އެމެރިކާ އާއެކު މެސެޖުތައް ބަދަލު ކުރެވުނު ނަމަވެސް، ސީދާ ވާހަކަ ނުދައްކާ ކަމަށް އީރާން އިން ބުނެފި

އެމެރިކާ އާއެކު ސީދާ މަޝްވަރާ ތަކެއް ކުރިއަށް ނުގެންދާ ކަމަށާއި، ނަމަވެސް މެދުވެރިން މެދުވެރިކޮށް މެސެޖުތައް ބަދަލު ކުރަމުންދާ ކަމަށް އީރާން އިން ހާމަ ކޮށްފި އެވެ. 

އީރާންގެ ފޮރިން މިނިސްޓްރީގެ ތަރުޖަމާނު އިސްމާއިލް ބަޣާއީ ހޯމަ ދުވަހު ވިދާޅުވީ، މަޝްވަރާ ކުރުމަށް އެމެރިކާ އިން ބޭނުންވާ ކަމުގެ މެސެޖުތައް މެދުވެރިން މެދުވެރިކޮށް ލިބިފައިވާ ކަމަށެވެ. 

ނަމަވެސް، އެމެރިކާ އިން ހުށަހަޅާފައިވާ ހުށަހެޅުން ތަކަކީ ހަގީގަތާ ޚިލާފު، ބުއްދި އަށް ޤަބޫލު ނުކުރެވޭ އަދި އިންސާފުން ބޭރު ހުށަހެޅުން ތަކެއް ކަމަށް އީރާން އިން ވަނީ ސިފަ ކޮށްފަ އެވެ. ތަރުޖަމާނު ވިދާޅުވީ ސަރަހައްދީ ޤައުމު ތަކުން ސުލްޙަ ޤާއިމު ކުރުމަށް ކުރާ މަސައްކަތް ތަކަށް އީރާން އިން މަރުޙަބާ ކިޔާ ކަމަށާއި، އެހެން ނަމަވެސް، ކަންކަމުގައި ހަގީގީ މަންޒަރަށް ބަލަން ޖެހޭ ކަމަށެވެ. 

މިހާރު ހިނގަމުންދާ ހަމަ ނުޖެހުންތަކާ ގުޅޭ ގޮތުން ވާހަކަ ދައްކަވަމުން ބަޣާއީ ވިދާޅުވީ، އީރާންގެ މަގާމު ވަރަށް ސާފު ކަމަށާއި، އެ ޤައުމަކީ އަސްކަރީ އުދުވާނެއްގެ ޝިކާރަ އަކަށް ވެފައިވާ ޤައުމެއް ކަމަށެވެ. އެހެންކަމުން، އީރާންގެ ހުރިހާ މަސައްކަތް ތަކާއި ބާރު ތަކެއް މިވަގުތު އަމާޒު ކޮށްފައި ވަނީ ޤައުމުގެ ދިފާއުގައި ކަމަށް އޭނާ ފާހަގަ ކުރެއްވި އެވެ. 

އީރާން އާއި އެމެރިކާއާ ދެމެދު ސީދާ މުއާމަލާތް ތަކެއް ނެތް ނަމަވެސް، ތިން ވަނަ ފަރާތެއް މެދުވެރިކޮށް މެސެޖުތައް ބަދަލު ކުރުމަކީ ދެ ޤައުމުގެ ދެ މެދުގައި އޮންނަ ނުތަނަވަސްކަން ކުޑަ ކުރުމަށް ކުރެވޭ މަސައްކަތެކެވެ. އެހެން ނަމަވެސް، އެމެރިކާގެ ހުށަހެޅުން ތަކަށް އީރާން އިން އިންކާރު ކުރުމާ އެކު، ދެ ޤައުމުގެ ދެ މެދުގައި އޮތް ހީނަރުކަން އަދި ވެސް ދެމި އޮތްކަން ހާމަވެފައިވެ އެވެ.