ހަނގުރާމަ މެދު ކަނޑާލުމުގެ މުއްދަތު ޓްރަމްޕް އިތުރު ކުރައްވައިފި
22 އެޕްރީލު 2026 | ބުދަ 05:26ސޯޝަލް މީޑިއާގައި ދެއްވި ބަޔާނެއްގައި ޓްރަމްޕް ވިދާޅުވީ، ހަމަލާ ބަދަލު ކުރުން ހުއްޓާލުމުގެ މުއްދަތު އިތުރު ކުރަން ނިންމެވީ، ސުލްޙައިގެ ވާހަކަ ތަކުގައި މެދުވެރިއެއްގެ ދައުރު އަދާ ކުރާ ޕާކިސްތާންގެ އެދުމުގެ މަތީން ކަމަށް.
އެމެރިކާގެ ރައީސް ޑޮނަލްޑް ޓްރަމްޕް. | ރޮއިޓާސް
އެމެރިކާ އާއި އީރާންއާ ދެމެދު ހަނގުރާމަ މެދު ކަނޑާލުމަށް ޤާއިމު ކޮށްފައިވާ އެއްބަސްވުމުގެ މުއްދަތު ހަމަވާން މަދު ވަގުތު ކޮޅަކަށް ވެފައި ވަނިކޮށް، މުއްދަތެއް ނެތް ގޮތަށް އެ މުއްދަތު އިތުރު ކޮށްފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްްޕް އިއުލާން ކުރައްވައިފި އެވެ.
އަންގާރަ ދުވަހު ޓްރަމްޕް މި ނިންމުން ނިންމަވާފައި ވަނީ، އެމެރިކާ އާއި އީރާންއާ ދެމެދު ކުރިއަށް ގެންދާ މަޝްވަރާ ތަކާއި، ސުލްޙައިގެ ވާހަކަ ތަކަށް ފުރުސަތު ދިނުމުގެ ގޮތުންނެވެ.
ސޯޝަލް މީޑިއާގައި ދެއްވި ބަޔާނެއްގައި ޓްރަމްޕް ވިދާޅުވީ، ހަމަލާ ބަދަލު ކުރުން ހުއްޓާލުމުގެ މުއްދަތު އިތުރު ކުރަން ނިންމެވީ، ސުލްޙައިގެ ވާހަކަ ތަކުގައި މެދުވެރިއެއްގެ ދައުރު އަދާ ކުރާ ޕާކިސްތާންގެ އެދުމުގެ މަތީން ކަމަށެވެ. އަދި އީރާންގެ ލީޑަރުންނާއި، މަންދޫބުންނަށް އެއްބަސްވެވޭ ފަދަ ހުށަހެޅުމަކާ އެކު އާދެވެންދެން، އެ ޤައުމަށް ދޭން ނިންމާފައިވާ ހަމަލާތައް މަޑު ޖައްސާލުމަށް އެއްބަސްވެ ވަޑައިގެންފައިވާ ކަމަށް ޓްރަމްޕް ވިދާޅުވި އެވެ.
މިއީ އީރާންގެ އިންޖީނުގެ ތަކާއި، އާންމު އުމްރާނީ ވަސީލަތް ތަކަށް ބޮން އެޅުމަށް ޓްރަމްޕް ތަކުރާރުކޮށް ދެއްވަމުން ގެންދެވި އިންޒާރު ތަކުން ފަހަތަށް ޖެހިވަޑައިގެންނެވި އެންމެ ފަހުގެ ފަހަރެވެ.
އެމެރިކާ އާއި އިޒްރޭލް ގުޅިގެން އީރާން އަށް ހަމަލާ ދޭން ފަށާފައި ވަނީ މިދިޔަ ފެބްރުވަރީ މަހުގެ 28 ވަނަ ދުވަހު އެވެ. ހަމަލާ ބަދަލު ކުރުން މެދު ކަނޑާލުމުގެ މުއްދަތު އިތުރު ކުރެއްވުމަށް ފަހު ޓްރަމްޕް ވިދާޅުވީ، އެ ނިންމެވުން ނިންމެވީ އީރާންގެ ސަރުކާރު ވަރަށް ބޮޑަށް ބަލިކަށިވެފައިވާތީ ކަމަށެވެ.
އެމެރިކާ އާއި އިޒްރޭލް އިން ދިން ހަމަލާ ތަކުގައި އީރާންގެ ކުރީގެ ރޫހީ ލީޑަރު އާޔަތުﷲ އަލީ ޚާމަނާއީ އާއި، އެ ޤައުމުގެ ނުފޫޒު ގަދަ ލީޑަރެއް ކަމަށްވާ އަލީ ލަރިޖާނީގެ އިތުރުން، އެހެން އިސް ބޭފުޅުން ވެސް ވަނީ އަވަހާރަ ކޮށްލައިފަ އެވެ.
ޓްރަމްޕް ވިދާޅުވީ އީރާންގެ ބަނދަރުތަކާއި، އައްސޭރި ފަށުގެ ސަރަހައްދުތައް އެމެރިކާގެ ކަނޑުގެ ސިފައިން މެދުވެރިކޮށް ބަންދު ކޮށްފައި އޮތް އޮތުން ކުރިއަށް ގެންދަވާނެ ކަމަށެވެ. މިއީ ހަނގުރާމައިގެ އަމަލެއް ކަމަށް އީރާން އިން ބުނަމުންދާއިރު، ޕާކިސްތާންގެ ވެރި ރަށް އިސްލާމްއާބާދުގައި ބޭއްވުމަށް ހަމަޖެހިފައިވާ ދެ ވަނަ ބުރުގެ މަޝްވަރާ ތަކަށް މަންދޫބުން ފޮނުވުމާ މެދު އީރާން އިން އޮތީ ވަކި ގޮތެއް ނުނިންމަ އެވެ.
އީރާންގެ ތަސްނީމް ނިއުސް އެޖެންސީ އިން ރިޕޯޓު ކޮށްފައިވާ ގޮތުގައި، އެމެރިކާ އާއެކު ބާއްވާ މަޝްވަރާ ތަކަށް އެއްވެސް ވަފުދެއް ނުފޮނުވާނެ ކަމަށް އީރާން އިން ވަނީ ޕާކިސްތާން އަށް އަންގައިފަ އެވެ.
މަސްދަރު: ރޮއިޓާސް
