އެމެރިކާގެ ހަމަލާ ތަކާ މެދު ބިރެއް ނެތި، އީރާންގެ ރައީސް ޕެޒެޝްކިއާން އާއި އިސްވެރިން، އާންމުންގެ ތެރެއަށް ނިކުންނަވައިފި

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމައިގައި، އީރާންގެ އިސްވެރިންނަށް އަމާޒުކޮށް ހަމަލާ ތަކެއް ދީފާނެ ކަމުގެ ބިރު ބޮޑުވެފައި ވަނިކޮށް، އީރާންގެ އިސްވެރިން މަގު ތަކަށް ނިކުންނަވައި، އާންމުންނާ އެކު ވަގުތު ހޭދަ ކުރައްވައިފި އެވެ.

ހުކުރު ދުވަހު އީރާންގައި ފާހަގަ ކުރި ޤުދުސް ދުވަހުގެ މުނާސަބަތުގައި ބޭއްވި އެއްވުމުގައި އީރާންގެ އިސްވެރިން ވަނީ ބައިވެރިވެ ވަޑައިގެންފަ އެވެ. ހަމަލާ ތަކެއް އަމާޒު ވެދާނެ ކަމުގެ ބިރު ބޮޑުވެފައި ވަނިކޮށް، އެމެރިކާ އާއި އިޒްރޭލް އަށް ގޮން ޖައްސަވައި، އީރާންގެ ވެރިން ވަނީ ގިނަ ވަގުތު ތަކެއް މަގު މަތީގައި ހޭދަ ކުރައްވައިފަ އެވެ.

އެގޮތުން އީރާންގެ ރައީސް މަސްއޫދު ޕެޒެޝްކިއާން ވަނީ އެއްވުމުގައި ބައިވެރިވެ ވަޑައިގެން، އާންމު ރައްޔިތުންނާ އެކު މަގު މަތީގައި ހިންގަވައިފަ އެވެ. އެމެރިކާ އާއި އިޒްރޭލްގެ ނުރައްކާ ބޮޑުވެފައި އޮތް ނަމަވެސް، އީރާންގެ ރައީސް ޕެޒެޝްކިއާން ފެނިވަޑައިގެންފައި ވަނީ ވަރަށް އާދައިގެ ގޮތަކަށް އާންމުންގެ ތެރޭގައި އުޅުއްވަނިކޮށެވެ. އަދި ރައްޔިތުންނާ ވާހަކަ ދައްކަވައި، ފޮޓޯ ނެންގެވުމުގައި ބައިވެރިވެ ވަޑައިގެންފައިވެ އެވެ. މިއީ އެމެރިކާ އާއި އިޒްރޭލްގެ ކުރިމަތީގައި އީރާންގެ އިސްވެރިން އެއްވެސް ބިރެއް ނެތްކަން ދެއްކުމުގެ ގޮތުން ކުރި ކަމެއްގެ ގޮތުގައި ފާހަގަ ކޮށްފައިވެ އެވެ.

މީޑިއާ ތަކުގައި ބުނެފައިވާ ގޮތުން އީރާންގެ ރައީސް ޕެޒެޝްކިއާންގެ އިތުރުން، ފޮރިން މިނިސްޓަރު އައްބާސް އަރާގްޗީ އާއި، ޤައުމީ ސަލާމަތާ ބެހޭ އިސްވެރިޔާ އަދި އަސްކަރީ ގޮތުން ވެސް ނުފޫޒު ގަދަ ލީޑަރެއް ކަމަށްވާ އަލީ ލަރިޖާނީ އަދި ޗީފް އޮފް ޕޮލިސް އަޙުމަދު ރެޒާ ރަދާން ވެސް ވަނީ މި ހިނގާލުމުގައި ބައިވެރިވެ ވަޑައިގެންފަ އެވެ. ނަމަވެސް، އީރާންގެ ރައީސް ޕެޒެޝްކިއާންއާ ޚިލާފަށް، އެ ބޭފުޅުންގެ ސަލާމަތީ ކަންކަން ކޮންމެ ވެސް މިންވަރަކަށް ވަރުގަދަ ކޮށްފައިވާ ކަމަށް ރިޕޯޓު ތަކުގައި ވަނީ ފާހަގަ ކޮށްފަ އެވެ. މިއީ އެމެރިކާ އާއި އިޒްރޭލް އިން އީރާންއާ ދެކޮޅަށް ހަނގުރާމަ ފެށި ފަހުން އީރާންގެ އިސްވެރިން މިގޮތަށް ފެނިފައިވާ ފުރަތަމަ ފަހަރެވެ. 

އީރާންގެ ރައީސް ޕެޒެޝްކިއާން އާއި އިސްވެރިން މި ހިނގާލުމުގައި ބައިވެރިވެ ވަޑައިގެންފައި ވީ ނަމަވެސް، އީރާންގެ އައު ރޫހީ ލީޑަރު މުޖުތަބާ ޚާމަނާއީ މި ހިނގާލުމުގައި ބައިވެރިވެ ވަޑައިގެންފައި ނުވެ އެވެ. އީރާންގެ އައު ރޫހީ ލީޑަރުގެ މަޤާމަށް މުޖުތަބާ ޚާމަނާއީ އައްޔަން ކޮށްފައި ވަނީ، އީރާންގެ ކުރީގެ ރޫހީ ލީޑަރު އަދި މުޖުތަބާ ޚާމަނާއީގެ ބައްޕާފުޅު އާޔަތުﷲ އަލީ ޚާމަނާއީ އަވަހާރަ ކޮށްލުމާ އެކު އެވެ. މި ހިނގާލުމުގައި އައު ރޫހީ ލީޑަރު ބައިވެރިވެ ވަޑައިގެންފައި ނުވަނީ ސަލާމަތީ ސަބަބު ތަކަށްޓަކައި ކަމަށް ބައެއް ފަރާތް ތަކުން ފާހަަގަ ކޮށްފައިވެ އެވެ. 

މި ހަރަކާތްތައް މިގޮތަށް ކުރިއަށްދާއިރު، އީރާނުގެ އާ ރޫހީ ލީޑަރ މުޖްތަބާ ޚާމަނާއީ އަދިވެސް އާންމުންގެ ތެރެއަށް ނުކުމެވަޑައިގެންފައެއް ނުވެއެވެ. އޭނާ މަގާމާ ހަވާލުވެވަޑައިގަތީ ހަނގުރާމައިގެ ކުރީކޮޅު އެމެރިކާއާއި އިޒްރޭލުން ދިން ހަމަލާތަކެއްގައި އޭނާގެ ބައްޕަ އަދި ކުރީގެ ރޫހީ ލީޑަރު އަވަހާރަވުމާ ގުޅިގެންނެވެ. މުޖްތަބާ ޚާމަނާއީ އާންމުންގެ ތެރެއިން ނުފެނުމަކީ ސަލާމަތީ ސަބަބުތަކަށްޓަކައި ނިންމާފައިވާ ނިންމުމެއް ކަމަށް ބެލެވެއެވެ.