޔަވަޅު ތަކާއި، ބްލޮކޭޑް އުވާލުމަށް ކަމަށެވެ. މީގެ އިތުރުން ކަނޑު ފޭރުމުގެ އަމަލުތައް ހުއްޓާލުމަށާއި، އެމެރިކާގެ ނުފޫޒުން ދުނިޔޭގެ އެކި ބޭންކު ތަކުގައި ނުހައްގުން ހިފަހައްޓާފައިވާ އީރާންގެ މާލީ އެސެޓުތައް ދޫކޮށްލުމަށް ވެސް އީރާން އިން ވަނީ ހުށަހަޅައިފަ އެވެ. 

އީރާންގެ ހުށަހެޅުމުގައި ހިމެނޭ އެހެން މުހިންމު ކަންތައް ތަކަށް އަލިއަޅުވާލައްވަމުން ބަޣާއީ ވިދާޅުވީ، ހޮރްމޫޒް ކަނޑު އޮޅިން އަމާންކަމާ އެކު ދަތުރުފަތުރު ކުރެވޭގެ މަގު ފަހި ކޮށްދިނުމަކީ އީރާންގެ ބޭނުމެއް ކަމަށެވެ. އަދި މުޅި ސަރަހައްދުގެ އިތުރުން، ލުބުނާންގައި ވެސް ސަލާމަތާއީ ރައްކާތެރިކަން ޤާއިމު ކުރުމަކީ އީރާން އިން ބޭނުންވާ ކަމެއް ކަމަށް އޭނާ ފާހަގަ ކުރެއްވި އެވެ. 

މި ހުށަހެޅުން ތަކަކީ ސަރަހައްދީ ހަމަޖެހުމަށް އޮތް އެންމެ ރަނގަޅު ފުރުސަތުކަން ފާހަގަ ކުރައްވައި ބަޣާއީ ވިދާޅުވީ، މިއީ އީރާން އިން ދުނިޔެ އަށް ދެއްކި ވަރަށް ޒިންމާދާރު ނަމޫނާއެއް ކަމަށެވެ. ނަމަވެސް، މިކަމުގައި އެމެރިކާ އިން އަމަލު ކުރާނެ ގޮތަކާ މެދު އީރާން އިން އޮތީ ވަރަށް ބޮޑަށް ފާރަވެރިވެ އެވެ. 

އީރާާން އާއި އެމެރިކާއާ ދެމެދު އޮތް ނުތަނަވަސްކަން ބޮޑުވެފައިވާ މި ދަނޑިވަޅުގައި، އީރާން އިން މިފަދަ ހުށަހެޅުމެއް ހުށަހަޅާފައި ވަނީ ސަރަހައްދީ ހަނގުރާމައެއް އަނެއްކާ ވެސް ފެށިދާނެ ކަމުގެ ބިރު ބޮޑުވެފައިވާ ވަގުތެއްފަ އެވެ.