ހަނގުރާމަ އަލުން ފަށައިފި ނަމަ، އީރާން އިން އައު ކާޑު ތަކެއް ބޭނުން ކުރާނެ!

އެމެރިކާ އާއި އިޒްރޭލުން އީރާންއާ ދެކޮޅަށް އަލުން ހަނގުރާމަ ފަށައިފި ނަމަ، އީރާނުން އައު ކާޑު ތަކެއް ބޭނުން ކުރާނެ ކަމުގެ އިންޒާރު އީރާންގެ ޤާނޫނު ހަދާ މަޖިލީހުގެ ރައީސް މުޙައްމަދު ބާޤިރު ޣަލިބާފް ވިދާޅުވެއްޖެ އެވެ.

ޣަލިބާފް މިހެން ވިދާޅުވެފައި ވަނީ، ހަނގުރާމަ މެދު ކަނޑާލުމަށް އެއްބަސްވެފައިވާ ދެ ހަފުތާގެ މުއްދަތު ހަމަވާން ކައިރި ވެފައި ވަނިކޮށެވެ. މި މުއްދަތުގެ ތެރޭގައި ހަނގުރާމަ ހުއްޓާލުމުގެ ދާއިމީ އެެއްބަސްވުމެއް ހޯދުމަށް ޕާކިސްތާނުން އަންނަނީ ވަރަށް ބޮޑަށް މަސައްކަތް ކުރަމުންނެވެ. 

އެމެރިކާ އާއެކު، ޕާކިސްތާނުގެ ވެރި ރަށް އިސްލާމްއާބާދުގައި ބޭއްވި މަޝްވަރާ ތަކުގައި އީރާންގެ އިސް ބޭފުޅެއްގެ ގޮތުގައި ވެސް ހުންނެވި ޣަލިބާފް އެކްސްގައި ކުރެއްވި ޕޯސްޓެއްގައި ވިދާޅުވީ، ބިރު ދެއްކުން ތަކުގެ ދަށުން އީރާނުން މަޝްވަރާ ތަކުގައި ބައިވެރި ނުވާނެ ކަމަަށެވެ. އަދި ހަނގުރާމައިގެ މައިދާނުގައި އައު ކާޑު ތަކެއް ދެއްކުމަށް، ފާއިތުވި ދެ ހަފުތާގައި އީރާން އިން ތައްޔާރުވެފައިވާ ކަމަށް ވެސް އޭނާ ވިދާޅުވި އެވެ.

ބިރު ދެއްކުމުގެ ދަަށުން، އީރާނުން އެމެރިކާ އާއެކު މަޝްވަރާ ތަކަށް ނުދާނެ ކަމަށް ޣަލިބާފް ވަނީ ވިދާޅުވެފަ އެވެ. އެމެރިކާގެ ރައީސް ޑޮނަލްޑް ޓްރަމްޕް މަސައްކަތް ކުރައްވަނީ މަޝްވަރާ ތަކުގެ މޭޒު، ހަލާކުގެ މޭޒަކަށް ބަދަލު ކުރަން ކަމަށް ވެސް އޭނާ ވިދާޅުވެފައިވެ އެވެ. 

ޣަލިބާފް މި ވާހަކަތައް ދެއްކެވީ އީރާން އިން މަޝްވަރާ ތަކުގައި ބައިވެރި ވާނެ ކަމުގެ ޔަޤީންކަން ނެތް ނަމަވެސް، އެމެރިކާ އާއި އީރާންއާ ދެމެދު ދެ ވަނަ ބުރުގެ މަޝްވަރާ ތަކެއް ބޭއްވުމަށް ޕާކިސްތާނުން ތައްޔާރު ވަމުން އަންނަ ވަގުތެއްގަ އެވެ. އީރާން އިން ވަނީ މަޝްވަރާ ތަކުގައި ބައިވެރިވުމާ މެދު ޕޮޒިޓިވްކޮށް ވިސްނަމުންދާ ކަމަށް ހާމަ ކޮށްފަ އެވެ. 

ދެ ހަފުތާގެ މުއްދަތަކަށް ހަނގުރާމަ މެދު ކަނޑާލުމަށް އެއްބަސްވެފައިވާއިރު، އެ މުއްދަތު މި ހަފުތާގެ ތެރޭގައި ހަމަވާނެ އެވެ. އެމެރިކާ އާއި އީރާން އިން ވެސް ގެންދަނީ، ދެ ފަރާތުން ވެސް ހަނގުރާމަ މެދު ކަނޑާލުމުގެ އެއްބަސްވުމާ ޚިލާފުވެފައިވާ ކަމަށް ތުހުމަތު ކުރަމުންނެވެ. 

އެމެރިކާ އާއި އީރާންއާ ދެމެދު މިހާރު ވެސް ނުތަނަވަސްކަން ވަނީ އިތުރުވެފަ އެވެ. ސަރަހައްދީ ބާރުތަކާ ދެެމެދު ވެސް ވަނީ ނުތަނަވަސްކަން އިތުރުވެފަ އެވެ.