ކުޅުދުއްފުށީގައި އަޅާ 2000 ހައުސިންގ ޔުނިޓުގެ ބިންގާ އެޅުމުގެ ރަސްމިއްޔާތަށް މޭޔަރ ޢާޠިފް އަށް ދިން ދައުވަތު އެޗްޑީސީން އަނބުރާ ގެންގޮސްފި
ކުޅުދުއްފުށީގައި 2000 ހައުސިންގ ޔުނިޓުގެ ބިންގާ އެޅުމުގެ ރަސްމިއްޔާތަށް އެޗްޑީސީން މޭޔަރ ޢާޠިފް އަށް ދިން ދައުވަތު ކުއްލި ގޮތަކަށް އަނބުރާ ގެންގޮސްފައިވާ ކަމަށް އެ ސިޓީގެ މޭޔަރު މުހައްމަދު ޢާޠިފް ވިދާޅުވެއްޖެއެވެ.
މޭޔަރ މުޙައްމަދު ޢާޠިފް | ކުޅުދުއްފުށި ސިޓީ ކައުންސިލް
ކުޅުދުއްފުށި ސިޓީގައި ތަރައްޤީ ކުރުމަށް ހަމަޖެހިފައިވާ 2000 ހައުސިންގ ޔުނިޓުގެ ބިންގާ އެޅުމުގެ ރަސްމިއްޔާތަށް ދައުވަތު ދިނުމަށްފަހު، ކުއްލި ގޮތަކަށް އެ ދައުވަތު އަނބުރާ ގެންގޮސްފައިވާ ކަމަށް އެ ސިޓީގެ މޭޔަރ މުހައްމަދު ޢާޠިފް ވިދާޅުވެއްޖެއެވެ.
މޭޔަރ ޢާޠިފް މީސްމީޑިއާގައި މިރޭ އާއްމުކުރެއްވި މެސެޖެއްގައި ވިދާޅުވީ، މިރޭ ބޭއްވުމަށް ހަމަޖެހިފައިވާ ބިންގާ އެޅުމުގެ ރަސްމިއްޔާތުގައި ބައިވެރިވުމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ފަރާތުން މިއަދު މެންދުރުގެ ވަގުތެއްގައި މޭޔަރ ޢާޠިފް އަށް ދައުވަތު އެރުވި ކަމަށެވެ. އަދި އެ ދައުވަތު ވަގުތުން ޤަބޫލުކުރައްވައި، ރަސްމިއްޔާތުގައި ބައިވެރިވެވަޑައިގަންނަވާނެ ކަމަށް އަންގަވާފައިވާނެ ކަމަށްވެސް މޭޔަރ ވިދާޅުވިއެވެ.
ނަމަވެސް، މިއަދު ހަވީރުގެ ވަގުތެއްގައި އެޗްޑީސީގެ ފަރާތުން އަލުން ގުޅައި، އެ ދައުވަތު އަނބުރާ ގެންގޮސްފައިވާކަން އަންގާފައިވާ ކަމަށް މޭޔަރ ޢާޠިފް ހާމަކުރެއްވިއެވެ. މޭޔަރ ވިދާޅުވީ މިކަން އާންމުކޮށް ހިއްސާކުރަން ނިންމެވީ، އެ ޖަލްސާގައި އެމަނިކުފާނު ބައިވެރިވެވަޑައިނުގަތުމުން ރައްޔިތުންގެ ހިތުގައި ސުވާލު އުފެދިދާނެތީ އެކަން ސާފުކޮށްދެއްވުމުގެ ގޮތުން ކަމަށެވެ.
މީގެ އިތުރުން، ކުޅުދުއްފުށީގެ ބޯހިޔާވަހިކަމުގެ މި ބޮޑު މަޝްރޫއާ ގުޅޭގޮތުން މޭޔަރ ވަނީ ކަންބޮޑުވުން ފާޅުކުރައްވާފައެވެ. އެގޮތުން 2000 ހައުސިންގ ޔުނިޓުގެ ބިންގާ މިރޭ އަޅާއިރު، މިހާތަނަށް އެ ޔުނިޓްތަކުގެ އިނިޝިއަލް ކޮންސެޕްޓްވެސް ތައްޔާރުކޮށް ސިޓީ ކައުންސިލާ ހިއްސާކޮށްފައި ނުވާކަން މޭޔަރ ހިތާމައާއެކު ފާހަގަކުރެއްވިއެވެ.
ކުޅުދުއްފުށީގެ ތަރައްޤީއަށް ހިންގާ މިފަދަ މުހިންމު މަޝްރޫއުތަކުގައި ސިޓީ ކައުންސިލްގެ ބައިވެރިވުން ކުޑަކުރުމަކީ ރައްޔިތުންގެ މެދުގައިވެސް ކަންބޮޑުވުން އުފެދިފައިވާ ކަމެކެވެ.
