އިންތިޚާބާއި ދިމާކޮށް 2000 ހައުސިންގ ޔުނިޓުގެ ނަމުގައި ކުޅުދުއްފުށީ ވެލިގަނޑު ސަރަހައްދުގައި ކަޑައެއް ޖަހައިފި
ކުޅުދުއްފުށީގައި ކުރީގެ ސަރުކާރުން ފަށާފައިވާ 400 ހައުސިންގ ޔުނިޓުގެ މަސައްކަތް ހުއްޓިފައި ވަނިކޮށް، އެ މަޝްރޫޢު ކުރިއަށް ގެންދިއުމަށާއި, 2000 ހައުސިންގ ޔުނިޓުގެ މަސައްކަތް އެޗްޑީސީ އާއި ވަނީ ހަވާލުކޮށްފަ. ނަމަވެސް އެ މަސައްކަތް އަމަލީގޮތުން ނުފެށި ވަނިކޮށް، ލޯކަލް ކައުންސިލް އިންތިޚާބާ ދިމާކޮށް އިތުރު 2000 ޔުނިޓުގެ ބިންގާ އެޅުމަކީ ސަރުކާރުން ރައްޔިތުންނަށް އޮޅުވާލުމަށް ކުރި ކަމެއްގެ ގޮތުގައި ރައްޔިތުން ވަނީ ސިފަކޮށްފަ.
ކުޅުދުއްފުށި ސިޓީގައި 2000 ހައުސިންގ ޔުނިޓުގެ މަޝްރޫޢުގެ ބިންގާ އެޅުމުގެ ރަސްމިއްޔާތު ތެރެއިން
ކުރިއަށް އޮތް ލޯކަލް ކައުންސިލް އިންތިޚާބާއި ދިމާކޮށް ސަރުކާރުން ކުޅުދުއްފުށި ސިޓީގައި 2000 ހައުސިންގ ޔުނިޓު އެޅުމަށް ބިންގާ އަޅައިފިއެވެ.
ބުދަ ދުވަހުގެ ރޭ ކުޅުދުއްފުށި ސިޓީގެ ވެލިގަނޑު ސަރަހައްދުގައި ބޭއްވި ރަސްމިއްޔާތުގައި 2000 ހައުސިންގ ޔުނިޓުގެ ބިންގާ އަޅުއްވައިދެއްވީ ހައުސިން މިނިސްޓަރު ޑރ. އަބްދުﷲ މުއްތަލިބު އާއި, ފިޝަރީޒް މިނިސްޓަރު އަހުމަދު ޝިޔާމު އާއި, އެޗްޑީސީގެ މެނޭޖިން ޑިރެކްޓަރު އަލީ ޒުހައިރު އާއި, ރައްޔިތުންގެ މަޖިލީހުގެ ކުޅުދުއްފުށީ އުތުރު ދާއިރާގެ މެމްބަރު މުހައްމަދު ދާއޫދު އަދި ކުުޅުދުއްފުށީ ދެކުނު ދާއިރާގެ މެމްބަރު ފަރުހަތު މުހައްމަދުގެ އިތުރުން ޓީމް ވަން އިންޑިއާ ކުންފުނީގެ ޑިޒައިން ޑިރެކްޓަރު ބަޝީރު އަހުމަދު އެވެ.
ސަރުކާރުން މި މަޝްރޫޢު ހަވާލުކޮށްފައިވަނީ މިދިޔަ 2025 ވަނަ އަހަރުގެ އޮގަސްޓް މަހު ރައީސުލްޖުމްހޫރިއްޔާ ކުޅުދުއްފުއްޓަށް ކުރެއްވި ދަތުރުފުޅުގައި ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އާއެވެ.
އަދި މި މަޝްރޫޢު އާއެކު ރައީސް މުޢިއްޒުގެ އެ ދަތުރުފުޅުގައި ކުޅުދުއްފުށީގައި ކުރީ ސަރުކާރުން އަޅަން ފަށައިފައިވާ 400 ހައުސިންގ ޔުނިޓުގެ މަސައްކަތްވެސް ވަނީ އެޗްޑީސީއާއި ހަވާލުކޮށްފައިވެއެވެ.
މިގޮތުން, ސަރުކާރުން އިންތިޚާބަށް ކުޑަ ދުވަސްކޮޅަކަށް ވެފައިވަނިކޮށް ހުއްޓިފައިވާ 400 ހައުސިންގ ޔުނިޓުގެ މަޝްރޫޢުވެސް އަލުން ފެށުމަށް ތަކެތި ގެނެސްފައިވީ ނަމަވެސް, އެ މަޝްރޫޢޫގެ އަމަލީ މަސައްކަތް ނުފެށި, މިރޭ އެޅި 2000 ޔުނިޓުގެ ހައުސިންގ ޔުނިޓުގެ ބިންގާ ފެނިގެންދިޔައީ އިންތިޚާބާއި ދިމާކޮށް ސަރުކާރުން ރައްޔިތުން ލޮލުގައި އަނދުން އެޅުވުމަށް ކުރި ކަމެއްގެ ގޮތުގައެވެ.
