އީރާނާ ދެކޮޅަށް ކުރާ ހަނގުރާމައިގެ އެމެރިކާގެ އެންމެ އިސް ޖެނެރަލް އިޒްރޭލަށް ޒިޔާރަތް ކޮށްފި

އީރާނާ ދެކޮޅަށް ކުރިއަށްގެންދާ އަސްކަރީ އޮޕަރޭޝަންތައް ބަލަހައްޓާ، މެދުއިރުމަތީގައި ހަރަކާތްތެރިވާ އެމެރިކާގެ އެންމެ އިސް ޖެނެރަލް، ދެ ގައުމު ގުޅިގެން ދެމުންދާ ހަމަލާތަކާ ގުޅޭގޮތުން މަޝްވަރާކުރެއްވުމަށް މި ހަފުތާގައި އިޒްރޭލަށް ޒިޔާރަތްކޮށްފައިވާ ކަމަށް އެމެރިކާގެ ސެންޓްރަލް ކޮމާންޑް (ސެންޓްކޮމް) އިން އަންގާރަ ދުވަހު ބުނެފިއެވެ.

ސަރަހައްދީ ނުތަނަވަސްކަން އިންތިހާއަށް ބޮޑުވެފައިވާ ދަނޑިވަޅެއްގައި، ސެންޓްކޮމްގެ ވެރިޔާ އެޑްމިރަލް ބްރެޑް ކޫޕާ އިޒްރޭލަށް ކުރި މި ޒިޔާރަތުގައި، މާރިޗު މަހުގެ 29 އިން 30 އަށް އެ ގައުމުގެ އަސްކަރިއްޔާގެ އިސް ވެރިންނާ ބައްދަލުކުރި އެވެ.

މި ދަތުރުގައި އެޑްމިރަލް ކޫޕާ ވަނީ އިޒްރޭލުގެ އަސްކަރިއްޔާގެ ޗީފް އޮފް ދަ ޖެނެރަލް ސްޓާފް، ލެފްޓިނަންޓް ޖެނެރަލް އިޔާލް ޒާމިރުއާ ބައްދަލުކޮށް މުހިންމު މަޝްވަރާތަކެއް ބާއްވާފަ އެވެ.

ސެންޓްކޮމްގެ ތަރުޖަމާނު ކެޕްޓަން ޓިމް ހޯކިންސް ބުނީ، އީރާނުގެ ބޯޑަރުން ބޭރުގައި އެ ގައުމުގެ ބާރުވެރިކަން ދެއްކުމަށް ކުރަމުންދާ މަސައްކަތްތައް ހުއްޓުވުމަށް މިހާރު ކުރިއަށްދާ އޮޕަރޭޝަންތަކަށް ލިބިފައިވާ ކުރިއެރުންތަކާ ގުޅޭގޮތުން ދެ ފަރާތުން މަޝްވަރާކުރި ކަމަށެވެ. މީގެ އިތުރުން، އެމެރިކާ އާއި އިޒްރޭލާ ދެމެދު އޮތް ދިފާއީ ގުޅުން ވަރުގަދަކަން ހާމަކޮށް، ދެ ގައުމުގެ މެދުގައި އޮންނަ ކޯޑިނޭޝަން ނުވަތަ ގުޅިގެން މަސައްކަތްކުރުމުގެ މުހިންމުކަމުގެ މައްޗަށް ދެ ފަރާތުން މަޝްވަރާ ކުރި ކަމަށްވެސް ހޯކިންސް ހާމަ ކުރިއެވެ.

ހޯކިންސް އިތުރަށް ހާމަކުރި ގޮތުގައި، އެމެރިކާއިން "އޮޕަރޭޝަން އެޕިކް ފިއުރީ" ގެ ނަމުން ނަންދީފައިވާ އަސްކަރީ ހަރަކާތްތަކުގައި ބައިވެރިވާ އެމެރިކާގެ ސިފައިންނާ ބައްދަލުކުރުމަށް، އެޑްމިރަލް ކޫޕާ ވަނީ މެދުއިރުމަތީގެ އެކި ސަރަހައްދުތަކަށް ޒިޔާރަތްކޮށްފަ އެވެ.

މީގެ އިތުރުން، ޕެންޓަގަންގެ ވެރިޔާ ޕީޓް ހެގްސެތު ވެސް ނިމިދިޔަ ހަފުތާ ބަންދުގައި އެ ސަރަހައްދުގައި ތިބި އެމެރިކާ ސިފައިންގެ ގާތަށް ޒިޔާރަތްކުރެއްވި ކަމަށް ވިދާޅުވެފައިވެއެވެ.

ހެގްސެތު ޒިޔާރަތްކުރެއްވީ ކޮން ތަނަކަށް އަދި ކޮން ވަގުތަކު ކަން ސާފުނުވި ނަމަވެސް، ޕެންޓަގަންއިން ވަނީ އޭނާގެ އެ ދަތުރުފުޅުގެ ފޮޓޯތައް އާންމުކޮށްފައެވެ.