އެމެރިކާގެ އަސްކަރީ މަރުކަޒު ތަކަށް ހަމަލާ ދޭނެ ކަމުގެ އިންޒާރު އީރާން އިން ދީފި

އީރާންގެ ތެޔޮ ޓޭންކަރު ތަކަށް، ނުވަތަ މުދާ އުފުލާ އާންމު އުޅަނދު ފަހަރަށް އެއްވެސް ފަރާތަކުން ހަަމަލާއެއް ދީފި ނަމަ، ސަރަހައްދުގައި ހުރި އެމެރިކާގެ އަސްކަރީ މަރުކަޒު ތަކަށް ވަރުގަދަ ހަމަލާ ތަކެއް ދޭނެ ކަމުގެ އިންޒާރު އީރާން އިން ދީފި އެވެ.

މި އިންޒާރު ދީފައި ވަނީ އީރާާންގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ)ގެ ކަނޑުގެ ސިފައިންނެވެ. 

އީރާާންގެ ދައުލަތުގެ މީޑިއާ، އައިއާރުބީސީ ނިއުސް އިން ރިޕޯޓު ކޮށްފައިވާ ގޮތުގައި އައިއާރުޖީސީގެ ނޭވީ ކޮމާންޑުން ވަނީ އީރާންގެ ކަނޑު ދަތުރު ފަތުރަށް ހުރަސް އަޅާ ކޮންމެ ފަރާތަކަށް ވަރުގަދަ ރައްދެއް ދޭނެ ކަމަށް ބުނެފަ އެވެ. އެ އިދާރާ އިން ނެރުނު ބަޔާނެއްގައި ބުނެފައި ވަނީ، އީރާންގެ ތެޔޮ ޓޭންކަރު ތަކަށާއި، ވިޔަފާރީ އުޅަނދު ފަހަރަށް ދޭ ކޮންމެ ހަމަލާއަކާ ގުޅިގެން، ސަރަހައްދުގައި ހުރި އެމެރިކާގެ އަސްކަރީ މަރުކަޒު ތަކުގެ ތެރެއިން މަރުކަޒަކަށާއި، ދުޝްމަނުންގެ އުޅަނދު ފަހަރަށް ފުޅާ ދާއިރާއެއްގައި ހަމަލާ ދޭނެ ކަމަށެވެ. 

މި އިންޒާރު ދީފައި ވަނީ ހޮރްމޫޒް ކަނޑު އޮޅި ސަރަހައްދުގައި އީރާން އާއި އެމެރިކާގެ އަސްކަރީ ބާރު ތަކުގެ މެދުގައި ނުތަނަވަސްކަން އިންތިހާ އަށް އިތުރުވެފައިވާ ދަނޑިވަޅެއްގަ އެވެ. މިފަހަކަށް އައިސް ދެ ޤައުމުގެ އަސްކަރިއްޔާގެ މެދުގައި ކޮންމެ ވެސް ވަރަކަށް ބަދަލު ކުރެވުނު ހަމަލާ ތަކާ އެކު، މަސްރަހު ވަނީ ވަރަށް ބޮޑަށް ހޫނުވެފަ އެވެ. 

މި ހަމަލާ ތަކަކީ މަދު ހާދިސާ ތަކެއްގެ ގޮތުގައި ފާހަގަ ކުރެވުނު ނަމަވެސް، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައި ވަނީ ދެ ޤައުމުގެ މެދުގައި އޮތް ހަަމަލާ ބަދަލު ކުރުން މެދު ކަނޑާލުމުގެ އެއްބަސްވުން އަދިވެސް ދެމި އޮތް ކަމަށެވެ. ނަމަވެސް، އީރާން އިން މިހާރު ދީފައިވާ އިންޒާރާ އެކު، ސަރަހައްދުގެ ސަލާމަތީ މަސްރަހަށް އިތުރު ބިރުވެރި ކަމެއް ވަނީ ކުރިމަތިވެފަ އެވެ. 

އީރާންގެ އިޤްތިޞާދުގެ މައިބަދަ ކަމަށްވާ ތެޔޮ އެކްސްޕޯޓު ކުރުމަށް ބޭނުން ކުރާ އުޅަނދު ފަހަރަށް ހިމާޔަތް ދިނުމަކީ އެ ޤައުމުގެ އަސްކަރިއްޔާ އިން އެންމެ އިސްކަން ދޭ އެއް ކަންތަކެވެ. އެހެންކަމުން، އެމެރިކާގެ އަސްކަރީ މަރުކަޒު ތަކަށް އަމާޒުކޮށް މި ދިން އިންޒާރަކީ، ސަރަހައްދީ ހަމަނުޖެހުން ފެށިދާނެ ކަމުގެ ބިރު އޮތް ކަމެއްގެ ގޮތުގައި މަސްރަހު ދިރާސާ ކުރާ ފަރާތްތަކުން ދެކެ އެވެ.