ރޫބިއޯ، ޤަތަރުގެ ބޮޑު ވަޒީރާ ބައްދަލު ކުރައްވައިފި
މެދު އިރުމަތީގެ ހަަމަޖެހުމާއި، ސަލާމަތްތެރިކަން ދެމެހެއްޓުމަށާއި، ކުރިމަތި ވެދާނެ ނުރައްކާ ތަކުން ސަލާމަތް ވުމަށްޓަކައި ދެ ޤައުމުގެ ދެ މެދުގައި އޮންނަ ގުޅުން އިތުރަށް ވަރުގަދަ ކުރުމާ ގުޅޭ ގޮތުން ވެސް ދެ ބޭފުޅުން މަޝްވަރާ ކުރެއްވި.
މީގެ ކުރިން ރޫބިއޯ އާއި ޤަތަރުގެ ބޮޑު ވަޒީރު ކުރެއްވި ބައްދަލުވުމުގެ ތެރެއިން. | ރޮއިޓާސް
އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ، ޤަތަރުގެ ބޮޑު ވަޒީރު އަދި ފޮރިން މިނިސްޓަރު ޝެއިޚް މުޙައްމަދު ބިން ޢަބްދުއް ރަޙުމާން އަލް ޘާނީއާ ބައްދަލު ކުރައްވައިފި އެވެ.
ހޮނިހިރު ދުވަހު ރޫބިއޯ އާއި ޤަތަރުގެ ބޮޑު ވަޒީރު ބައްދަލު ކުރައްވާފައިވާއިރު، އެމެރިކާާ އިން މިހާރު ދަނީ އީރާންގެ ޖަވާބަކަށް އިންތިޒާރު ކުރަމުންނެވެ. އެންމެ ފަހުން އީރާން އިން ބުނެފައި ވަނީ އެމެރިކާގެ ހުށަހެޅުމަށް ޖަވާބު ދިނުމަށް ވަގުތު ނަގާނެ ކަމަށެވެ.
އެމެރިކާގެ ސްޓޭޓް ޑިޕާޓްމަންޓް އިން ނެރުނު ބަޔާނެއްގައި އެ އިދާރާގެ ތަރުޖަމާނު ޓޮމީ ޕިގޮޓް ވިދާޅުވީ، އެކި ދާއިރާ އަކުން ޤަތަރާއި އެމެރިކާއާ ދެމެދު އޮންނަ ގާތް ގުޅުމާއި، އެއްބާރުލުމަށްޓަކައި ރޫބިއޯ ޝުކުރު އަދާ ކުރެއްވި ކަމަށެވެ. ޤަތަރަކީ މެދު އިރުމަތީގައި އެމެރިކާގެ މުހިންމު ބައިވެރިއެއް ކަމަށް ވެސް، އެ ބައްދަލުވުމުގައި ރޫބިއޯ ފާހަގަ ކުރެއްވި އެވެ.
މީގެ އިތުރުން ޤަތަރުގެ ދިފާއީ ކަންކަމުގައި އެމެެރިކާ އިން ދޭ އެއްބާރުލުމާ ގުޅޭ ގޮތުން ދެ ބޭފުޅުން ވަނީ ފުޅާ ދާއިރާއެއްގައި މަޝްވަރާ ކުރައްވައިފަ އެވެ. އަދި މެދު އިރުމަތީގެ ހަަމަޖެހުމާއި، ސަލާމަތްތެރިކަން ދެމެހެއްޓުމަށާއި، ކުރިމަތި ވެދާނެ ނުރައްކާ ތަކުން ސަލާމަތް ވުމަށްޓަކައި ދެ ޤައުމުގެ ދެ މެދުގައި އޮންނަ ގުޅުން އިތުރަށް ވަރުގަދަ ކުރުމާ ގުޅޭ ގޮތުން ވެސް ދެ ބޭފުޅުން މަޝްވަރާ ކުރެއްވި އެވެ.
މި ބައްދަލުވުން ބާއްވާފައި މި ވަނީ މެދު އިރުމަތީގެ މަސްރަހު ވަރަށް ބޮޑަށް ނުތަނަވަސްވެފައިވާ ވަގުތެއްގަ އެވެ. ޚާއްސަކޮށް ސަރަހައްދީ ސުލްޙަ ޤާއިމު ކުރުަމށް ހުށަހަޅާފައިވާ ހުށަހެޅުން ތަކަށް އީރާން އިން ދޭނެ ޖަވާބަކަށް އެމެރިކާ އިންތިޒާމު ކުރަމުން އަންނަ ވަގުތެއްގަ އެވެ. އަދި މެދު އިރުމަތީގެ ސަރަހައްދުގައި ހުރި އެމެރިކާގެ އަމާޒު ތަކަށް ހަމަލާ ދޭނެ ކަމުގެ އިންޒާރު ވެސް އީރާން އިން ދީފައިވާ ވަގުތެއްގަ އެވެ.
ޤަތަރަކީ މެދު އިރުމަތީގެ މައްސަލަ ތަކުގައި މެދުވެރިއެއްގެ ދައުރު އަދާ ކުރާ އަދި އެމެރިކާއާ ވަރަށް ގާތް ގުޅުމެއް އޮންނަ ޤައުމެކެވެ. ޚާއްސަކޮށް އެމެރިކާގެ ރައީސް ޑޮނަލްޑް ޓްރަމްޕްގެ ރިޔާސީ ދެ ވަނަ ދައުރުގައި، އެެމެރިކާ އާއި ޤަތަރާ ދެމެދު އޮންނަ ގުޅުން ވަނީ އިތުރަށް ފުޅާ ވެގެން ގޮސްފަ އެވެ.
ހޮނިހިރު ދުވަހު ރޫބިއޯއާ ބައްދަލު ކުރެއްވުމުގެ ކުރިން، ޤަތަރުގެ ބޮޑު ވަޒީރު ވަނީ އެމެރިކާގެ ނައިބު ރައީސް ޖޭޑީ ވޭންސްއާ ވެސް ބައްދަލު ކުރައްވައިފަ އެވެ.
މަސްދަރު: އޭއެފްޕީ
