"ޕާސްޕޯޓު ބުކްލެޓް" ހުސްވެގެން އިލެކްޓްރޯނިކް ޕާސްޕޯޓް ދޫކުރުން މެދުކަނޑާލައިފި
ޕާސްޕޯޓު ބުކްލެޓް ލިބުމުގައި ދިމާވި ލަސްތަކަކާ ގުޅިގެން، އޯޑިނަރީ އިލެކްޓްރޯނިކް ޕާސްޕޯޓުގެ ބަދަލުގައި 600 ރުފިޔާއަށް "ނޮން-އިލެކްޓްރޯނިކް ޕާސްޕޯޓު" ދޫކުރަން އިމިގްރޭޝަނުން ވަނީ ނިންމާފައި. މި ޕާސްޕޯޓަކީ ފަސް އަހަރުގެ މުއްދަތަށް ދޫކުރާ ބައިނަލްއަގުވާމީ މިންގަނޑުތަކަށް ފެތޭ ލިޔުމެއް ކަމަށާއި، ފަހުން އީ-ޕާސްޕޯޓަކަށް ބަދަލުކުރަން ބޭނުންވާ ފަރާތްތަކަށް ކެންސަލޭޝަން ފީއަކާ ނުލައި އެ ފުރުސަތު ލިބޭނެ ކަމަށް އެ އިދާރާއިން ބުނޭ.
އިމިގްރޭޝަންގެ މުވައްޒަފުންތަކެއް ޚިދުމަތް ދެނީ. | ޕީއެސްއެމް
ދިވެހި "އޯޑިނަރީ އިލެކްޓްރޯނިކް ޕާސްޕޯޓު" ޕްރިންޓް ކުރުމަށް ބޭނުންކުރާ ބުކްލެޓްގެ ސްޓޮކް ގެނައުމުގައި ލަސްތަކެއް ދިމާވުމާ ގުޅިގެން، އީ-ޕާސްޕޯޓު ދޫކުރުން ވަގުތީ ގޮތުން މެދުކަނޑާލައިފި އެވެ.
އިމިގްރޭޝަނުން ބުނީ، ދިވެހި އޯޑިނަރީ އިލެކްޓްރޯނިކް ޕާސްޕޯޓު ޕްރިންޓްކުރުމަށް ބޭނުންކުރާ "ޕާސްޕޯޓު ބުކްލެޓް" ގެ ސްޓޮކް ރާއްޖެއަށް ގެނައުމުގައި ލަސްތަކެއް ދިމާވުމާ ގުޅިގެން، އޯޑިނަރީ އިލެކްޓްރޯނިކް ޕާސްޕޯޓުގެ ސްޓޮކް މެނޭޖްކުރުމުގެ ބޭނުމަށް، 2026 މެއި 09 ވަނަ ދުވަހުން ފެށިގެން ދިވެހި ޕާސްޕޯޓަށް އެދި ހުށަހަޅާ ފަރާތްތަކުގެ ތެރެއިން އޯޑިނަރީ ޕާސްޕޯޓަށް އެދި ހުށަހަޅާ ހުރިހާ ފަރާތްތަކަށް ދޫކުރެވޭނީ "ނޮން-އިލެކްޓްރޯނިކް ޕާސްޕޯޓު" ކަމަށެވެ.
ނޮން-އިލެކްޓްރޯނިކް ޕާސްޕޯޓަކީ ވެސް އިންޓަރނޭޝަނަލް ސިވިލް އޭވިއޭޝަން އޯގަނައިޒޭޝަން (އައި.ކާ.އޯ) ގެ މިންގަނޑުތަކާ އެއްގޮތް 5 އަހަރު ދުވަހުގެ މުއްދަތަށް ދޫކުރެވޭ މެޝިން ރީޑަބަލް ޕާސްޕޯޓެކެވެ. އަދި، "އޯޑިނަރީ އިލެކްޓްރޯނިކް ޕާސްޕޯޓު" ގެ ފީއަކީ 1000 ރުފިޔާ ނަމަވެސް، އޯޑިނަރީ ނޮން-އިލެކްޓްރޯނިކް ޕާސްޕޯޓު ގެ ފީއަކީ 600/ ރުފިޔާ ކަމަށް އިމިގްރޭޝަނުން ބުނެ އެވެ.
މީގެއިތުރުން އިމިގްރޭޝަނުން ބުނީ، މިފަދަ ހާލަތްތަކުގައި މީގެކުރިން އަމަލުކުރާ ގޮތާ ހިލާފަށް، އޯޑިނަރީ ނޮން-އިލެކްޓްރޯނިކް ޕާސްޕޯޓު ހައްދާ ފަރާތްތަކުން ޕާސްޕޯޓުގެ މުއްދަތު ހަމަވުމުގެ ކުރިން އޯޑިނަރީ އިލެކްޓްރޯނިކް ޕާސްޕޯޓެއް ހައްދަން ބޭނުންވާ ހާލަތްތަކުގައި ކެންސަލޭޝަން ފީ ނެގުމަކާ ނުލާ، ޕާސްޕޯޓު ހެއްދޭނެ އިންތިޒާމް ހަމަޖައްސައިދޭނެ ކަމަށެވެ.
މިބަދަލާ ގުޅިގެން ޕާސްޕޯޓުގެ ޚިދުމަތް ހޯދާ ފަރާތްތަކަށް ދިމާވެދާނެ އެންމެހާ ދަތިތަކަށް އިމިގްރޭޝަނުން ވަނީ މާފަށް އެދިފަ އެވެ.
