އެއް މަސް ދުވަހުގެ ތެރޭގައި، ދެ ވަނަ ފަހަރަށް ޒެލެންސްކީ ސައުދީ އަށް ވަޑައިގެންފި

ޔޫކްރެއިންގެ ރައީސް ވޮލޮޑިމީރް ޒެލެންސްކީ، ރަސްމީ ދަތުރުފުޅެއްގައި ހުކުރު ދުވަހު ސައުދީ އަރަބިއްޔާ އަށް ވަޑައިގެންފި އެވެ. 

މިއީ އެއް މަސް ދުވަހުގެ ތެރޭގައި ޒެލެންސްކީ ސައުދީ އަށް ވަޑައިގެންނެވި ދެ ވަނަ ފަަހަރެވެ. މި ދަތުރުފުޅަކީ ސަލާމަތީ ކަންކަމުގައި އެއްބާރުލުން އިތުރު ކުރުމާއި، ރަޝިޔާ-ޔޫކްރެއިން ހަނގުރާމައިގައި ބޭނުން ކުރަމުންދާ ޒަމާނީ ޓެކްނޮލޮޖީ މެދު އިރުމަތީގެ ޤައުމު ތަކަށް އިޝްތިހާރު ކުރުމަށް ކުރައްވާ ދަތުރުފުޅެކެވެ. 

ސައުދީ އަރަބިއްޔާގެ ޖިއްދާ އަށް ވަޑައިގެންނެވުމަށް ފަހު، އެކްސްގައި ކުރެއްވި ޕޯސްޓެއްގައި ޒެލެންސްކީ ވިދާޅުވީ، ޔޫރަޕުގެ ލީޑަރުންނާ އެކު ބުރާސްފަތި ދުވަހު ބޭއްވި ބައްދަލުވުމުގައި ޔޫކްރެއިންގެ ދެމި އޮތުމަށް ބޭނުންވާ މާލީ އެހީތެރި ކަމުގެ ޔަޤީންކަން ލިބިފައިވާ ކަމަށެވެ. އަދި ހުކުރު ދުވަހު ސައުދީ އާއެކު ސަލާމަތީ ކަންކަމާއި، ހަކަތަ އާއި، އުމްރާނީ ތަރައްޤީގެ ދާއިރާ ތަކުން ވެފައިވާ އެއްބަސްވުންތައް އިތުރަށް ކުރިއަށް ގެންދިޔުމަށް މަަސައްކަތް ކުރައްވާނެ ކަމަށް ވެސް ޒެލެންސްކީ ވިދާޅުވި އެވެ. 

މި ދަތުރުފުޅުގައި ޒެލެންސްކީ، ސައުދީ އަރަބިއްޔާގެ ވަލީ އަހުދު މުޙައްމަދު ބިން ސަލްމާންއާ ބައްދަލު ކުރެއްވުމަށް ވެސް ވަނީ ހަމަޖެހިފަ އެވެ. މި ބައްދަލުވުމުގައި ދެ ޤައުމުގެ ދެ މެދުގައި އޮތް ގުޅުން އިތުރަށް ބަދަހި ކުރުމާ ގުޅޭ ގޮތުން ފުޅާ ދާއިރާއެއްގައި މަޝްވަރާ ކުރައްވާނެ ކަމަށް ބެލެވެ އެވެ. 

މީގެ ކުރިން، މިދިޔަ މެއި މަހުގެ ފަހު ކޮޅުގައި ވެސް ޒެލެންސްކީ ވަނީ ސައުދީ އަށް ވަޑައިގެންފަ އެވެ. އެ ދަތުރުފުޅުގައި ދިފާއީ ދާއިރާ އިން އެއްބާރުލުން ދިނުމާ ގުޅޭ ގޮތުން މުހިންމު އެއްބަސްވުން ތަކެއްގައި ސައުދީ އާއި ޔޫކްރެއިން އިން ވަނީ ސޮއި ކޮށްފަ އެވެ.