ޑްރޯން އާއި މިސައިލް ތަކުން ހަމަލާ ދޭން ތައްޔާރު، މިތިބީ އޯޑަރު އަންނަންދެން: އީރާން

އީރާންގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ)ގެ މިސައިލް ތަކާއި ޑްރޯންތައް އެމެރިކާގެ އަމާޒަކަށް ފޯކަސް ކޮށްފައިވާ ކަމަށާއި، ހަމަލާ ދިނުމުގެ އަމުރަށް އިންތިޒާރުގައި ތިބި ކަމަށް، އައިއާރުޖީސީގެ އިސް ކޮމާންޑަރަކު ވިދާޅުވެއްޖެ އެވެ. 

އީރާންގެ ދައުލަތުގެ މީޑިއާ، އައިއާރުއައިބީ ނިއުސް އެޖެންސީ އަށް ދެއްވި ބަސްދީގަތުމެއްގައި އައިއާރުޖީސީގެ އެއާރޯސްޕޭސް ފޯސްގެ ޖެނަރަލް ސަރުދާރު މޫސަވީ ވިދާޅުވީ، އެ ސަރަހައްދުގައި ހުރި އެމެރިކާގެ އަމާޒު ތަކަށާއި، ދުޝްމަނުންގެ އުޅަނދު ފަހަރަށް އައިއާރުޖީސީގެ މިސައިލް ތަކާއި ޑްރޯންތައް މިހާރު ވަނީ އަމާޒު ކުރެވިފަ އެވެ. 

ޖެނަރަލް މޫސަވީ އިތުރަށް ވިދާޅުވީ، އީރާންގެ އަސްކަރީ ޤާބިލިއްޔަތު ހުރީ ވަރަށް މަތީ ދަރަަޖައެއްގައި ކަމަށާއި، މިހާރު އިންތިޒާރު ކުރަމުން ދަނީ ހަމަލާ ދިނުމަށް ދޭން ޖެހޭ އެންމެ ފަހުގެ އަމުރަށް ކަމަށެވެ. އޭނާ ސިފަ ކުރެއްވި ގޮތުގައި އެމެރިކާގެ މަރުކަޒު ތަކާއި، ދުޝްމަނުންގެ އުޅަނދު ފަހަރަކީ މިހާރު ވެސް އީރާންގެ ހަތިޔާރު ތަކުގެ "ލޮކް"ގެ ތެރޭގައިވާ ތަންތަނެވެ. 

މި އިންޒާރު އައިސްފައި ވަނީ މެދު އިރުމަތީގެ މަސްރަހު ނުތަނަވަސްވެ، އެމެރިކާ އާއި އީރާންއާ ދެމެދު އޮތް ގުޅުން އިތުރަށް ގޯސްވަމުން ދާ ދަނޑިވަޅެއްގަ އެވެ. އީރާން އިން ދަނީ އެ ޤައުމުގެ ސަރަހައްދީ ރައްކާތެރިކަން ދެމެހެއްޓުމަށް ކޮންމެ ވަގުތަކު ވެސް ރައްދު ހަމަލާ ދިނުމަށް ތައްޔާރަށް އޮތް ކަމަށް ހާމަ ކުރަމުންނެވެ. 

އައިއާރުޖީސީގެ އެއާރޯސްޕޭސް ފޯސް އަކީ އީރާންގެ ބެލިސްޓިކް މިސައިލް ޕްރޮގްރާމް އާއި، ޑްރޯން އޮޕަރޭޝަންތައް ބަލަހައްޓާ މައިގަނޑު ފޯސް އެވެ. އެހެންކަމުން، އެ ފޯސްގެ އިސް ކޮމާންޑަރަކު މިފަދަ އިންޒާރެއް ދެއްވުމަކީ ބައިނަލްއަޤުވާމީ މުޖުތަަމއުން ވަރަށް ބޮޑަށް ސަމާލުކަން ދޭނެ ކަމެއް ކަަމަށް މަސްރަހު ދިރާސާ ކުރާ ފަރާތްތަކުން ބުނެ އެވެ. 

މި މައްސަލައާ ގުޅިގެން އެމެރިކާގެ ދިފާއީ ވުޒާރާ، ޕެންޓަގަން އިން މިހާތަނަށް ރަސްމީކޮށް އެއްޗެއް ބުނެފައި ނުވެ އެވެ. ނަމަވެސް، އެމެރިކާ އިން މީގެ ކުރިން ބުނެފައި ވަނީ އެ ސަރަހައްދުގައި ތިބި އެމެރިކާގެ ސިފައިންނާއި، ވަސީލަތް ތަަކަށް ދޭ ކޮންމެ ހަމަލާ އަކަށް ވަރުގަދަ ރައްދެއް ދޭނެ ކަމަށެވެ.