ހޮރްމޫޒް ކަނޑު އޮޅި ހުޅުވާ ނުލިޔަސް، ޓްރަމްޕް ހުންނެވީ ހަނގުރާމަ ހުއްޓާލަން ތައްޔާރަށް

އެމެރިކާ އާއި އިޒްރޭލުން އީރާންއާ ދެކޮޅަށް ކުރަމުން އަންނަ ހަނގުރާމައިގެ ސަބަބުން ހޮރްމޫޒް ކަނޑު އޮޅި ބަންދު ކޮށްފައި އޮތްއިރު، އެ ކަނޑު އޮޅި ހުޅުވާ ނުލި ނަމަވެސް، އެމެރިކާގެ ރައީސް ޑޮނަލްޑް ޓްރަމްޕް ހުންނެވީ ހަނގުރާމަ ހުއްޓާލުމަށް ތައްޔާރަށް ކަމަށް ރިޕޯޓު ކޮށްފި އެވެ. 

އެމެރިކާގެ ސަރުކާރުގެ އިސް އޮފިޝަލުންނާ ހަވާލާދީ އެކަން ރިޕޯޓު ކޮށްފައި ވަނީ ވޯލް ސްޓްރީޓް ޖާނަލްގަ އެވެ. އެ ރިޕޯޓުގައި ބުނެފައިވާ ގޮތުން، ޓްރަމްޕް ވަނީ އޭނާގެ އިސް އޮފިޝަލުންނަށް އެކަން އަންގަވައި، އިރުޝާދު ދެއްވައިފަ އެވެ. 

ވޯލް ސްޓްރީޓް ޖާނަލް އިން ބުނެފައިވާ ގޮތުގައި، ޓްރަމްޕް އާއި އޭނާގެ އިސް އޮފިޝަލުން ފާއިތުވި ދުވަސް ތަކުގެ ތެރޭގައި ކުރެއްވި ދިރާސާ ތަކުން ދައްކާ ގޮތުގައި، ބަންދު ކޮށްފައިވާ ހޮރްމޫޒް ކަނޑު އޮޅި ބާރުގެ ބޭނުން ކޮށްގެން ހުޅުވަން މަސައްކަތް ކޮށްފި ނަމަ، ހަނގުރާމަ ކުރިއަށް ގެންދިޔުމަށް ޓްރަމްޕް ކަނޑަ އަޅުއްވާއިވާ މުއްދަތަށް ވުރެ ދިގު ލައިގެން ދާނެ އެވެ. އެގޮތުން ހަތަރު ހަފުތާ ނުވަތަ ހަ ހަފުތާ އަށް ވުރެ ދިގު މުއްދަތަކަށް ހަނގުރާމަ ދެމިގެން ދާނެ ކަމަށް ފާހަގަ ކޮށްފައިވެ އެވެ. 

މި މައްސަލައިގައި ޓްރަމްޕް ނިންމަވާފައި ވަނީ، ހަނގުރާމައިގެ މައިގަނޑު މަޤުސަދުތައް ކަމަށްވާ އީރާންގެ ކަނޑުގެ ސިފައިންގެ ބާރު ކަނޑުވާލުމާއި، އެ ޤައުމުގެ މިސައިލް ރައްކާ ކޮށްފައިވާ މަރުކަޒުތައް ހަލާކު ކޮށްލުމަށް ފަހު ހަނގުރާމަ ހުއްޓާލުމަށެވެ. މި މަޤުސަދުތައް ހާސިލުވުމުން، ހަނގުރާމައިގެ އޮޕަރޭޝަންތައް މަޑު ޖައްސާލުމަށް ޓްރަމްޕް ނިންމަވާފައިވާ ކަމަށް އެ ނޫހުން ވަނީ ރިޕޯޓު ކޮށްފަ އެވެ. 

ހަނގުރާމަ ހުއްޓާލުމަށް ފަހު، ހޮރްމޫޒް ކަނޑު އޮޅި މެދުވެރިކޮށް ވިޔަފާރީގެ މުއާމަލާތްތައް އަލުން ފެށުމަށްޓަަކައި ޑިޕްލޮމެޓިކް އުސޫލުން އީރާން އަށް ފިއްތުންތައް ކުރިމަތި ކުރުމަށް އެމެރިކާގެ ސަރުކާރުން ވަނީ ރާވައިފަ އެވެ. އެކަމުގައި އިސް ދައުރެއް އަދާ ކުރުމަށް، ޔޫރަޕުގެ ޤައުމު ތަކަށާއި، ގަލްފުގެ ޤައުމު ތަކަށް ބާރު އެޅުމަށް ވެސް ޓްރަމްޕްގެ ސަރުކާރުން ވަނީ ނިންމައިފަ އެވެ. 

ދުނިޔޭގެ ތެޔޮ އެކްސްޕޯޓު ކުރުމުގައި މުހިންމު ދައުރެއް އަދާ ކުރާ ހޮރްމޫޒް ކަނޑު އޮޅި ބަންދުވެފައި އޮތުމަކީ، ބައިނަލްއަޤުވާމީ ބާޒާރަށް ބޮޑެތި ގޮންޖެހުން ތަކެއް ކުރިމަތި ވަމުން އަންނަ ކަމެކެވެ. ނަމަވެސް، މިހާރު ޓްރަމްޕް ބޭނުންފުޅު ވަނީ ވީހާ ވެސް އަވަހަށް އަސްކަރީ ކުރިމަތިލުންތައް ނިންމާލުމަށް ކަމަށް ބުނެފައިވެ އެވެ.