އދ. ދިއްދޫ ކަައުންސިލް އިދާރާގެ މުވައްޒަފުންނަށް ނިމިދިޔަ މަހުގެ މުސާރަ ޖަމާވީ މިއަދު
އދ. ދިއްދޫގެ ކައުންސިލްގެ މުސާރަ ތައްޔާރުކުރާ މުވައްޒަފު ޗުއްޓީގައި ހުރުމާއި، އިދާރީ ބައެއް ބަދަލުތަކާ ގުޅިގެން، އެ އިދާރާގެ މުވައްޒަފުންނަށް މާރިޗު މަހުގެ މުސާރަ ލިބުން އަށް ދުވަހަށް ލަސްވެއްޖެ. މިކަމާ ގުޅިގެން މުވައްޒަފުންގެ ޝަކުވާ ބޮޑުވެފައިވާއިރު، ކައުންސިލުން ބުނަނީ މުސާރަ ލަސްވީ ސެކްރެޓަރީ ޖެނެރަލް ކުއްލި ގޮތަކަށް އިސްތިއުފާ ދެއްވުމުން ދިމާވި އިދާރީ މައްސަލަތަކެއްގެ ސަބަބުން ކަމަށް. ނަމަވެސް ބައެއް ފަރާތްތަކުން ތުހުމަތުކުރާ ގޮތުގައި މުސާރަ ދިނުމުގެ އިންތިޒާމުތައް ހަމަނުޖެހުނީ ކައުންސިލްގެ އިސްވެރިން ސަރުކާރު ކެނޑިޑޭޓުންގެ ކެމްޕެއިން ހަރަކާތްތަކުގައި އަވަދިނެތި އުޅުއްވުމުގެ ސަބަބުން.
ރައީސުލްޖުމްހޫރިއްޔާ، އދ. ދިއްދޫ އަށް ކުރެއްވި ދަތުރުފުޅުގެ ތެރެއިން | ރައީސް އޮފީސް
އދ. ދިއްދޫގެ ރަށު ކައުންސިލް އިދާރާގައި މަސައްކަތްކުރާ މުވައްޒަފުންނަށް ނިމިދިޔަ މާރިޗު މަހުގެ މުސާރަ ލިބިފައި ވަނީ، މަސް ނިމި އަށް ދުވަސް ފަހުން މިއަދު ކަމަށް އެނގިއްޖެ އެވެ.
މިކަމާ ގުޅޭގޮތުން ނަން ނުޖެހުމަށް ޝަރުތުކޮށް ރާއްޖެ އެމްވީ އަށް މައުލޫމާތު ދިން އެ ރަށުގެ މީހަކު ބުނީ، ކައުންސިލް މުވައްޒަފުންގެ މުސާރަ ދިނުން ލަސްވީ އެ މަސައްކަތް އާންމުކޮށް ކުރާ މުވައްޒަފު މިވަގުތު ޗުއްޓީގައި ހުރުމުން ކަމަށެވެ. އަދި މުސާރަ ޝީޓް ތައްޔާރުކުރުމުގެ މަސައްކަތް އެނގޭ އިތުރު މުވައްޒަފަކު ކައުންސިލް އިދާރާގައި ނެތުމަކީ މުސާރަ ލަސްވާން މެދުވެރިވި ސަބަބެއް ކަމަށް އޭނާ ފާހަގަކުރި އެވެ.
ރާއްޖެ އެމްވީ އަށް މައުލޫމާތު ލިބިފައިވާ ގޮތުގައި، މުސާރައިގެ މަސައްކަތްކުރާ މުވައްޒަފު ޗުއްޓީ އަށް ދިއުމުގެ އެތައް މަހެއް ކުރިން އެކަން ކައުންސިލަށް ވަނީ އަންގާފަ އެވެ. ނަމަވެސް، މަސް ނިމުމުގެ ކުރިން މުވައްޒަފުންނަށް މުސާރަ ދެވޭނެ އިންތިޒާމެއް ހަމަޖެއްސުމުގެ ބަދަލުގައި، ކައުންސިލްގެ ޒިންމާދާރު ބައެއް މެންބަރުން އުޅުއްވީ ސަރުކާރުގެ ކެންޑިޑޭޓުންނަށް ކެމްޕެއިން ކުރުމުގައި ވަރަށް އަވަދިނެތި ކަމަށް ވަނީ މައުލޫމާތު ލިބިފަ އެެވެ.
މި މައްސަލައާ ގުޅިގެން ދިއްދޫ ކައުންސިލްގެ އިންތިޚާބީ ރައީސް އަނީސް މުހައްމަދު ވިދާޅުވީ، މުސާރަ ދިނުން ލަސްވީ ކައުންސިލްގެ ސެކްރެޓަރީ ޖެނެރަލް (އެސްޖީ) ކުއްލި ގޮތަކަށް އިސްތިއުފާ ދެއްވުމާ ގުޅިގެން އިދާރީ ބައެއް ކަންކަމަށް ބަދަލު ގެންނަން ޖެހުމުން ކަމަށެވެ. އަދި މުވައްޒަފުންގެ މުސާރަ މަސް ނިމިގެން އަށް ދުވަސް ފަހުން ޖަމާވުމާއި، ސަރުކާރު ކެންޑިޑޭޓުންގެ ކެމްޕެއިން ހަރަކާތްތަކާ އެއްވެސް ގުޅުމެއް ނެތް ކަމަށް އޭނާ ވިދާޅުވި އެވެ.
މުސާރައިގެ މަސައްކަތް ކުރާ މުވައްޒަފު މައްކާގައި ހުރުމުން ދަތިތަކެއް ކުރިމަތިވި ކަމަށް ދެކެވޭ ވާހަކަތަކަށް އިޝާރާތް ކުރައްވައި އަނީސް ވިދާޅުވީ، މުސާރަ ދިނުމުގެ ބައެއް ކަންކަމަކީ އަބަދުވެސް އެ މުވައްޒަފުގެ ފޯނު މެދުވެރިކޮށް ކުރާ ކަންކަން ކަމަށެވެ. އަދި މިފަހަރު އުމްރާގެ އަޅުކަމަށް ގޮސް ހުރެގެން ވެސް އެ މުވައްޒަފު އެ މަސައްކަތް ކޮށްފައިވާ ކަމަށް އޭނާ ވިދާޅުވި އެވެ. އަދި މުސާރަ ދިނުން އެހާ ބޮޑަށް ލަސްވި ސަބަބެއްގެ ގޮތުގައި ކައުންސިލުގެ ވަސީލަތްތައް މަދުވުމާއި، މުވައްޒަފުން މަދުވުމުންކަން އަނީސް ވަނީ ފާހަގަކުރައްވާފަ އެވެ.
އެސްޖީ އިސްތިއުފާ ދެއްވިފަހުން މިހާރު އެތަކެއް ދުވަހެއް ވެފަވާއިރު، އެސްޖީ އިސްތިއުފާ ދިނުމާ މުސާރަދިނުން މިހާ ބޮޑަށް ލަސްވުމާ ނުގުޅުވޭނެކަމަށް އެ ރަށު ބައެއް ފަރާތަކުން ވަނީ ބުނެފަ އެވެ.
