އީރާން އަށް ޝާހިދު ޑްރޯން ފޯރުކޮށްދެނީ ރަޝިޔާ އިން ކަމަށް ޒެލެންސްކީ ވިދާޅުވެއްޖެ

އެމެރިކާ އާއި އިޒްރޭލްއާ ދެކޮޅަށް ބޭނުން ކުރުމަށްޓަކައި އީރާނަށް ޝާހިދު މަރުކާގެ ޑްރޯން ފޯރުކޮށްދެމުން ދަނީ ރަޝިޔާ އިން ކަމަށް، ޔޫކްރެއިންގެ ރައީސް ވޮލޮޑިމީރް ޒެލެންސްކީ ވިދާޅުވެއްޖެ އެވެ.

ޒެލެންސްކީ މިހެން ވިދާޅުވެފައި ވަނީ ސީއެންއެން އަށް ދެއްވި ޚާއްޞަ ބަސްދީގަތުމެއްގަ އެވެ. 

ހޮނިހިރު ދުވަހު އާންމު ކޮށްފައިވާ އެ އިންޓަވިޔުގައި ޒެލެންސްކީ ވިދާޅުވީ، އެމެރިކާގެ އަސްކަރީ މަރުކަޒު ތަަކަށް ހަމަލާ ދިނުމަށް، އީރާން އިން ރަޝިޔާގައި އުފައްދާފައިވާ ޝާހިދު ޑްރޯން ބޭނުން ކޮށްފައިވާކަމީ 100 އިންސައްތަ ކަށަވަރު ހަގީގަތެއް ކަމަށެވެ. މީގެ އިތުރުން މެދު އިރުމަތީގެ އެހެން ޤައުމު ތަކަށް ދީފައިވާ ބައެއް ހަމަލާ ތަކުގައި ވެސް، މި ބާވަތުގެ ޑްރޯން ބޭނުން ކޮށްފައިވާ ކަމަށް ރިޕޯޓުތައް ބުނެ އެވެ. 

ނަމަވެސް، ބައެއް ހަމަލާ ތަކުގައި ބޭނުން ކުރި ޑްރޯން ތަކަކީ ސީދާ ކޮން ޤައުމަކުން އުފެއްދި އެއްޗެއްކަން ދެނެގަތުމުގައި ދަތި ތަކެއް ހުރި ކަމަށް މާހިރުން ވަނީ ފާހަގަ ކޮށްފަ އެވެ. 

ޝާހިދު ޑްރޯން އަކީ އަގު ބޮޑު މިސައިލް ތަކުގެ ބަދަލުގައި ބޭނުން ކުރެވޭނެ ޚަރަދު ކުޑަ ވަސީލަތެއްގެ ގޮތުގައި އީރާން އިން އެންމެ ފުރަތަމަ އުފެއްދި އެއްޗެކެވެ. ޔޫކްރެއިންގެ އޮފިޝަލުން ވިދާޅުވާ ގޮތުގައި، 2022 ވަނަ އަހަރުގެ ފަހު ކޮޅުން ފެށިގެން، ރަޝިޔާ އިން ޔޫކްރެއިން އަށް ދެމުންދާ ހަމަލާ ތަކުގައި ވެސް، މި ބާވަތުގެ އެތައް ހާސް ޑްރޯންއެއް ވަނީ ބޭނުން ކޮށްފަ އެވެ. 

މި ޑްރޯންތައް އެންމެ ފުރަތަމަ ރަޝިޔާ އަށް ފޯރުކޮށްދިނީ އީރާން އިން ކަމަށް ވީ ނަަމަވެސް، މިހާރު ރަޝިޔާ އިން އަމިއްލަ އަށް މި ބާވަތުގެ ޑްރޯން އުފައްދާ ކަމަށް ރިޕޯޓުތައް ބުނެ އެވެ. ޝާހިދު މަރުކާގެ ޑްރޯން ތަކުގެ ބޭނުން ތެރިކަން ބޮޑުވުމާ އެކު، އެހެން ޤައުމު ތަކުގެ އަސްކަރިއްޔާ ތަކުން ވެސް މިހާާރު ދަނީ މިފަދަ ޑްރޯންތައް ބޭނުން ކުރަމުންނެވެ. އޭގެ ތެރޭގައި އެމެރިކާގެ އަސްކަރިއްޔާ ވެސް ހިމެނޭއިރު، އީރާންއާ ދެކޮޅަށް ކުރިއަށް ގެންދާ ބައެއް ޙަރަކާތް ތަކުގައި މިފަދަ ޑްރޯން ބޭނުން ކުރާ ކަމަށް އެމެރިކާ އިން ވަނީ ހާމަ ކޮށްފަ އެވެ. 

ރަޝިޔާ އާއި އީރާާންއާ ދެމެދު އޮންނަ އަސްކަރީ ގުޅުން ވަރުގަދަ ވަމުން އަންނަ ދަނޑިވަޅެއްގައި، ޒެލެންސްކީ މިފަދަ ތުހުމަތެއް ކުރެއްވުމަކީ ބައިނަލްއަޤުވާމީ މަސްރަހުގައި ބޮޑު ސަމާލު ކަމެއް ލިބިގެން ދާނެ ކަމެކެވެ.