އީރާން އިން ދިން ޖަވާބު ބަލައި ނުގަނެވޭނެ ކަމަށް ޓްރަމްޕް ވިދާޅުވެއްޖެ

އެމެރިކާގެ ހުށަހެޅުން ތަކަށް އީރާން އިން ދިން ޖަވާބަކީ ބަލައި ގަނެވޭނެ ޖަވާބެއް ނޫން ކަމަށް، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

ދެ ޤައުމުގެ ދެ މެދުގައި އަލުން މަޝްވަރާތައް ފެށުމުގެ އުންމީދުގައި އެމެރިކާ އިން ހުށަހެޅުމެއް ހުށަހަޅާފައި އޮންނަތާ އެތައް ދުވަހެއް ފަހުން، އާދީއްތަ ދުވަހު އީރާން އިން ވަނީ އެކަމަށް ޖަވާބު ދީފަ އެވެ. އެ ޖަވާބުގައި އީރާން އިން ވަނީ ހަނގުރާމަ މުޅިން ހުއްޓާލުމަށް ބާރު އަޅައިފަ އެވެ. އަދި އެމެރިކާ އާއި އިޒްރޭލް އިން ހިންގާ ހުރިހާ ހަނގުރާމައެއް ހުއްޓާލުމަށް އީރާން އިން ވަނީ އެދިފަ އެވެ. 

އީރާން އިން އެދިފައި ވަނީ އެ ޤައުމުގެ ބަނދަރު ތަކަށް އެމެރިކާ އިން ކުރިމަތި ކޮށްފައިވާ ހިސޯރު ކުރުން ނިމުމަކަށް ގެނައުމާއި، އިތުރު ހަމަލާ ތަކެއް ނުދޭނެ ކަމުގެ ޔަޤީންކަން ދިނުން އަދި އީރާންގެ ތެލުގެ ވިޔަފާރީ އަށް އެމެރިކާ އިން އަޅާފައިވާ ދަތި ކުރުންތައް އުވާލުމަށެވެ. 

އީރާން އިން ޖަވާބު ފޮނުވިތާ މަދު ގަޑިއިރު ތަކެއްގެ ތެރޭގައި ޓްރަމްޕް ވަނީ، އީރާންގެ ޖަވާބު ޤަބޫލު ނުކުރައްވާ ކަމަށް ވިދާޅުވެފަ އެވެ. އެގޮތުން ޓްރަމްޕްގެ ޓްރުތު ސޯޝަލް މީޑިއާގައި ވިދާޅުވީ، އެއީ ފުރިހަމަ އަށް ޤަބޫލު ކުރެވޭނެ ކަމެއް ނޫން ކަމަށާއި، އެއީ ކަމުދާ ޖަވާބެއް ނޫން ކަމަށެވެ. 

ދެ ޤައުމުގެ ދެ މެދުގައި މަޝްވަރާތައް ހުއްޓިފައި އޮތުމާ ގުޅިގެން ހޯމަ ދުވަހު ތެލުގެ އަގު ވެސް ވަނީ މައްޗަށް ޖެހިލައިފަ އެވެ. އެގޮތުން ފީފާ އަކުން ހަތަރު އެމެރިކާ ޑޮލަރު މައްޗަށް ޖެހިލާފައިވާ ކަމަށް ރިޕޯޓުތައް ބުނެ އެވެ.