ޖީސީސީގެ ޤައުމުތަކާ ދެކޮޅަށް އީރާން އިން ދޭ ހަމަލާތަކާ ގުޅިގެން، ސައުދީގެ ވަލީ އަހުދާއި ޔޫއޭއީގެ ރައީސް އިންޒާރެއް ދެއްވައިފި
މި މަޝްވަރާ ތަކުގައި ދެ ބޭފުޅުން ވެސް ވަނީ ޖީސީސީގެ ޤައުމު ތަކަށް އަމާޒުކޮށް އީރާން އިން މެދު ކެނޑުމެއް ނެތި ދެމުންދާ ހަމަލާ ތަކަކީ، މުޅި ސަރަހައްދުގެ ސަލާމަތާއި ރައްކާތެރި ކަމަށް އޮތް ބޮޑު ގޮން ޖެހުމެއްގެ ގޮތުގައި ސިފަ ކުރައްވާފައި.
ޔޫއޭއީގެ ރައީސް ޝައިޚް މުޙައްމަދު ބިން ޒައިދު (ވ) އަދި ސައުދީ އަރަބިއްޔާގެ ވަލީ އަހުދު މުޙައްމަދު ބިން ސަލްމާން | އޭއެފްޕީ
ގަލްފު ކޯޕަރޭޝަން ކައުންސިލް (ޖީސީސީ)ގެ ޤައުމު ތަކަށް އަމާޒުކޮށް އީރާން އިން ދެމުންދާ ހަމަލާ ތަކަކީ ސަރަހައްދީ ހަމަޖެހުމަށް އޮތް ނުރައްކަލެއް ކަމަށް ވިދާޅުވެ، ސައުދީ އަރަބިއްޔާގެ ވަލީ އަހުދު މުޙައްމަދު ބިން ސަލްމާން އާއި، ޔުނައިޓެޑް އަރަބް އެމިރޭޓްސް (ޔޫއޭއީ)ގެ ރައީސް ޝެއިޚް މުޙައްމަދު ބިން ޒައިރު އަލް ނަހްޔާން އިންޒާރު ދެއްވައިފި އެވެ.
ސައުދީ އަރަބިއްޔާގެ ފޮރިން މިނިސްޓްރީ އިން ހޯމަ ދުވަހު ނެރުނު ބަޔާނެއްގައި ބުނެފައި ވަނީ، އެ ޤައުމުގެ ވެރިން ފޯނުން ގުޅުއްވައި ސަރަހައްދީ މަސްރަހުގައި ހިނގަމުންދާ އެންމެ ފަހުގެ ކަންތައްތަކާއި، އަދި އޭގެ ސަބަބުން ސަރަހައްދީ ސަލާމަތާއި ހަމަ ޖެހުމަށް ކުރާނެ އަސަރުތަކާ ގުޅޭ ގޮތުން ފުޅާ ދާއިރާއެއްގައި މަޝްވަރާ ކުރައްވާފައިވާ ކަމަށެވެ.
މި މަޝްވަރާ ތަކުގައި ދެ ބޭފުޅުން ވެސް ވަނީ ޖީސީސީގެ ޤައުމު ތަކަށް އަމާޒުކޮށް އީރާން އިން މެދު ކެނޑުމެއް ނެތި ދެމުންދާ ހަމަލާ ތަކަކީ، މުޅި ސަރަހައްދުގެ ސަލާމަތާއި ރައްކާތެރި ކަމަށް އޮތް ބޮޑު ގޮން ޖެހުމެއްގެ ގޮތުގައި ސިފަ ކުރައްވައިފަ އެވެެ. އަދި މިއި މަސްރަހު އިތުރަށް ގޯސް ވެގެންދާނެ ނުރައްކާތެރި އަމަލު ތަކެއް ކަމަށް ވެސް، ދެ ލީޑަރުން އެއްބަސްވެ ވަޑައިގެންފައިވާ ކަަމަށް އެ ބަޔާނުގައި ވަނީ ހާމަ ކޮށްފަ އެވެ.
މީގެ އިތުރުން ޖީސީސީގެ ޤައުމު ތަކުގެ ސަރަހައްދު ދިފާއު ކުރުމަށާއި، ސަރަހައްދުގެ ސަލާމަތާއި ހަމަޖެހުން ޤާއިމު ކުރުމަށްޓަކައި ކުރަން ޖެހޭ ހުރިހާ މަސައްކަތެއް ކުރިއަށް އޮތް ތަނުގައި ވެސް ކުރަމުންދާނެ ކަމަށް ދެ ބޭފުޅުން ވެސް ވަނީ ވިދާޅުވެފަ އެވެ. އަދި މިކަމަށްޓަކަިއ ލިބެން ހުރި ހުރިހާ ވަސީލަތްތަކާއި، ޤާބިލުކަން ބޭނުން ކޮށްގެން ސަރަހައްދީ ރައްކާތެރިކަން ކަށަވަރު ކުރާނެ ކަމުގެ ޔަޤީންކަން ވެސް ދެ ބޭފުޅުން ވަނީ ދެއްވައިފަ އެވެ.
މިދިޔަ ފެބްރުވަރީ މަހުގެ 28 ވަނަ ދުވަހު އެމެރިކާ އާއި އިޒްރޭލް އިން ވަނީ އީރާން އަށް އަމާޒުކޮށް ހަމަލާ ތަކެއް ދޭން ފަށައިފަ އެވެ. އެ ހަމަލާ ތަކުގެ ރައްދުގައި އީރާން އިން ވެސް ގެންދަނީ ވަރުގަދަ ހަމަލާ ތަކެއް ދެމުންނެވެ. ނަމަވެސް، އީރާން އިން ހަމަލާ އަމާޒު ކުރަނީ ސަރަހައްދީ ޤައުމު ތަކަށް ނޫންކަން ފާހަގަވެފައިވެ އެވެ. އޭގެ ބަދަލުގައި އީރާން އިން ހަމަލާ ދެމުން ދަނީ ސަރަހައްދުގައި ހުރި އެމެރިކާގެ އަސްކަރީ ބޭސް ތަކުގެ އިތުރުން އެމްބަސީ ތަކަށެވެ.
މަސްދަރު: އަލް އަރަބިއްޔާ
