އީރާނުން އިސްލާމީ ގައުމުތަކަށް: މަދު ފަހަރަކު ނޫނީ، އިސްލާމީ އެއްވެސް ސަރުކާރަކުން އީރާނުގެ ރައްޔިތުންނަށް އެހީތެރިކަން ފޯރުކޮށްދީފައި ނުވާކަން ތިޔަބޭފުޅުންނަށް އެނގިވަޑައިގަނޭތޯ؟

އެމެރިކާ އަކީ އިތުބާރު ކުރެވޭ ބައިވެރިއެއް ނޫންކަން އެ ގައުމުން ސާބިތުކޮށްދީފައިވާ ކަމަށާއި، އިޒްރޭލަކީ އިސްލާމީ ގައުމުތަކުގެ ދުޝްމަނެއް ކަމަށް އީރާނުގެ ސަލާމަތީ ކަންތައްތަކާ ބެހޭ އެންމެ މަތީ އޮފިޝަލް ވިދާޅުވެއްޖެއެވެ.

އީރާނުގެ ސުޕްރީމް ނޭޝަނަލް ސެކިއުރިޓީ ކައުންސިލްގެ ސެކްރެޓަރީ އަލީ ލަރިޖާނީ މިހެން ވިދާޅުވީ، އީރާނަށް ހަމަލާދިނުމަށް އެމެރިކާގެ އަސްކަރީ މަރުކަޒުތައް ގާއިމުކޮށްފައިވާ އަވަށްޓެރި އިސްލާމީ ގައުމުތަކަށް އަމާޒުކޮށް ހޯމަ ދުވަހު ފޮނުއްވި ހަ ނުކުތާގެ މައްޗަށް އެކުލެވޭ ހުޅުވާލެވިފައިވާ ސިޓީއެއްގައެވެ.

އީރާނުން އެމެރިކާއާއެކު މަޝްވަރާތައް ކުރިއަށް ގެންދިޔަ ވަގުތުވެސް، އެމެރިކާއާއި ޒަޔަނިސްޓުން ގުޅިގެން އީރާނު ބައިބައިކޮށްލުމަށް އޮޅުވާލުންތަކުން ފުރިގެންވާ އުދުވާނެއް ކުރިމަތިކުރުވި ކަމަށް ލަރިޖާނީ ވިދާޅުވިއެވެ.

އޭނާ އިތުރަށް ވިދާޅުވީ، އުދުވާނީ ބާރުތަކުން އިސްލާމީ އިންގިލާބުގެ ލީޑަރު އާޔަތުﷲ ސައްޔިދު އަލީ ޚާމަނާއީގެ އިތުރުން އާންމު ރައްޔިތުންނާއި އަސްކަރީ ކޮމާންޑަރުން ޝަހީދުކޮށްލާފައިވާ ކަމަށެވެ. އަދި މީގެ ސަބަބުން އީރާނުގެ ރައްޔިތުންގެ ފަރާތުން ގައުމީ އަދި އިސްލާމީ ވަރުގަދަ ދިފާއީ ރައްދުތަކެއް އެ ފަރާތްތަކަށް ކުރިމަތިވި ކަމަށްވެސް އޭނާ ވިދާޅުވިއެވެ.

"ސިޔާސީ މައިދާނުގައި މަދު ފަހަރަކު ނޫނީ، އިސްލާމީ އެއްވެސް ސަރުކާރަކުން އީރާނުގެ ރައްޔިތުންނަށް އެހީތެރިކަން ފޯރުކޮށްދީފައި ނުވާކަން ތިޔަބޭފުޅުންނަށް އެނގިވަޑައިގަނޭތޯ؟ އެހެންނަމަވެސް، އީރާނުގެ ރައްޔިތުން ވަނީ ވަރުގަދަ އަޒުމަކާއެކު ނުލަފާ ދުޝްމަނުން ބަލިކޮށްފައި. މިއަދު އެ ދުޝްމަނުން ތިބީ ކުރިމަތިވެފައިވާ ދަތިކަމުން އަރައިގަންނާނެ ގޮތެއް ނޭނގިފައި،" ލަރިޖާނީ ވިދާޅުވިއެވެ.

މީގެ އިތުރުން، "ބޮޑު އިބިލީސް" ކަމަށްވާ އެމެރިކާއާއި "ކުޑަ އިބިލީސް" ކަމަށްވާ އިޒްރޭލާ ދެކޮޅަށް އީރާނުން ކުރިއަށްގެންދާ ދިފާއީ މަސައްކަތްތައް ހުއްޓުމެއް ނެތި ކުރިއަށް ގެންދާނެ ކަމަށްވެސް އޭނާ ފާހަގަކުރެއްވިއެވެ.

އިސްލާމީ ސަރުކާރުތަކުން ކަންކަން ކުރަމުންދަނީ ކީރިތި ރަސޫލާ މުހައްމަދު (ޞޢވ) ގެ އުނގަންނައިދެއްވުންތަކާ އެއްގޮތަށް ނޫން ކަމަށް ވިދާޅުވެ ލަރިޖާނީ ވަނީ އެ ގައުމުތަކަށް ފާޑުވިދާޅުވެފައެވެ. އޭނާ ހަނދާންކޮށްދެއްވީ، އެހީތެރިކަމަށް އެދި މުސްލިމަކު ކުރާ އާދޭހަށް އިޖާބަ ނުދޭ މީހަކީ މުސްލިމެއް ނޫން ކަމަށް އޮންނަ ހަދީޘްފުޅެވެ.

ހަމައެއާއެކު، އީރާނުން އެމެރިކާގެ އަސްކަރީ މަރުކަޒުތަކަށާއި އެމެރިކާއާއި އިޒްރޭލުގެ މުދަލަށް ހަމަލާދޭތީ، އިސްލާމީ ގައުމުތަކުން އީރާނަކީ ދުޝްމަނެއްގެ ގޮތުގައި ދެކޭތީ އެކަމަށްވެސް އޭނާ ވަނީ ފާޑުވިދާޅުވެފައެވެ.

"ތިޔަ ގައުމުތަކުގައި ހުރި އެމެރިކާގެ މަރުކަޒުތަކުން އީރާނަށް ހަމަލާދެމުންދާއިރު، އީރާނުން އެއްވެސް ފިޔަވަޅެއް ނާޅައި މަޑުން އޮންނަންވީތޯ؟ އެ ގައުމުތަކުން ދައްކަނީ ބަހަނާ. މިއަދުގެ ހަނގުރާމައިގެ އެއްކޮޅުގައި އޮތީ އެމެރިކާއާއި އިޒްރޭލު. އަނެއްކޮޅުގައި އޮތީ އިސްލާމީ އީރާނާއި ދިފާއީ ބާރުތައް. ތިޔަބޭފުޅުން ތިއްބެވީ ކޮން ފަރާތެއްގައި؟" އޭނާ ސުވާލު އުފެއްދެވިއެވެ.

އިސްލާމީ ދުނިޔޭގެ މުސްތަގުބަލާ މެދު ވިސްނުމަށް އިސްލާމީ ގައުމުތަކަށް އިލްތިމާސް ކުރައްވަމުން އޭނާ ވިދާޅުވީ، އެމެރިކާގެ އެއްވެސް ވަފާތެރިކަމެއް ނެތްކަމާއި އިޒްރޭލަކީ ދުޝްމަނެއްކަން އެ ގައުމުތަކަށް އެނގޭ ކަމަށެވެ. އަދި އަމިއްލަ ނަފްސާއި ސަރަހައްދުގެ މުސްތަގުބަލާ މެދު ކުޑަވަގުތުކޮޅަކަށް ނަމަވެސް ވިސްނާލުމަށް އޭނާ އެދިވަޑައިގަތެވެ. އީރާނަކީ ހެޔޮއެދޭ ގައުމެއް ކަމަށާއި، އެހެން ގައުމުތަކުގެ މައްޗަށް ގަދަވެގަތުމުގެ އެއްވެސް ނިޔަތެއް އީރާނުގެ ނެތް ކަމަށްވެސް ވިދާޅުވިއެވެ.

އިސްލާމީ އުންމަތުގެ އެއްބައިވަންތަކަމާއެކު ހުރިހާ ގައުމުތަކެއްގެ ސަލާމަތާއި، ކުރިއެރުމާއި، މިނިވަންކަން ކަށަވަރުކުރެވޭނެ ކަމަށްވެސް ލަރިޖާނީ ވިދާޅުވިއެވެ.