އީރާންއާ ދެކޮޅު ހަދާ ޤައުމު ތަކަށް، ހޮރްމޫޒް ކަނޑު އޮޅީގައި ދަތި ތަކެއް ކުރިމަތި ވާނެ ކަމަށް އެ ޤައުމުން ބުނެފި

އީރާންއާ ދެކޮޅަށް އެމެރިކާ އިން ކަނޑައަޅާފައިވާ ދަތި ކުރުންތައް ތަންފީޒު ކުރާ ޤައުމު ތަކަށް ވެސް، ހޮރްމޫޒް ކަނޑު އޮޅި އަށް ވަނުމުގައި ދަތިތަކާ ކުރިމަތިލާން ޖެހޭނެ ކަމަށް އީރާން އިން ބުނެފި އެވެ. 

އީރާންގެ ސިފައިންގެ ތަރުޖަމާނު އަކްރަމީ ނިއާ މިފަދައިން އިންޒާރު ދީ ވާހަކަ ދައްކަވާފައި މި ވަނީ، އީރާން އަށް އެހީތެރިވާ ޤައުމު ތަކާ ދެކޮޅަށް ފިޔަވަޅު އަޅާނެ ކަމަށް އެމެރިކާާ އިން ބުނެފައި ވަނިކޮށެވެ. އަކްރަމީ ނިއާ ވިދާޅުވީ، ހަނގުރާމައިގައި ދުޝްމަނުންގެ އެއްވެސް މަޤުސަދެއް ހާސިލު ނުވާ ކަމަށާއި، އީރާންގެ ސިޔާސީ ނިޒާމަށް އެއްވެސް ބުރޫއެއް ނާރާ ކަމަށެވެ. 

އޭގެ ބަދަލުގައި ޤައުމުގެ ތެރޭގައި އެކުވެރިކަމާއި، އެއްބައިވަންތަކަން ވަރުގަދަ ވެގެން ދިޔައީ ކަމަށާއި، މިހާރު ވެސް މަގު ތަކުގައި ރައްޔިތުން ތިބުމުން އެކަން ފެންނަމުންދާ ކަމަށް އޭނާ ވިދާޅުވި އެވެ. ދުޝްމިނުން ފެނުނީ މި ހުރަސްތައް ހަގީގަތުގައި ނަގައިލެވޭނެ ގޮތެއް ނެތް ކަމަށާއި، އެހެންވެ އެންމެ ފަހުން ހަނގުރާމަ ހުއްޓުމަށް އެއްބަސްވުމަށް މަޖުބޫރުވި ކަމަށް އޭނާ ވިދާޅުވި އެވެ. 

ހަނގުރާމަ ހުއްޓުމުގެ މި ދައުރުގައި އީރާން އިން ވަނީ އެ ޤައުމުގެ ސިފައިންގެ ބާރާއި، ހުނަރު ވަރުގަދަކޮށް، ލަނޑު ދަނޑި ތަކުގެ ލިސްޓު އަޕްޑޭޓުކޮށް، ދިފާއީ އަދި ހަމަލާދޭ ހުރިހާ ހިސާބު ތަކެއް ރަނގަޅު ކޮށްފައި ކަމަށް ވެސް އަކްރަމީ ނިއާ ވިދާޅުވި އެވެ. 

ހޮރްމޫޒް ކަނޑު އޮޅި އޮންނަނީ ދުނިޔޭގެ ތެލުގެ ވިޔަފާރީގައި ވަރަށް މުހިންމު ހިސާބެއްގަ އެވެ. މި ކަނޑު އޮޅި އަކީ، ދުނިޔޭގެ ތެލުގެ ވިޔަފާރީގެ ބޮޑު ބައެއް ހިނގާ މަގެކެވެ. އީރާން އިން މިފަދަ އިންޒާރުތައް ދިނުމަކީ، މި ސަރަހައްދުގައި ވަރުގަދަ ހަމަ ނުޖެހުން ތަކެއް ހިނގައި ދާނެ ކަމުގެ އިޝާރާތެއް ކަމަށް މާހިރުން ފާހަގަ ކުރެ އެވެ. 

އީރާން އާއި އެމެރިކާއާ ދެމެދު އޮންނަ ނުތަނަވަސްކަން ދިގު ދެމިގެން އަައިސްފައިވާއިރު، އެމެރިކާ އިން އީރާން އަށް ކަނޑައަޅާފައިވާ ދަތި ކުރުން ތަަކަކީ އެ ޤައުމުގެ އިޤްތިޞާދަށް ބޮޑެތި އަސަރު ތަކެއް ކުރާ ކަންކަމެވެ. މި ދަތި ކުރުންތައް ތަންފީޒު ކުރުމުގައި އެހެން ޤައުމު ތަކުން އެމެރިކާ އަށް އެއްބާރުލުން ދިނުމަކީ، އީރާން އިން ދެކޭ ގޮތުގައި އެ ޤައުމާ ދެކޮޅަށް ހިންގާ ޙަރާކަތެއްގެ ގޮތުގަ އެވެ.