ވޯޓަކީ ޒިންމާ އެއް! ކޮންމެ ގޮތެއް ވަރިހަމަކޮށް ނުލާ!
އިންތިޚާބުތަކުގައި ވޯޓުލުމަކީ ކޮންމެ ފަރުދަކަށްމެ ލިބިފައިވާ އަމިއްލަ ހައްގަކަށްވާއިރު، އެއްވެސް ނުފޫޒެއް ނެތި ވޯޓުގެ ސިއްރުކަން ހިފެހެއްޓުމަކީ މުހިންމު ކަމެއް. ރިޝްވަތުގެ އެންމެހައި ކަންކަމުން ދުރުހެލިވެ، ގައުމީ ޒިންމާއެއްގެ ގޮތުގައި ދެކިގެން އެންމެ ގާބިލު ކެންޑިޑޭޓަކަށް ވޯޓު ދިނުމަށް އިސްކަންދޭންޖެހޭ. އެހެންކަމުން، ގާނޫނުއަސާސީން ލިބިދޭ މި ހައްގުގެ ބޭނުން އެންމެ ފުރިހަމަ ގޮތުގައި ހިފުމަށް ހުރިހާ ރައްޔިތުންނަށް އިލްތިމާސްކުރަމެވެ.
ރަށްވެހިވެފައިވާ ތަން ނޫން އެހެން ތަނެއްގައި ވޯޓުލުމަށް 26،454 މީހުން ވަނީ ރީރެޖިސްޓާ ވެފައި. | އިލެކްޝަންސް ކޮމިޝަން
އޭޕްރީލްމަހުގެ 4 ވަނަ ދުވަހު ބޭއްވުމަށް ހަމަޖެހިފައިވާ އިންތިޚާބުތަކަށް މި ދަނީ ވަގުތު ކުޑަ ތަން ވަމުންނެވެ. ރައްޔިތުންގެ ޚިޔާލު ހޯދުމުގެ ގޮތުން ނަގާ އާންމު ވޯޓާއި ލޯކަލް ކައުންސިލް އިންތިޚާބުގެ ކެމްޕެއިން ފޯރި އާއި އެކު ޕާޓީތަކުން މި ވަނީ ނިންމާލާފަ އެވެ.
ކޮންމެ މީހަކަށް ވެސް ފަހު ވަގުތާއި ހިސާބަށް ވެސް ފޯނަށް ކޯލާއި މެސެޖުތައް ދިޔައީ އަންނަމުންނެވެ. ނުދަންނަ އެތައް ބަޔަކު ގުޅަމުން ދިޔައީ ވޯޓުދިނުމަށް އެދިގެންނެވެ. މަގަކުން ފެނުނަސް ބުނަމުން ދިޔައީ އެވެނި މިވެނި މީހަކަށް ވޯޓު ދިނުމަށެވެ. ސިޔާސީ ވާދަވެރިކަން އިންތިހާ އަށް އޮތީ އިތުރުވެފަ އެވެ.
ގުޅާލާފަ ވޯޓު ދޭން އެހުމުގެ އިތުރުން ވޯޓު ދެނީ ކާކަށްތޯ ވެސް އަހަމުން ދިޔަ އެވެ. އެކަމަކު ހަގީގަތުގައި ވޯޓަކީ ސިއްރެކެވެ. ވޯޓު ދެނީ ކިހިނެއްތޯ އެހުމަކީ އެއީ އެއްވެސް މީހަކަށް ކުރެވޭނެ ކަމެއް ނޫނެވެ. އެއީ ތިމާ މީހާ އަށް ދިވެހިރާއްޖޭގެ ޤާނޫނުއަސާސީ އިން ލިބިފައިވާ ތިމާ މީހާގެ އަމިއްލަ ހައްގެކެވެ. އެކަމަކާއި ބަސް ބުނެވޭނެ އިތުރު މީހެއް ނުހުންނާނެ އެވެ.
ވޯޓަކީ އެހެން މީހަކަށް ކޮށްދޭ ހެޔޮ ކަމަކަށް ނުހަދާށެވެ. ހެޔޮކަމެއްގެ ބަދަލަކަށް ވެސް ނުހަދާށެވެ. އެއަށް ވުރެ ޒިންމާދާރުވާން ޖެހެ އެވެ. ވޯޓާއި މެދު ގޮތެއް ނިންމުމުގެ ކުރިން ނަޒާހަތްތެރި، އިޚުލާސްތެރި ގާބިލް މީހަކީ ކޮބައިތޯ ތިމާގެ ވިސްނުމުން ވިސްނާށެވެ. ކެނޑިޑޭޓުން ދެއްކި ވާހަކަތައް އަޅާ ކިޔުމަށް ފަހު ހަމަ ވިސްނުމުން ވިސްނާ މިނެ ކިރާށެވެ. ވޯޓަކީ ވަރަށް މުހިންމު ޒިންމާއެކެވެ. އެ ކަމާއި މެދު ފަރުވާތެރި ވާން ވާނެ އެވެ.
ބައިވެރިޔަކަސް، ގާތް ރަހުމަތްތެރިއަކަސް، އާއިލާ މީހަކަސް އެ ވޯޓަށް ބަސް ބުނެވިގެން ނުވާނެ އެވެ. އެ ވޯޓު ދޭން ވާނީ ތިމާގެ ވިސްނުމާއި ތިމާގެ ފިކުރަށް ބެލުމަށް ފަހުގަ އެވެ. އުމުރުން 18 ފުރިފައިވާ ކޮންމެ މީހަކަށް ވެސް އެ މީހަކު ބޭނުން މީހަކަށް ވޯޓު ދެވޭނެ އެވެ. އެ ހައްގަކީ އެހެން މީހެއްގެ ބަހަކަށް ދޫކޮށްލާ ވޯޓަކަށް ވެގެން ނުވާނެ އެވެ.
މި ވޯޓު ލާ އިރު ވިސްނާލަން ޖެހޭ ބައެއް ކަންކަން އެބަ ހުއްޓެވެ. ވޯޓުގެ ސިއްރުކަން ހިފެހެއްޓުމަކީ އޭގެ ތެރެއިން އެއް ކަންތަކެވެ. ވޯޓު ލީ ގޮތް އެހުމާއި، ވޯޓު ލާ ގޮތް އަންގަން ބުނުމަކީ ފަހަރެއްގައި ވެސް ކޮށްގެންވާނެ ކަމެއް ނޫނެވެ. އަދި ކުރެވޭނެ ކަމެއް ވެސް ނޫނެވެ. އެނގިގެން ވިޔަސް ނޭނގި ވިޔަސް އެ ކުރެވެނީ ކުށެކެވެ.
އަނެއްކަމަކީ ވޯޓު ދިނުމަށް ޝަރުތުކޮށް ދޭ ބިސްކޯދެއް ނޫނީ މެޓައެއްގެ މިންވަރު ވިޔަސް އޭގައި ހިފައިގެން ނުވާނެ އެވެ. އެއީ ކިތަންމެ ރީތި ލަވަ އެއް ކިޔާފައި ދިނަސް ރިޝްވަތެވެ. ކިތަންމެ ގާތް މީހަކު ދިނަސް އެޔަށް ހަދިޔާއެކޭ ކިޔޭނެ އެއްގޮތެއް ވެސް ނެތެވެ.
ވޯޓަކީ ކުރިން ވެސް ބުނިހެން ތިމާގެ ހައްްގެކެވެ. އެކަމަކު އެއީ ނީލަން ކިޔާ މުދަލެއް ނޫނެވެ. ވިއްކާ ހަލާސްކުރާ އެއްޗެއް ވެސް ނޫނެވެ. ހަގީގަތުގައި ވޯޓު ދޭންވީ އެމީހަކަށް ފެންނަ ގޮތަށް ބަލައި އެންމެ ރަނގަޅު ކެންޑިޑޭޓަކަށެވެ. ބައެއް މީހުން ބުނާތީ އަޑު އިވެއެވެ. ކޮންމެ ގޮތެއް ވިޔަސް ވަރިހަމަ އެވެ. ވޯޓު ލާން ދިޔަޔަސް ނުދިޔަޔަސް ކޮންމެވެސް ބަޔަކު ހޮވޭނެތާއެވެ.؟
އެކަމަކު އެއީ އެކަން ކޮށްގެން ވާނެ ގޮތެއް ނޫނެވެ. ގައުމަށްޓަކައި ތިމާގެ ހައްގެއް ވެ އެވެ. ތިމާގެ ރަށާއި ސިޓީ އާއި އަވަށަށްޓަކައި ތިމާގެ ޒިންމާ އެއް ވެއެވެ. އެ ހައްގު އަދާކުރުމުގައި ވަރިހަމަކޮށްލައިގެން ނުވާނެ އެވެ. ގައުމުގެ ކަންކަން ނިންމުމުގައި ބަސް ބުނަން ތިމާ އެދޭ މީހަކު ހޮވަން މަސައްކަތް ކުރުމަކީ ތިމާގެ ހައްގެކެވެ. އެއީ ގައުމަށްޓަކައި ކޮށްދިނުން މުނާސަބު ކަމެކެވެ. ހޮނިހިރު ދުވަހު ބާއްވާ އިންތިޚާބުގައި ވީހާވެސް ގިނަބަޔަކު ނުކުމެ އެމީހަކަށް ފެންނަ ގޮތަކަށް ވޯޓު ދޭން ޖެހެ އެވެ. ވޯޓަކީ ފަރުދީ ޒިންމާ އެކެވެ. ފަހަރުގައި ތިމާ ލާ ވޯޓަކީ އިންތިޚާބުގެ ނަތީޖާ ބަދަލުކޮށްލާ ވޯޓަށް ވެސް ވެދާނެ އެވެ.
