ނިއު ރޭޑިއަންޓް ވަރުގަދަ ކުރަނީ، ޤައުމީ ޓީމުގެ ގިނަ ކުޅުންތެރިން ތަކެއް ފެންނާނެ
14 އެޕްރީލު 2026 | އަންގާރަ 05:51މުބީން ވިދާޅުވީ ޤައުމީ ޓީމަށް ކުޅެމުން އަންނަ ހަތް ކުޅުންތެރިން ނުވަތަ އަށް ކުޅުންތެރިން، ކުރިއަށް އޮތް ސީޒަންގައި ނިއު ރޭޑިއަންޓުގެ ޖާޒީގައި ފެންނާނެ ކަމަަށް. އަދި ނިއު ރޭޑިއަންޓުގެ އިސްވެރިންގެ އަމާޒަކީ ކުލަބުގެ ސަޕޯޓަރުން ފަޚުރުވެރިވާ ފަދަ ވަރުގަދަ ޓީމެއް ބިނާ ކުރުން ކަމަށް ވެސް މުބީން ވިދާޅުވި.
ނިއު ރޭޑިއަންޓްގެ ޗެއާމަން އަޙުމަދު މުބީން. | ސޯޝަލް މީޑިއާ
ފުރަތަމަ ޑިވިޝަންގައި ވާދަކުރަމުން އަންނަ ނިއު ރޭޑިއަންޓް ސްޕޯޓްސް ކުލަބު ވަރުގަދަ ކުރުމުގެ މަސައްކަތް ކުރަމުން އަންނަ ކަމަށާއި، ރާއްޖޭގެ ޤައުމީ ޓީމަށް ކުޅޭ ގިނަ ކުޅުންތެރިން ތަކެއް ނިއު ރޭޑިއަންޓް އިން ފެންނާނެ ކަމަށް އެ ކުލަބުގެ ޗެއާމަން އަޙުމަދު މުބީން ވިދާޅުވެއްޖެ އެވެ.
ސޯޝަލް މީޑިއާގައި ކުރެއްވި ޕޯސްޓެއްގައި މުބީން ވިދާޅުވީ، ކުރިއަށް އޮތް ސީޒަނަށް ކުލަބު ވަރުގަދަ ކުރުމުގެ މަސައްކަތް އިސްވެރިން ގެންދަނީ ވަރަށް ބޮޑަށް ކުރަމުން ކަމަށެވެ. ނަމަވެސް، ނިއު ރޭޑިއަންޓް ވަރުގަދަ ކުރުމަށް ކުރަމުން އަންނަ މަސައްކަތުގައި، ވާދަވެރި މާޒިޔާ ސްޕޯޓްސް އެންޑް ރެކްރިއޭޝަންގެ އެއްވެސް ފޯވާޑަކު ގެނައުމުގެ ޝައުޤުވެރިކަން ނެތް ކަމަށް މުބީން ވިދާޅުވި އެވެ.
މުބީން ވިދާޅުވީ ކުޅުންތެރިން ގެނައުމުގައި ނިއު ރޭޑިއަންޓް އިން އިސްކަން ދޭނީ ތިން ކަމަކަށް ކަމަށެވެ. އެގޮތުން ކުޅިވަރުގެ ރިވެތި އަޚުލާޤާއި، ގުޅިގެން މަސައްކަތް ކުރުމުގެ ރޫޙު އަދި ކުލަބުގެ ސަޕޯޓަރުންނަށް އިޙުތިރާމް ހޯދައި ދިނުން ހިމެނޭ ކަމަށް ވެސް މުބީން ވިދާޅުވި އެވެ.
އެއާ އެކު މުބީން ވިދާޅުވީ ޤައުމީ ޓީމަށް ކުޅެމުން އަންނަ ހަތް ކުޅުންތެރިން ނުވަތަ އަށް ކުޅުންތެރިން، ކުރިއަށް އޮތް ސީޒަންގައި ނިއު ރޭޑިއަންޓުގެ ޖާޒީގައި ފެންނާނެ ކަމަަށެވެ. އަދި ނިއު ރޭޑިއަންޓުގެ އިސްވެރިންގެ އަމާޒަކީ ކުލަބުގެ ސަޕޯޓަރުން ފަޚުރުވެރިވާ ފަދަ ވަރުގަދަ ޓީމެއް ބިނާ ކުރުން ކަމަށް ވެސް މުބީން ވިދާޅުވި އެވެ.
މުބީން މިހެން ވިދާޅުވެފައިވާއިރު، މާޒިޔާ ދޫކޮށްލަން ނިންމާފައިވާ ހަމްޒާ މުޙައްމަދު (ހަމްޕު) ހޯދަން ނިއު ރޭޑިއަންޓް އިން މަސައްކަތް ކުރާ ކަމުގެ އަޑު ތަކެއް ފެތުރުނެވެ. ނަމަވެސް މާޒިޔާގެ ފޯވާޑު ލައިންގައި ހިމެނޭ އެއްވެސް ކުޅުންތެރިޔަކު ގެންނަން ނިއު ރޭޑިއަންޓް އިން ބޭނުން ނުވާ ކަަމަށް މުބީންގެ ޕޯސްޓުގައި ވަނީ ވިދާޅުވެފަ އެވެ. އިތުރު މަސްދަރު ތަކުން މައުލޫމާތު ލިބިފައިވާ ގޮތުގައި ނިއު ރޭޑިއަންޓް އިން ހަމްޕު ގެންނަން މަސައްކަތް ނުކުރެ އެވެ.
ނިއު ރޭޑިއަންޓުގެ ޗެއާމަންކަމާ މުބީން ހަވާލުވެ، އޭނާ ގެންދަވަނީ ނިއު ވަރުގަދަ ކުރުމަށް ގިނަ މަސައްކަތް ތަކެއް ކުރަމުންނެވެ. ގިނަ އަހަރު ތަކަކަށް ފަހު ނިއު ރޭޑިއަންޓް އިން ފުރަތަމަ ޑިވިޝަންގައި ވާދަ ކުރަމުން އަންނައިރު، ނިމުނު ސީޒަންގެ ދިވެހި ޕްރިމިއާ ލީގު އެ ޓީމުން ނިންމާލީ ތިން ވަނައިގަ އެވެ.
