ޝާހިދުގެ އިލްތިމާސް: ރާއްޖެ މިހާރު އޮތް ހާލަތު ރައްޔިތުންނަށް ހާމަކޮށްދެއްވާ!
ސަރުކާރުގެ ނާގާބިލު ސިޔާސަތުތަކުގެ ސަބަބުން އިންވެސްޓަރުންގެ އިތުބާރު ގެއްލެމުންދާކަން ފާހަގަކުރައްވައި، ކަންކަން ސިއްރު ނުކޮށް ރައްޔިތުންނަށް ތެދު މައުލޫމާތު ހާމަކުރުމަށް ޝާހިދު ގޮވާލެއްވި. މީގެ އިތުރުން ސިޔާސީ މަންފާއަށްޓަކައި ވަޒީފާތައް ބެހުން ހުއްޓާލައި، ކަމާގުޅޭ ދާއިރާތަކުގެ ތަޖުރިބާކާރުންގެ މަޝްވަރާ ހޯދުމަށް ވެސް އޭނާ އިލްތިމާސްކުރެއްވި.
އެމްޑީޕީގެ ރައީސް އަބްދުﷲ ޝާހިދު ތ ކިނބިދޫގައި ވާހަކަފުޅުދައްކަވަނީ | ރާއްޖެ އެމްވީ
މިވަގުތު ރާއްޖެ އޮތް ހާލަތަކީ ކަންބޮޑުވާ ހާލަތެއްކަމަށާއި ރާއްޖޭގެ ހާލަތު ރައްޔިތުންނަށް ހާމަކޮށްދިނުމަށް އެމްޑީޕީގެ ރައީސް އަބްދުﷲ ޝާހިދު، ރައީސް މުޢިއްޒަށް ގޮވާލައްވައިފި އެވެ.
އެމްޑީޕީ އިން ރަށްރަށަށް ކުރަމުންދާ ކެމްޕޭނު ދަތުރުގެ ތެރެއިން ތ. ކިނބިދޫ އަށް ވަޑައިގެން އެރަށުގެ ކެނޑިޑޭޓުންނާއި އެމްޑީޕީގެ ސަޕޯޓަރުންނާއި ބައްދަލުކުރައްވައި ވާހަކަފުޅުދައްކަވަމުން ޝާހިދު ވިދާޅުވީ، މިރާއްޖޭގައި އަސާސީ އެއްވެސް ހިދުމަތެއް ނުލިބޭ ކަމަށާއި ބޭސްކޮޅެއް ނުލިބޭތަނުގައި ތެޔޮކޮޅެއް ވެސް ނުލިބޭ ކަމަށެވެ. މިފަދަ ހާލަތެއްގައި ރާއްޖެ އޮތް އިރު އެއްވެސް ފިޔަވަޅެއް އަޅާފައިނުވާއިރު އެންމެ ކުޑަމިނުން މިހާރު އޮތް ހާލަތު ހާމަކުރަން ވެސް މިސަރުކާރުން ދެކޮޅުހަދަމުންދާކަން ޝާހިދު ފާހަގަކުރެއްވި އެވެ.
އޭގެ އިތުރުން ޝާހިދު ވިދާޅުވީ އަވައްޓެރި ގައުމުތަކުން މި ހާލަތުގައި ހަރަދުކުޑަކުރުމުގެ ގޮތުން ގިނަ ފިޔަވަޅުތަކެއް އަޅަމުންދާކަމަށެވެ. އެގޮތުން މެލޭޝިއާގައި އީދު ކުޅިވަރުތައް ކެންސަލް ކޮށްފި ކަމަށާއި، ލަންކާގައި ކޮންމެ ބުދަ ދުވަހަކީ ސުކޫލުތަކާއި ސަރުކާރުގެ އޮފީސްތައް ވެސް ބަންދު ދުވަހެއްގެ ގޮތުގައި ކަނަޑައަޅައިފިކަން ފާހަގަކުރައްވައި ޝާހިދު ވިދާޅުވީ އެގައުމުތަކުން އެފިޔަވަޅުތައް އަޅާފައި ވަނީ ހަރަދުކުޑަކޮށް މުސްތަގުބަލަށް ވިސްނާފައި ކަމަށެވެ. ނަމަވެސް އެއާއި ހިލާފަށް ދިވެހި ރާއްޖެ އިން އެކަހަލަ އެއްވެސް ފިޔަވަޅެއް ވެސް އަޅާފައިނުވާތީ ޝާހިދު ވަނީ ކަންބޮޑުވުން ފާޅުކޮށްފަ އެވެ.
ރައީސުލްޖުމްހޫރިއްޔާ ވިދާޅުވި ތިމަންމަނިކުފާނު ކޮމެޓިއެއް އެކުލަވާލައްވައިފީމޭ. އެކޮމެޓީ އިން އެބަޖެހޭ ރާއްޖޭގެ ޓުވަރިޒަމް އިންޑަސްޓްރީގެ ބޮޑެތި ފަރާތްތަކާއި އިންވެސްޓަރުންނާއި ގެސްޓްހައުސް ހިންގާ މީހުންނާ ބައްދަލުކުރައްވައި އެބޭފުޅުންގެ މިއަދުގެ އިހުސާސްތައް އެބޭފުޅުން ތަޖުރިބާ ކުރައްވަމުން ގެންދަވާ ކުރެއްވުންތައް އަޑުއައްސަވަން. ވަކިވެގަނެގެން ވަކިން ތިމަންނަމެންނައް މާމޮޅަށް އެނގޭނޭ ވިދާޅުވެގެން ކަންތައްތައް ކުރެއްވޭ ވަރުގެ ބޭފުޅުންނެއް ނޫން ސަރުކާރުގައި ތިއްބެވީކި.އަބްދުﷲ ޝާހިދު
މިސަރުކާރުގެ ނާގާބިލު ސިޔާސަތުގެ ސަބަބުން އިންވެސްޓަރުންގެ އިތުބާރު ގެއްލެމުންދާކަން ފާހަގަކުރައްވައި ޝާހިދު ވިދާޅުވީ، ހަނގުރާމައިގެ ބޮޑު ވިލާގަނޑެއް ކުރިމަތިވީމާ އެބޭފުޅުންނާ މަޝްވަރާކޮށް ހަގީގަތް ހާމަކުރަންޖެހޭ ކަމަށެވެ. އަދި ކަންކަން ސިއްރުކޮށްގެން އޭގެ ގެއްލުންވާނީ މުޅި ދިވެހިރާއްޖެއަށް ކަމަށް ވެސް ޝާހިދު ވިދާޅުވި އެވެ.
ޝާހިދު ވިދާޅުވީ މިހާލަތުގައި ސަރުކާރުން ރައްޔިތުންނަށް ތެދު މާއުލޫމާތު ފޯރުކޮށްދީ އެޅެން ހުރި ފިޔަވަޅުތައް އަޅަންޖެހޭ ކަމަށެވެ. އަދި މިފަދަ ދަނޑިވަޅާކާ ދިމާކޮށް ސިޔާސީ މަންފާއެއް ހޯދުމަށް އެތައް ވަޒީފތަކެއް ބަހާ ބެހުން ހުއްޓާލުމަށް ވެސް ޝާހިދު ވަނީ އިލްތިމާސްކުރައްވާފަ އެވެ.
