ނާކާމިޔާބުވުމުން ކެމްޕޭން ޓީމުގެ ބޮލުގައި އިލްޒާމު އެޅުވުމަކީ، ލީޑަރެއްގެ ހުންނަންޖެހޭ އަސާސީ ޒިންމާއަށް ފުރަގަސްދިނުން!

ފެންނަނުފެންނަ ވޯޓާއި، އެއާ އެކު ކުރިއަށްދިޔަ ލޯކަލް ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ ބައި-އިލެކްޝަންތަކުގެ ނަތީޖާއަށް ފަހު ރައީސުލްޖުމްހޫރިއްޔާ ޑރ މުޙައްމަދު މުއިއްޒުގެ ފަރާތްޕުޅުން ފެންނަމުން މިދަނީ ނާކާމިޔާބީގެ ޒިންމާއިން ރެކެން އުޅުއްވާ މަންޒަރެވެ.  

އިންތިޚާބުގެ ނަތީޖާއާ ގުޅިގެން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވަމުން ގެންދަވަނީ، މި ނާކާމިޔާބީ ކުރިމަތިވީ ކެމްޕޭން ޓީމުތަކުގެ ގާބިލުކަން ނެތުމުން ކަމަށާއި، ރައްޔިތުންނަށް ބޮޑަށް އަޑު އިވުނީ އިދިކޮޅު ފަރާތްތަކުގެ ވާހަކަތައް ކަމަށެވެ. ނަމަވެސް، މި އިންތިޚާބު ބޭއްވުނު ޙާލަތަށް ބަލާއިރު، މި ވާހަކަތަކަކީ އަސްލެއް ނެތް، ބުހުތާނު ދޮގުތަކެއްކަން ހާމައަށް ފެންނަން އެބައޮތެވެ.

އެންމެ ފުރަތަމަ ކަމަކަށް، ރެފަރެންޑަމް ވޯޓު ނެގުމަށް ރައީސް ނެރުއްވި ޤަރާރަށް ބަލާލި ނަމަވެސް ފެންނަން އޮތީ ހަމައެކަނި ރައީސް ތާއީދު ކުރައްވާ ކޮޅު އެކަންޏެވެ. ޤާނޫނު މިހާރު އޮތް ގޮތުން ދެކޮޅު ގެންނަން ކޮންމެހެން ލާޒިމު ނުވިނަމަ ވެސް، ރައީސްގެ ހެޔޮ ނިޔަތެއް އޮތްނަމަ، ކަން ކުރެއްވީހީ އެހެނެއްވެސް ނޫނެވެ.

ދެވަނަ ކަމަކަށް ސަރުކާރުގެ މެސެޖުތައް ރައްޔިތުންނާ ހަމައަށް ފޯރާފައިނުވާ ކަމަށް ބުނާ ބުނުމަކީ، ކެމްޕޭން ދުވަސްވަރު ދައުލަތުގެ ވަސީލަތްތައް ބޭނުންކޮށްފައިވާ މިންވަރަށް ބަލާއިރު ގަބޫލުކުރަން ދަތި ވާހަކައެކެވެ. ދައުލަތުގެ މީޑިއާތަކުން ވަނީ ސަރުކާރުގެ ސިޔާސަތުތަކަށް ތާއީދުކޮށް، ރައީސުލްޖުމްހޫރިއްޔާގެ އެޖެންޑާ ކުރިއެރުވުމަށް މެދުކެނޑުމެއްނެތި މަސައްކަތްކޮށްފައެވެ.

މީޑިއާގެ އިތުރުން، ކެމްޕޭނަށް އެހީތެރިވުމަށް ދައުލަތުގެ އެކި ވަސީލަތްތައް ބޭނުންކުރިކަމުގެ ހެކިތައް ވެސް ފެންނާން ހުއްޓެވެ. އިންތިޒާމުވެގެން ބޭއްވި ޖަލްސާތަކުން ފެށިގެން، ސަރުކާރަށް ތާއީދު ހޯދުމަށް ކުރި ވަރުގަދަ މަސައްކަތްތަކަކީ އެންމެންނަށް ފެންނަން އޮތް ހަގީގަތެކެވެ. މިފަދަ ހާލަތެއްގައި، ރައްޔިތުންނަށް އަޑުއިވުނީ ހަމައެކަނި "އިދިކޮޅު ފަރާތްތަކުގެ ވާހަކަ" ކަމަށް ބުނުމަކީ، އިންތިޚާބުގެ ނާކާމިޔާބީގެ ހަގީގީ ސަބަބުތައް ފޮރުވުމަށް ދައްކާ ބަހަނާއެވެ.

މީގެ އިތުރުން، އިންތިޚާބުގެ ނަތީޖާއިން ފެންނަނީ މިއަށްވުރެ ސާފު އަދި ވަރުގަދަ މެސެޖެކެވެ. ވަކިން ހާއްސަކޮށް، ފެންނަނުފެންނަ ވޯޓަކީ ރައްޔިތުންގެ ޝުއޫރުތައް ހުރިގޮތް ވަޒަންކޮށްލަން ލިބުނު ސީދާ ފުރުސަތެކެވެ. ރައީސުލްޖުމްހޫރިއްޔާ ހުށަހެޅުއްވި ހުށަހެޅުއްވުމާ ދެކޮޅަށް 130,919 އަށްވުރެ ގިނަ ވޯޓު ލިބިފައިވާއިރު، މިއީ 2023 ވަނަ އަހަރުގެ ރިޔާސީ އިންތިޚާބުގެ ދެވަނަ ބުރުގައި އެމަނިކުފާނަށް ލިބިވަޑައިގަތް 129,159 ވޯޓަށްވުރެ ވެސް އިތުރު އަދަދެކެވެ. މިއީ ހަމައެކަނި ކެމްޕޭނުގައި ހެދުނު ގޯހަކުން ނުވަތަ ކުޑަ ތަފާތަކުން ދިމާވި ނަތީޖާއެއް ނޫނެވެ. މިއީ ރައްޔިތުންގެ ބޮޑު ބައެއްގެ ތާއީދު ސަރުކާރަށް ގެއްލިފައިވާކަން ހިސާބުތަކުން ހާމަވާ ވަރުގަދަ ހެއްކެކެވެ.

އެ ދުވަހު ބޭއްވުނު ލޯކަލް ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ ބައި-އިލެކްޝަންތަކުގެ ނަތީޖާއަށް ބަލާއިރު ވެސް ފެންނަނީ މިފަދަ މަންޒަރެކެވެ. އާންމު ރައްޔިތުންގެ ސިޔާސީ ވިންދު ހުރިގޮތް ހާމަކޮށްދޭ މި އިންތިޚާބުތަކުން ވެސް ދައްކުވައިދިނީ، ސަރުކާރަށް އޮތް އިތުބާރު ކުޑަވެފައިވާ މިންވަރެވެ. އެކި ދާއިރާތަކުގެ އިންތިޚާބުތަކުން މިފަދަ އެއްގޮތް ނަތީޖާއެއް ފެނުމުން އެނގެނީ، މިއީ ހަމައެކަނި ކެމްޕޭން ހިންގުމުގައި ދިމާވި މައްސަލައެއް ނޫން ކަމެވެ. އޭގެ ބަދަލުގައި، މިއީ ސަރުކާރާއި ރައްޔިތުންނާ ދެމެދު އޮތް ގުޅުން ކެނޑިފައިވާކަމުގެ ހެއްކެކެވެ.

ފެންނަނުފެންނަ ވޯޓުގައި ރައީސުލްޖުމްހޫރިއްޔާގެ ހުށަހެޅުއްވުމާ ދެކޮޅަށް ވޯޓުލީ މީހުންގެ ނިސްބަތް ގާތްގަނޑަކަށް 70 އިންސައްތައަށް އެރުމަކީ މިކަން އިތުރަށް ކަށަވަރުކޮށްދޭ ކަމެކެވެ. ސިޔާސީ މަސްރަހުގެ ހަގީގަތްތައް ހަމައެކަނި އިންސައްތައަކުން ބަޔާން ނުކުރެވުނު ނަމަވެސް، މިފަހަރުގެ ނަތީޖާއަކީ ދޫކޮށްލެވޭވަރަށްވުރެ ބޮޑު ނަތީޖާއެކެވެ. މިއިން ދޭހަވަނީ ވެރިކަމާ ހަވާލުވެވަޑައިގަތްތާ ކުޑަ ދުވަސްކޮޅެއްގެ ތެރޭގައި، ސަރުކާރުގެ ހިންގުމާ މެދު ރައްޔިތުންގެ މެދުގައި އުފެދިފައިވާ ބޮޑު ނުރުހުމެކެވެ.

މިފަދަ ހާލަތެއްގައި ކެމްޕޭން ޓީމުތަކުގެ ބޮލުގައި އިލްޒާމު އެޅުވުމަކީ، ލީޑަރެއްގެ ހުންނަންޖެހޭ އަސާސީ ޒިންމާއަށް ފުރަގަސްދިނުމެވެ. އިންތިޚާބުތަކުގެ ނަތީޖާއަކީ، ހާއްސަކޮށް މިހާ ބޮޑު ތަފާތަކުން ނުކުންނަ ނަތީޖާއަކީ، ހަމައެކަނި ކެމްޕޭން ޓީމުގެ ބޮލުގައި ޒިންމާ އަޅުވާފައި ނިންމާލެވޭ ވަރު ކަމެއް ނޫނެވެ. އެއީ ސަރުކާރުގެ ސިޔާސަތުތަކާއި، ވެރިކަން ކުރާ ގޮތާއި، ރައްޔިތުންނާ ބާއްވާ މުއާމަލާތްތަކުގެ މައްޗަށްވެސް ބިނާވެފައިވާ ކަމެކެވެ.

އެހެންކަމުން ރައީސްގެ ފަރާތްޕުޅުން ފެންނަމުން މި ދަނީ ސިޔާސީ ގޮތުން ޒިންމާދާރުވުމުގެ ބަދަލުގައި ބަޔަކު ކުށްވެރިކޮށްލެވޭތޯ އުޅުއްވާ މަންޒަރެވެ. ނަމަވެސް ޤަބޫލު ކުރަންޖެހޭ ޙަގީގަތަކީ ފެންނަނުފެންނަ ވޯޓުގެ ނަތީޖާއާއި އެހެނިހެން އިންތިޚާބުތަކުގެ ނަތީޖާއަކީ ރައްޔިތުން ސަރުކާރަށް ދިން ވަރުގަދަ ސިގްނަލެއްކަމެވެ. ދެން އޮތްތަނުގައިވެސް ސަރުކާރުގެ ކުރިމަގު ބިނާވެގެންދާނީ މި ސިގްނަލް ގަބޫލުކުރުމުން ނުވަތަ އެއަށް ފުރަގަސްދިނުމުގެ މައްޗަށެވެ.

ހަގީގަތުގައި ރައްޔިތުންނަށް މައުލޫމާތު ފޯރުކޮށްނުދެވުނުކަމަށް ބުނާ ވާހަކައަކީ ކެމްޕޭނުގެ ހަގީގީ މަންޒަރާއި އިންތިޚާބުގެ ސާފު ނަތީޖާއާ ދިމާވާ ވާހަކައެއް ނޫނެވެ. ރައްޔިތުން މިވަނީ ހިސާބުތަކުން ފެންނަން އޮތް ސާފު ނިންމުމެއް ނިންމާފައެވެ. މިހާރު އުފެދޭ ސުވާލަކީ، ރައްޔިތުން ދިން އެ މެސެޖު ސަރުކާރަށް ހަގީގަތުގައި ވެސް އަޑުއިވޭނެތޯއެވެ؟