މިސަރުކާރުގެ ކޮރަޕްޝަނާއި ވައްކަމާ ގުޅިގެން ހިންދެމިނުލެވޭ، މި ނޫން ރާއްޖެއެއް ރައްޔިތުންނަށް އެމްޑީޕީން ހޯދައިދޭނެ: ޝިފާޒު

ރައީސް ޑރ.މުހައްމަދު މުއިއްޒުގެ މި ސަރުކާރުގެ ކޮރަޕްޝަނާއި ވައްކަމާ ގުޅިގެން ހިންދެމިނުލެވޭ ކަމަށާއި، މި ނޫން ރާއްޖެއެއް ރައްޔިތުންނަށް އެމްޑީޕީން ހޯދައިދޭނެ ކަމަށް އެ ޕާޓީގެ ކުރީގެ ނައިބު ރައީސް މުހައްމަދު ޝިފާޒު ވިދާޅުވެއްޖެ އެވެ.

ބުދަ ދުވަހުގެ ހަވީރު އެމްޑީޕީން ކުރިއަށް ގެންދިޔަ ޕިކަޕް ޖަލްސާގައި ޝިފާޒު ވިދާޅުވީ، މެދުއިރުމަތީގައި ހަނގުރާމައަށް ދިވެހި ރައްޔިތުން ހޭލުންތެރިވާން ޖެހޭ ކަމަށާއި، ވަމުންދާ ގޮތް ވަރަށް ގާތުން ބަލަން ޖެހޭ ކަމަށެވެ.

ޝިފާޒު ވިދާޅުވީ ރަމާޟާން މަސް އައުމުގެ ކުރިން ގޭހަށް ޖެހިފައި ކަމަށާއި، މިކަމުގައި ވެސް ސަރުކާރުން އޮޅުވާލަމުންދާ ކަމަށެވެ. އަދި ހަނގުރަމާއާއެކު ތެލަށް ޖެހުމުގެ ބިރު އެބައޮތް ކަމަށް އޭނާ ވިދާޅުވި އެވެ. 

ނަމަވެސް ރާއްޖެއަކީ ވަރަށް ރަނގަޅަށް މެނޭޖްކޮށްގެން ކުރިއަށް ގެންދެވޭނެ ގައުމެއް ކަމަށާއި، މިސަރުކާރުގެ ކޮރަޕްޝަނާ ގުޅިގެން ރައްޔިތުންނަށް ދަތިވެ، ހިންދެމިލެވެން ނެތް ކަމަށް ޝިފާޒު ވިދާޅުވި އެވެ.

މީގެ އިތުރުން ޝިފާޒު ވިދާޅުވީ، އެމްޑީޕީން އިސްވެ ކުރާ މިމަސައްކަތާއެކު، ރާއްޖެ ބަދަލު ކުރާނެ ކަމަށާއި، ރައީސް މުއިއްޒަށް ވާގިވެރިވާ ބޭފުޅުންގެ މައްސަލަތައް ބަލައި އިންސާފު ގާއިމް ކުރާނެ ކަމަށެވެ. 

މި ރާއްޖެ މި ދަނީ ތެލަށް ޖެހެމުން، ބޭހަށް ޖެހެމުން، ގޭހަށް ޖެހެމުން. މި ރޯދަ މަސް ފެށުމުގެ ކުރިން ގޭސް ހުސްވެއްޖެ. ރޯދަމަސް ނުނިމޭ މިހާރު ތެޔޮ ހުސްވަނީ. އަޅުގަނޑުމެންނަށް ކަނު އަނދިރީގައި ސައިކަލް ނުދުއްވާ މި ރާއްޖެއަކު ނޫޅެވޭނެ. ކަނު އަނދިރީގައި ނިދި ޒަމާން އަޅުގަނޑުމެން މާޒީއަށް ދޫކޮށްލައިފިން. ރީތިކޮށް މެނޭޖުކުރަން އޮތް ގައުމެއް، ދުނިޔޭގެ ކޮންމެ ކަމެއް ވީ ނަމަވެސް، ރީތިކޮށް ހިންގަން އޮތް ގައުމެއް، މި ބޭފުޅުންގެ ވައްކަމާއި ކޮރަޕްޝަނާއި ފަސާދައާ ހެދި އަޅުގަނޑުމެންނަށް ހިންދެން ނުލެވިގެން މި އުޅެނީ. އެހެންވީމާ، މިތާށިން އަރައިގަތުމަށްޓަކައި ގޮވާލި ކޮންމެ ގޮވާލުމަކަށް އެ ދަނޑިވަޅަކަށް ތިބޭފުޅުން ތައްޔާރަށް ތިއްބަވާ! އެ ތައްޔާރަށް ތިއްބަވާނީ މި ދަންނަވަނީ، މި ރާއްޖެ ބަދަލުކުރާނޭ އަޅުގަނޑުމެންނަށް އަޅުގަނޑުމެން. މި ދަނީ ބަދަލުކުރަން. އެ ބަދަލުކޮށް ކުރާއިރުގައި އިރާދަކުރެއްވިއްޔާ މިދެންނެވި މަގަށް މި ރާއްޖެ ބައްޓަން ކުރުމަށް ޑރ. މުއިއްޒަށް ވާގިވެރިވާ އިލެކްޝަންސް ކޮމިޝަންގެ ރައީސް ވިޔަސް، ބަންޑާރަ ނައިބު ވެސް އެހެންނެއް ސަލާމަތްވިޔަކާ ދޭން އަޅުގަނޑުމެން ނުދޭނަން. އިންސާފު އަރާ ހަމަކުރާނީ އެ ބޭބޭފުޅުން ވަކިވަކިން ދެން.

އެމްޑީޕީގެ ކުރީގެ ނައިބު ރައީސް މުހައްމަދު ޝިފާޒު

ޝިފާޒު ވިދާޅުވީ، މީގެ ކުރިން ވެސް ހައްގުތައް ހޯދީ ބުރަ މަސައްކަތާއެކު ކަމަށާއި، މިހާރު ވެސް އެމްޑީޕީން އެ މަސައްކަތް ކުރަމުންދާ ކަމަށެވެ. އަދި މިހާރު މިސަރުކާރުން ހައްގުތައް ހަނިކޮށް ދަތިކުރުމަށް މަސައްކަތް ކުރި ނަމަވެސް ގާނޫނުއަސާސީން ކަށަވަރުކުރި ހުރިހާ ހައްގެއް އަލުން އަނބުރައި ރައްޔިތުންނަށް ހޯދައިދޭނެ ކަމަށް އޭނާ ވިދާޅުވި އެވެ.