އެމެރިކާގެ އަސްކަރީ އެހީތެރިކަމަށް ބަރޯސާވުން ކުޑަ ކުރާނެ ކަމަށް ނަތަންޔާހޫ ވިދާޅުވެއްޖެ

އެމެރިކާގެ އަސްކަރީ އެހީތެރިކަމަށް ބަރޯސާވެފައި އޮންނަ އޮތުން، ކުރިއަށް އޮތް ދިހަ އަހަރު ދުވަހުގެ ތެރޭގައި ކުޑަކޮށް، އެކަން ނިންމާލެވޭނެ ކަމަށް އުންމީދު ކުރައްވާ ކަމަށް އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫ ވިދާޅުވެއްޖެ އެވެ. 

އާދީއްތަ ދުވަހު ސީބީއެސް ނިއުސްގެ ސިކްސްޓީ މިނިޓްސް ޕްރޮގްރާމް އަށް ދެއްވި އިންޓަވިޔުއެއްގައި ނަތަންޔާހޫ ވިދާޅުވީ، އިޒްރޭލް އާއި އެމެރިކާއާ ދެމެދުު އޮންނަ އަސްކަރީ ގުޅުމުގެ ދަށުން ލިބޭ މާލީ އެހީތެރިކަން ވަރަށް ބޮޑަށް ދަށް ކުރަން ބޭނުންވާ ކަމަށެވެ. އެގޮތުން އިޒްރޭލް އަށް ލިބެނީ އަހަރަކު 3.8 ބިލިއަން އެމެރިކާ ޑޮލަރުގެ އަސްކަރީ އެހީތެރިކަން ކަމަށް އޭނާ ވިދާޅުވި އެވެ. 

އެމެރިކާ އިން ވަނީ 2018 ވަނަ އަހަރުން ފެށިގެން، 2028 ވަަނަ އަހަރުގެ ނިޔަލަށް އިޒްރޭލް އަށް ޖުމުލަ 30 މިލިއަން އެމެރިކާ ޑޮލަރުގެ އަސްކަރީ އެހީތެރިކަން ދިނުމަށް އެއްބަސްވެފަ އެވެ. ނަމަވެސް ނަތަންޔާހޫ ވިދާޅުވީ، އިޒްރޭލް އާއި އެމެރިކާއާ ދެމެދު އޮންނަ މާލީ ގުޅުން އަލުން ބަލައި، ރަނގަޅު ކުރުމަށް މިއީ އެންމެ ރަނގަޅު ވަގުތު ކަމަށެވެ. އެގޮތުން ކޮންގްރެސް އަށް އިންތިޒާރު ކުރުމެއް ނެތި، މިހާރުން މިހާރަށް އެކަން ވާން ބޭނުންވާ ކަމަށް ވެސް ނަތަންޔާހޫ ވިދާޅުވި އެވެ. 

އިޒްރޭލް އަށް އަސްކަރީ އެހީތެރިކަން ދިނުމަށް އެމެރިކާގެ ކޮންގްރެސްގައި ދިގު މުއްދަތަކަށް ދެ ޕާޓީގެ ތާއީދު ލިބިފައި ވީ ނަމަވެސް، 2023 ވަނަ އަހަރު އިޒްރޭލް އިން ޣައްޒާގައި ހަނގުރާމަ ފެށި ފަހުން ޤާނޫނު ހަދާ މަޖިލީހުގެ މެމްބަރުންނާއި، އެމެރިކާގެ އާންމު ރައްޔިތުންގެ ތާއީދު ވަނީ އިޒްރޭލް އަށް ކުޑަވެފަ އެވެ. 

މިއަހަރުގެ މާޗު މަހު ޕިއު އިންސްޓިޓިއުޓް އިން ހިންގި ސާވޭ އަކުން ދައްކާ ގޮތުގައި، އެމެރިކާގެ އިސްވެރިންގެ 60 އިންސައްތަ ބޭފުޅުން އިޒްރޭލްއާ މެދު ނުރުހުންވެ އެވެ. އަދި ދުނިޔޭގެ ކަންކަމުގައި ޙައްލު ހޯދުމަށް 59 އިންސައްތަ ރައްޔިތުން އިޒްރޭލް އަށް އިތުބާާރު ނުކުރާ ކަމަށް، ނުވަތަ އިތުބާރު ކުޑަ ކަމަށް ވަނީ ދައްކައިފަ އެވެ.

އެމެރިކާާގައި އިޒްރޭލް އަށް އޮންނަ ތާއީދު ކުޑަ ވަމުން ދިޔުމަކީ، ސޯޝަލް މީޑިއާ ބޭނުން ކުރުން އިތުރުވުމާ ގުޅިފައިވާ ކަމެއް ކަމަށް ނަތަންޔާހޫ ވިދާޅުވި އެވެ. އޭނާ ވިދާޅުވީ 400 އިންސައްތަ އެކަން ޔަޤީންވާ ކަމަށެވެ.