އާންމުންގެ ތެރެއިން ނުފެނުނު ނަމަވެސް، އީރާންގެ ރޫހީ ލީޑަރު ދަނީ ހަނގުރާމައިގެ މުހިންމު ކަންކަން އެކުލަވާލަމުން: އެމެރިކާގެ އިންޓެލިޖެންސް ރިޕޯޓު

އީރާންގެ އައު ރޫހީ ލީޑަރު މުޖުތަބާ ޚާމަނާއީ އާންމުންގެ ތެރެއިން ނުފެނި ގިނަ ދުވަސް ތަކެއް ވެފައި ވީ ނަމަވެސް، އެ ޤައުމުގެ ހަނގުރާމައިގެ މުހިންމު ކަންކަން ކަނޑައެޅުއްވުމާއި، ޕްލޭންތައް އެކުލަވާލުމުގައި އޭނާ މުހިންމު ދައުރެއް އަދާ ކުރައްވަމުން ގެންދަވާ ކަމަށް އެމެރިކާގެ އިންޓެލިޖެންސް ރިޕޯޓު ތަކުން ހާާމަވެއްޖެ އެވެ.

އެމެެރިކާގެ ޖާސޫސީ އިދާރާ ތަކުން އެކުލަވާލާފައިވާ މި ރިޕޯޓުތަކާ ހަވާލާދީ ބައިނަލްއަޤުވާމީ މީޑިއާ ތަކުން ބުނާ ގޮތުގައި، އީރާންގެ މަސްރަހު މިހާރު އޮތް ގޮތުން އެންމެ އިސް ބާރުވެރިޔާ އަކީ ކޮބައިކަން ސާފު ނުވި ނަމަވެސް، އެމެރިކާ އާއެކު ކުރިއަށްދާ މަޝްވަރާ ތަކުގައި ރޫހީ ލީޑަރު މުޖުތަބާ ގެންދަވަނީ އިރުޝާދު ދެއްވަމުންނެވެ. 

ހަނގުރާމަ ފެށުނު ދުވަސްވަރު، އީރާންގެ ކުރީގެ ރޫހީ ލީޑަރު އަދި މުޖުތަބާގެ ބައްޕާފުޅު، އާޔަތުﷲ އަލީ ޚާމަނާއީ އަވަހާރަކޮށްލުމަށް ދިން ހަމަލާގައި މުޖުތަބާ އަށް ސީރިއަސް އަނިޔާ ތަކެއް ލިބިފައިވާ ކަމަށް ކުރިން ވެސް ވަނީ ރިޕޯޓު ކޮށްފަ އެވެ. އެ ހަމަލާ އަށް ފަހު އޭނާ އާންމުންގެ ތެރެއިން ފެނިފައި ނުވާއިރު، އޭނާގެ ޞިއްޙީ ޙާލު ކޮޅާ މެދު ގިނަ ބަޔަކު ސުވާލު އުފައްދާފައިވެ އެވެ. އެމެރިކާގެ އިންޓެލިޖެންސް މަސްދަރު ތަކުން ބުނާ ގޮތުގައި، މުޖުތަބާގެ ހަށިގަނޑުގެ އެއް ފަރާތް ވަނީ ވަރަށް ބޮޑަށް ޒަޚަމުވެފަ އެވެ.

އޭގެ ތެރޭގައި މޫނުފުޅާއި، އަތާއި، ފައި އަދި ބަނޑުގެ ބައެއް ހިސާބު ތަކަށް ލިބިފައިވާ އަނިޔާތައް ހިމެނޭ ކަމަށް ބުނެފައިވެ އެވެ. ނަމަވެސް، އީރާންގެ ރޫހީ ލީޑަރުގެ އޮފީހުގެ ޕްރޮޓޮކޯލް ހެޑް މަޒާހިރު ހުސައިނީ ހުކުރު ދުވަހު ވިދާޅުވީ، މުޖުތަބާގެ ޙާލު ކޮޅު މިހާރު ރަނގަޅު ވަމުން އަންނަ ކަމަށާއި، އޭނާ ހުންނެވި ފުރިހަމަ ޞިއްޙަތެއްގައި ކަމަށެވެ. 

އީރާންގެ ރައީސް މަސްއޫދު ޕެޒެޝްކިއާން ވެސް ވަނީ، މިދިޔަ ހަފުތާގެ ތެރޭގައި މުޖުތަބާއާ ބައްދަލު ކުރައްވައި، ދެ ގަޑިއިރާ ބައި ވަންދެން މަޝްވަރާ ކުރައްވާފައިވާ ކަމަށް ހާމަ ކުރައްވައިފަ އެވެ. މިއީ ހަމަލާ އަށް ފަހު، އީރާންގެ އިސްވެރިޔަކު މުޖުތަބާއާ ބައްދަލު ކުރި ކަމަށް ރިޕޯޓު ކުރި ފުރަތަމަ ފަހަރެވެ. އެމެރިކާގެ އިންޓެލިޖެންސް އެނަލިސްޓުން ބުނާ ގޮތުގައި، މުޖުތަބާ މުއާމަލާތް ކުރައްވަމުން ގެންދަވަނީ އެއްވެސް އިކެލްޓްރޯނިކް ވަސީލަތެއް ބޭނުން ނުކޮށް، ސީދާ ބައްދަލު ކުރާ މީހުން މެދުވެރިކޮށް ނުވަތަ ސިޓީ ފޮނުއްވައިގެންނެވެ. މިކަމުގެ ސަބަބުން އޭނާ ހުންނެވި ތަނެއް ކަށަވަރު ކުރުމަށް އެމެރިކާ އަށް ވަނީ ދަތިތަކާ ކުރިމަތިވެފަ އެވެ. 

މި ހަނގުރާމައިގެ ސަބަބުން އީރާންގެ އަސްކަރީ ޤާބިލުކަން ދަށްވެފައި ވީ ނަމަވެސް، އެ ޤައުމުގެ މިސައިލް ލޯންޗަރު ތަކުގެ ތިން ބައި ކުޅަ ދެ ބައި އަދި ވެސް ސަލާމަތުން ހުރި ކަަމަށް އެމެރިކާގެ އިންޓެލިޖެންސް ރިޕޯޓު ތަކުން ދައްކަ އެވެ. އަދި އެމެރިކާ އިން އީރާން ބަންދުކޮށްގެން (ބްލޮކޭޑް) ގެންގުޅުނު ނަމަވެސް، އިޤްތިޞާދު މުޅިން އިނދަ ޖެހިގެން ނުގޮސް، ކުރިއަށް އޮތް ހަތަރު މަސް ދުވަހު ހިފަހައްޓާލެވޭނެ ކަމަށް ސީއައިއޭގެ އެސެސްމަންޓަކުން ވަނީ ދައްކައިފަ އެވެ. ވައިޓް ހައުސްގެ ތަރުޖަމާނު ވިދާޅުވީ، އެމެރިކާގެ ރައީސް ޑޮނަލްޑް ޓްރަމްޕްގެ ސިޔާސަތުގެ ސަބަބުން އީރާންގެ އިޤްތިޞާދު އިނދަ ޖެހިގެން ދާނެ ކަމަށާއި، އެ ޤައުމުގެ ވެރިކަމުގެ ނިޒާމު ވަނީ ބައިބައިވެފައި ކަމަށެވެ. 

އީރާންގެ މަސްރަހު ދިރާސާ ކުރާ ފަރާތްތަކުން ބުނާ ގޮތުގައި، މުޖުތަބާ ޚާމަނާއީ އާންމުންގެ ތެރެއަށް ނުކުމެވަޑައިގެން ނޫޅުއްވާތީ، އީރާންގެ އިސްލާމިކް ރިވޮލިއުޝަނަރީ ގާޑްސް (އައިއާރުޖީސީ)ގެ އިސްވެރިންނާއި، ޤާނޫނު ހަދާ މަޖިލީހުގެ ރައީސް މުޙައްމަދު ބާގިރު ޣަލިބާފް ގެންދަވަނީ، އެެ ޤައުމުގެ ދުވަހުން ދުވަހަށް ކުރަން ޖެހޭ ކަންކަން ނިންމަވަމުންނެވެ. އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވީ، އީރާންގެ ވެރިކަމުގެ ނިޒާމު ބައިބައިވެފައި އޮތުމަކީ، ހަނގުރާމަ ހުއްޓާލުމަށް ކުރެވޭ މަޝްވަރާ ތަކަށް އޮތް ހުރަހެކެވެ.