އީރާނުގެ 6،000 އަށްވުރެ ގިނަ އަމާޒަކަށް އެމެރިކާއިން ހަމަލާދީފި

އިޒްރޭލާއި އެމެރިކާ ގުޅިގެން  އީރާނާ ދެކޮޅަށް ފެށި ހަނގުރާމައިގައި އެ ގައުމުގެ 6،000 އަށްވުރެ ގިނަ އަމާޒަކަށް ހަމަލާދީފައިވާ ކަމަށް އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ބުރާސްފަތި ދުވަހު ބުނެފިއެވެ. މިދިޔަ މަހު ފެށި މި ހަނގުރާމައިގައި ހަލާކުކޮށްލި އަމާޒުތަކުގެ ތެރޭގައި އީރާނުގެ ކަނޑުގެ ސިފައިންގެ ގިނަ އަދަދެއްގެ އުޅަނދުތައް ހިމެނޭ ކަމަށްވެސް އެމެރިކާއިން ވަނީ ހާމަކޮށްފައެވެ.

ސެންޓްކޮމްއިން އާންމުކުރި ތަފާސްހިސާބުތަކުން އެނގޭ ގޮތުގައި، އެމެރިކާގެ ހަމަލާތަކުގައި އީރާނުގެ 90 އަށްވުރެ ގިނަ ކަނޑު އުޅަނދަށް ވަނީ ބޮޑެތި ގެއްލުންތަކެއް ދީ ނުވަތަ އެއްކޮށް ނައްތާލާފައެވެ. މީގެ ތެރޭގައި ކަނޑު އަޑީގައި މައިން ވަޅުލުމަށް ބޭނުންކުރާ 30 އަށްވުރެ ގިނަ އުޅަނދު ހިމެނޭ ކަމަށް ބުނެފައިވެއެވެ.

މި އޮޕަރޭޝަންގައި ވައިގެ މަގުންނާއި، ކަނޑުގެ މަގުން އަދި އެއްގަމު މަގުން ބޭނުންކުރާ ތަފާތު ގިނަ ހަތިޔާރުތަކެއް ބޭނުންކޮށްފައިވާ ކަމަށް އެމެރިކާގެ އަސްކަރިއްޔާއިން ބުނެއެވެ. އޭގެ ތެރޭގައި ސްޓްރެޓީޖިކް ބޮމާ މަތިންދާބޯޓުތަކާއި، ފައިޓާ ޖެޓުތަކާއި، ޑްރޯންގެ އިތުރުން މިސައިލް ދިފާއީ ނިޒާމުތައް ހިމެނޭ ކަމަށްވެސް އެމެރިކާއިން ބުނެފައިވެއެވެ.

މިދިޔަ ފެބްރުއަރީ މަހުގެ 28 ވަނަ ދުވަހު އެމެރިކާއާއި އިޒްރޭލު ގުޅިގެން އީރާނަށް ދޭން ފެށި ހަމަލާތަކާއެކު މެދުއިރުމަތީގެ މަސްރަހު ވަނީ ވަރަށް ބޮޑަށް ނުތަނަވަސްވެފައެވެ. މި ހަމަލާތަކުގައި މިހާތަނަށް 1،300 އަށްވުރެ ގިނަ މީހުން މަރުވެފައިވާއިރު، އޭގެ ތެރޭގައި އީރާނުގެ ކުރީގެ ރޫހާނީ ލީޑަރު އަލީ ޚާމަނާއީ ވެސް ހިމެނިވަޑައިގަންނަވައެވެ.

އެމެރިކާއާއި އިޒްރޭލުގެ ހަމަލާތަކަށް ރައްދު ދިނުމުގެ ގޮތުން އީރާނުން ވެސް ދަނީ ޑްރޯން އަދި މިސައިލް ބޭނުންކޮށްގެން އިޒްރޭލަށާއި، އެމެރިކާގެ އަސްކަރީ މަރުކަޒުތައް ހުރި ގަލްފުގެ ގައުމުތަކަށް ހަމަލާދެމުންނެވެ.